كۇلكى كەرۋەنى. ءسىز ماعان سەنەسىز بە؟
- وتىنەمىن، ەسەپتەگىشتى وشىرمەڭىز. مەن مىنا مەكەمەگە ءبىر مينوتكە كىرەمىن دە شىعامىن، سودان كەيىن بۇدان ارى كەتەمىز، - دەدىم.
جۇرگىزۋشى كەلىسپەگەن پىشىنمەن قاباعىن تىرجيتتى.
- ايتسە دە ەسەپ- ايىرىسقانىڭىز ءجون شىعار، - دەدى ول.
- جوق- ا، ءبىز قازىر باسقا جەرگە بارامىز، - دەدىم مەن.
- ءسىز نەمەنە ماعان سەنبەيسىز بە؟ مەنى قاشىپ كەتەدى دەپ ويلايسىز با؟!
- ەشتەڭە دە ويلامايمىن، - دەدى جۇرگىزۋشى قاتقىل ۇنمەن.
- جولاۋشىلار ءارالۋان. ءبىرى قاشىپ كەتەدى، كەلەسى ءبىرى وندايعا...
- ءا- ءا، دەمەك ءسىز مەنى قاشىپ كەتەدى دەپ ويلايسىز عوي. وندا جاقسى!.. مەن سىزگە كەپىلدىككە قالپاعىمدى قالدىرىپ كەتەيىن.
- وي، قويىڭىزشى، - دەپ كەيي ءتۇستى ول.
- ءسىزدىڭ قالپاعىڭىز ماعان نە كەرەك؟ مەن سىزگە سەنەم. ءبىراق پورتفەلىڭىزدى قالدىرىپ، بارا بەرىڭىز.
- ا- ا، ونداي بولسا، - دەپ كۇيىپ كەتتىم مەن، - مارحاببات، پورتفەلدى قالدىرايىن... ءبىراق ءسىزدىڭ رۇقساتىڭىزبەن ماشينەڭىزدىڭ ءنومىرىن جازىپ الايىن.
- سىزگە نە بولعان؟ - دەپ كىرجيە ءتۇستى جۇرگىزۋشى.
- ماعان سەنبەيسىز بە؟ مەنى قاشىپ كەتەدى دەپ ويلايسىز با؟
- ەشتەڭە دە ويلاپ تۇرعانىم جوق، - دەدىم مەن.
- جۇرگىزۋشىلەر دە ءارالۋان: ءبىرى قالپاق كيگەندى ۇناتسا، كەلەسىسى پورتفەل ۇستاعاندى...
- سولاي ما؟ - دەدى جۇرگىزۋشى.
- جارايدى وندا! ءنومىردى جازىڭىز: اۆن 20-40. ايتسەدە پورتفەلىڭىزدە نە بار سونى كورسەتىڭىز.
- ونىڭ نە كەرەگى بار؟
- سوڭىنان تۇسىنىسپەۋشىلىك بولىپ جۇرمەسىن!
- مارحاببات، - دەدىم مەن جىنىم كەلىپ.
- كورىڭىز: ىشىندە كىتاپ، قاعاز بەن ەلەكتر قىرىنعىشتان باسقا ەشتەڭە جوق.
- ەلەكتر قىرىنعىشىڭىز جۇمىس ىستەي مە، جوق سىنعان با؟
- سىنعانىڭ نە؟! ازىرگە جۇمىس ىستەپ تۇر.
- «ازىرگەڭىز» قالاي؟ مەن ونى ماشينەنىڭ ىشىندە قوسا المايمىن.
- ونى كىم ءبىلىپتى، - دەپ مىرس ەتتىم مەن.
- ءوزىڭىز قىرىنباپسىزدا، سول جاق بەتىڭىزدە بەزەۋىڭىز بار ەكەن...
- مەنىڭ بەت- الپەتىمدى جاتتاپ الايىن دەپ وتىرسىز عوي، ءا، - دەدى ىشىندەگى زىعىردانى قايناپ.
- جارايدى! مەن دە ءسىزدى ۇمىتپايمىن! كارتوپ مۇرىنىڭىز، دوڭگەلەك كوزىڭىز، قۇلاعىڭىز ءارتۇرلى... سول جاق تىسىڭىزدە پلومبى بار...
- ءا- ءا، ونداي بولسا، - دەپ كۇيىپ كەتتىم مەن، - وندا رەسمي تۇردە بولسىن! مىنە مەنىڭ قۇجاتتارىم: جەكە كۋالىك، پروپۋسك، نەكە تۋرالى كۋالىك. الىڭىز! ءبىراق، ءبىلىپ قويىڭىز، ءسىز ەسى دۇرىس، مادەنيەتتى اداممەن سويلەسىپ وتىرسىز. ەندى ءوز قۇجاتىڭىزدى كورسەتىڭىز.
- مارحاببات، - دەدى ول ءيىلىپ، - الىڭىز.
- جۇرگىزۋشى قۇقى، كاسىپوداق بيلەتى.
- تۇراتىن جەرىڭ تۋرالى انىقتاما قاعازىڭ جوق شىعار، ءسىرا، - دەدىم مەن قىتىمىرلانا.
- جوق، - دەپ ءبىراق كەستى.
- ەشتەڭە ەتپەس. كەرەك بولساڭىز تابادى ولار!
- ءسىزدى دە شاقىرىپ الار قاجەت بولساڭىز!
- بىردەڭە بولا قالسا، 47-بابپەن كەتەرسىز، - دەدىم مەن.
- ال ءسىز 52-نىڭ «ب» تارماعىمەن ىلىگەسىز، - دەدى ول دا كىجىنىپ.
ءبىز ءبىر- بىرىمىزگە ىزالى وشپەندىلىكپەن قاراسىپ قالدىق.
- اۋ، اينالايىن، - دەدىم مەن توسىننان.
- وسىڭ ۇيات ەمەس پە؟
- ال سىزگە شە؟
- مەن ەكەۋىمىز ءۇشىن دە ۇيالىپ وتىرمىن، - دەدىم.
- مەن دە! - دەدى ول كوزىن الا بەرىپ.
- قۇجاتتارىڭىزدى الىڭىز...
- ءسىز دە الىڭىز...
- راحمەت، - دەدىم مەن.
- ماشينە ءنومىرىن دە ۇمىتايىق.
- ۇمىتايىق، - دەدى ول.
ءبىز مول مەيىرىمدىلىكپەن قۇشاق ايقاستىرىپ، ءبىر-ءبىرىمىزدىڭ جوتامىزدان قاعىستىق.
- مەن قالاي عانا ءسىز تۋرالى جامان ويدا بولدىم، - دەدى تاڭىرقاعان بولىپ.
- ءسىز وتە ءوڭدى ادام ەكەنسىز. قوي كوزدى، بەتىڭىزدەگى مەڭ دە جاراسىمدى ەكەن.
- ءسىز دە سۇلۋ ادام ەكەنسىز، - دەدى ول.
- كوزىڭىز ۇلكەن، قۇلاعىڭىز تازا، ءتىسىڭىزدى ۇقىپتاپ، ەمدەتىپ وتىرادى ەكەنسىز.
- مەن، قازىر جەدەل كەلەم، - دەدىم مەن.
- مارحاببات، - دەدى ول.
- ءسىز كەلگەنشە جالعىزسىراپ قالاتىن بولدىم...
ءبىز ءبىر-بىرىمىزگە قاراپ جىلى جىمىيىستىق تا ماشينەدەن شىقتىم.
كىرە بەرىس ەسىككە جاقىن كەلە بەرە پروپۋسكىمنىڭ جوق ەكەنىن بايقادىم.
«ءاي، وڭباعان-اي» دەپ ويلادىم مەن. - دەمەك، «الدا-جالدا» دەپ پروپۋسكىمدى الىپ قالعان ەكەن عوي... ەشتەڭە ەتپەس! ەشقايدا قاشپايدى. الدا-جالدا دەپ مەن دە ونىڭ ارتقى دوڭعالاعىن تەسىپ كەتتىم...
گ. گورين.
