الماتى جولاۋشىلار كولىگى باسقارماسى اۆتوبۋستان «قۇلاپ كەتكەن» جولاۋشى تۋرالى تۇسىنىكتەمە بەردى

ەستەرىڭىزگە سالا كەتەلىك، وقيعا ۇستىمىزدەگى جىلى 30 -قاراشادا ورىن العان.

عالامتور جەلىسىندە №86 باعدارلى اۆتوبۋستىڭ ارتىندا كەلە جاتقان اۆتوكولىكتىڭ بەينەتىركەگىشىنە تۇسىرىلگەن بەينەبايان پايدا بولدى. اۆتوبۋس ءسۇيىنباي كوشەسىنىڭ بويىمەن سولتۇستىك باعىتتا كەلە جاتقان. فۋرمانوۆ كوشەسىمەن قيىلىسار تۇستا «گەليوس» جانارماي قۇيۋ بەكەتى ماڭىندا اۆتوبۋستان سىرتقا قاراي ءبىر جولاۋشى جولعا قۇلاپ تۇسەدى. وسىعان بايلانىستى الماتى قالاسىنىڭ جولاۋشىلار كولىگى باسقارماسى «№1 تاكسوموتور پاركى» ج ش س- ىنە ساۋال جولداعان. ويتكەنى اۆتوبۋس وسى پارككە تيەسىلى.

اۆتوپارك باسشىلىعى بۇل بەينەباياننىڭ شىندىققا جاناسپايتىندىعى تۋرالى مالىمدەدى.

«بەينەتاسپادا جولاۋشىنىڭ تەك قۇلاعان ءساتى عانا بەينەلەنگەن. شىن مانىسىندە جۇرگىنشى جول ورتاسىنداعى ءبولۋ جولاعىندا مازاسىزدانا قول بۇلعاپ، تەڭسەلىپ تۇرعان. كەيىن جولدى كەسىپ وتپەك بولىپ جۇگىرە باستايدى. بەينەتىركەگىشتە اۆتوبۋستىڭ سول جاعىندا جەڭىل اۆتوكولىكتىڭ كەتىپ بارا جاتقانى كورىنىپ تۇر. جۇرگىنشى جۇگىرە باستاعان ساتتە ول توقتايدى. وسى ساتتە اۆتوبۋس تا بىردەن توقتاي قالادى. سوندا توقتاعان اۆتوبۋستىڭ الدىنان جۇگىرىپ ءوتىپ بارا جاتقان جۇرگىنشى كەنەت اياعى شالىنىپ قۇلاپ قالعان»، - دەلىنگەن تاكسوموتور پاركى وكىلدەرىنىڭ بەرگەن جاۋابىندا.

ودان باسقا، اۆتوپارك باسشىلىعىنىڭ ايتۋىنشا، وقيعا ورنىنا كەلىپ جەتكەن جەدەل مەديتسينالىق كومەك بريگاداسى جۇرگىنشىنىڭ ماس كۇيدە بولعاندىعىن انىقتادى. ال اۆتوبۋس جۇرگىزۋشىسى وقيعانىڭ ءمان-جايى انىقتالعانشا جۇمىستان ۋاقىتشا شەتتەتىلدى.

«اۆتوبۋس جۇرگىزۋشىسى كەلەسى كۇنى ناۋقاستىڭ ءحالىن ءبىلۋ ءۇشىن اۋرۋحانعا بارىپ، ونى تاپپادى. سويتسە، ول مەديتسينالىق كومەكتەن باس تارتىپتى. ءبىراق قايدا تۇراتىندىعىن حابارلاعان. دەگەنمەن، تەرگەۋشى ونى ىزدەپ تابا الماي ءجۇر. ويتكەنى ول ايتقان مەكەنجايىندا تۇرمايتىن بولىپ شىقتى. قازىر ونىڭ قايدا ەكەنى بەلگىسىز»، - دەپ جاۋاپ بەردى اۆتوپارك وكىلدەرى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى