قازاقستاندا ب ا ق قىزمەتكەرلەرىنىڭ كاسىپوداعى تىركەلدى
ونىڭ جۇمىسى جۋرناليستەردىڭ قۇقىعىن قورعاۋعا باعىتتالعان.
بۇل تۋرالى وسى كاسىپوداقتى قۇرۋشىلار بۇگىن الماتىدا وتكەن باسپا ءسوز ءماسليحاتىندا مالىمدەدى.
كاسىپوداق ءتورايىمى ەلەنا مالىگينا اتالمىش ۇيىم ەڭبەك كەلىسىمشارتىن جاساردا جانە سوتتا ب ا ق قىزمەتكەرلەرىنىڭ مۇددەسىن قورعايتىندىعىن، سونداي-اق ق ر «ەڭبەك كودەكسى» مەن «كاسىپوداقتار تۋرالى» زاڭ بويىنشا ءتۇسىندىرۋ جۇمىستارىن جۇرگىزەتىندىگىن جەتكىزدى.
«ءبىز زاڭنامالاردا كورسەتىلگەن نورمالاردىڭ ساقتالعانىن قالايمىز. نەگىزى، ءاربىر رەداكسيانىڭ ءوز كاسىپوداعى بولۋى كەرەك. بۇل ۇدەرىس بۇكىل ەلدى قامتۋى ءتيىس. ءبىز تىركەلدىك، ەندى مۇشەلىك جارنا جانە باسقا دا ماسەلەلەردى الداعى ۋاقىتتا شەشەتىن بولامىز»، - دەدى ول.
كاسىپوداقتى ۇيىمداستىرۋشىلاردىڭ ءبىرى - ليۋدميلا ەكزارحوۆا ءوز سوزىندە قازىرگى تاڭدا الماتى مەن استانانى قوسقاندا ەلىمىزدىڭ كەم دەگەندە 10 وڭىرىندە باستاۋىش كاسىپوداق ۇيىمدارىن قۇرۋ كەرەكتىگىن جەتكىزدى. سوندا كاسىپوداق ءوز مارتەبەسىن راستاپ، جۋرناليستەرگە رەسمي تۇردە كومەك كورسەتە الادى. سونداي-اق ول، بۇل ۇيىمداردا جۇمىس بەرۋشىلەرمەن كەلىسسوز جۇرگىزەتىن كوشباسشى تۇلعالاردى سايلاۋ كەرەكتىگىن ايتتى.
اۆتور: جاپپاربەرگەن ايبوتا
