سولتۇستىك كورەيانىڭ يادرولىق بومبانى سىناقتان وتكىزۋى الاڭداۋشىلىق تۋدىرۋدا
وزدەرىن «جاۋاپتى يادرولىق دەرجاۆا» اتاعان پحەنيان جاپپاي قىرىپ-جويۋ قارۋىن ەلدىڭ تاۋەلسىزدىگىنە قاۋىپ تونگەندە عانا كولداناتىنىن مالىمدەدى.
بۇل ەل وسىنداي سىناقتاردى بۇعان دەيىن دە جۇرگىزگەن. ءبىراق قارسى تاراپتاردىڭ ءوز ءۋاجى بار. الداعى ۋاقىتتا ب ۇ ۇ- نىڭ قاۋىپسىزدىك كەڭەسى وسى ماسەلەگە قاتىستى شۇعىل وتىرىس وتكىزۋى ءتيىس.
بۇگىن تاڭ ەرتەسىمەن سولتۇستىك كورەيا ەلىندە ماگنيتۋداسى 4,5 پەن 5,1 بالل ارالىعىندا جەر سىلكىنىسى تىركەلدى. ءارتۇرلى اقپارات كوزدەرىندەگى مالىمەتتەرگە قاراعاندا، جەردىڭ سىلكىنۋى تابيعي سەبەپتەرمەن ەمەس، ادام اسەرىنەن بولعان. ىلە-شالا سولتۇستىك كورەيا ورتالىق تەلەارناسىندا ەلدە سۋتەكتىك بومبانىڭ سىناعى ءساتتى وتكەنىن حابارلاندى.
ال بۇل جاڭالىقتى كوپتەگەن ەلدىڭ كوشباسشىلارى جاعىمسىز قابىلدادى. اتالعان جاڭالىقتى ەستىگەن وڭتۇستىك كورەيانىڭ پرەزيدەنتى پاك كىن حە ۇلتتىق قاۋىپسىزدىك كەڭەسىمەن جەدەل جيىن وتكىزىپ، ءوز جاۋىنگەرلەرىنىڭ سوعىس جاعدايىنا دايىندىعىن كۇشەيتۋگە شەشىم قابىلدادى.
پاك كىن حە، وڭتۇستىك كورەيا پرەزيدەنتى:
- كورەيا رەسپۋبليكاسى سولتۇستىك كورەيانىڭ سۋتەكتىك بومبانى سىناقتان وتكىزۋىنە قارسى شارالار قابىلدايدى. ا ق ش بيلىگىندەگىلەر سولتۇستىك كورەيانىڭ سۋتەكتىك جارىلعىشتى سىناقتان وتكىزدىك دەگەن مالىمدەمەسىن ناقتى دالەلدى دەپ تاني الماي وتىر. ال جاپونيا بولسا ب ۇ ۇ جانىنداعى قاۋىپسىزدىك كەڭەسىنىڭ تۇراقتى مۇشەلەرىمەن كەرى بايلانىس ورناتىپ، بۇل ماسەلەنىڭ انىق-قانىعىنا جەتپەكشى.
سيندزو ابە، جاپونيا پرەمەر-ءمينيسترى:
- سولتۇستىك كورەيانىڭ يادرولىق بومبانى سىناقتان وتكىزۋى ءبىزدىڭ ەلدىڭ قاۋىپسىزدىگىنە ۇلكەن قاتەر توندىرەدى. جاپونيا بۇعان ب ۇ ۇ مەن ا ق ش، وڭتۇستىك كورەيا، قىتاي جانە رەسەي ەلدەرىمەن بىرلەسە وتىرىپ ناقتى توسقاۋىل بەرەدى.
وڭتۇستىك كورەياداعىلار سولتۇستىك كورەيانىڭ بۇل ارەكەتىن ءتورتىنشى يادرولىق سىناققا دايىندىق دەپ كۇدىكتەنۋدە. بۇل ەكى ەل اراسىنداعى تەكەتىرەس 2015-جىلدىڭ تامىزىندا ديپلوماتيالىق جولمەن ءوز شەشىمىن تاپقان بولاتىن.
الايدا ىشتەي بىقسىعان ەرەگەستەر كەز كەلگەن ۋاقىتتا لاپ ەتە ءتۇسۋى مۇمكىن.
اۆتورلارى: تالعاتبەك ابدىقوجايەۆ،
گۇلنارا ايساقوۆا
www.24.kz
