سارىاعاش اۋدانىندا سالىنىپ جاتقان قابىرعاسى قيسىق مەشىت كوپشىلىكتى تاڭ قالدىردى
سارىاعاش اۋدانىنىڭ بىرتىلەك اۋىلىندا سالىنىپ جاتقان ەرەكشە مەشىتكە اۋىل تۇرعىندارى تاڭ قالىپ وتىر.
«بۇل مەشىت پە، الدە شىركەۋ مە؟ نەگە قابىرعالارى قيسىق-قيسىق؟ جەرگىلىكتى اكىمدىك پەن اۋداندىق مەشىتتىڭ يمامى وسىنى دۇرىستاماي قايدا قاراپ وتىر؟» - دەيدى تۇرعىندار.
«يسلامدا دا، قازاقستاننىڭ زاڭدارىندا دا مەشىتتىڭ قانداي فورمادا بولۋى كەرەكتىگى تۋرالى كورسەتىلمەگەن. تەك حاديستە عانا مەشىتتى اشەكەيلەي بەرمەۋ كەرەكتىگى ايتىلادى. ءبىز وسى مەشىتتى سالاردا اۋىل تۇرعىندارىنا قۇدايى تاماق بەرىپ، الدارىنا بەس ءتۇرلى جوبانى ۇسىندىق. بارلىعى اقىلداسىپ، وسى جوبا دۇرىس دەگەنگە توقتالدى. سودان ءبىز، اعايىندى جىگىتتەر قۇرىلىستى بىلتىر باستادىق. اللا بۇيىرتسا، كەلەسى جىلى ورازا ايى باستالماي تۇرىپ مەشىتتى حالىقتىڭ يگىلىگىنە بەرسەك دەگەن نيەتتەمىز. جەردى ءوز اقشامىزعا ساتىپ الىپ، ونى ءدىني باسقارما مەنشىگىنە بەردىك. ەندى سول جەرگە تۇرعىزىلعان مەشىتتىڭ دە قۇجاتتارىن سوعان وتكىزەمىز. مەشىتكە اتاۋ بەرىپ، يمام بەلگىلەۋ دە باسقارمانىڭ قۇزىرىندا. ارينە، ءوز ۇسىنىسىمىزدى جاسايمىز، وعان ءبىزدىڭ قۇقىمىز بار»، - دەيدڭ مەشىتتى سالۋشى جانداربەك اسانوۆ ەسىمدى ازامات.
سودان سوڭ، ول مەشىت قابىرعالارىنىڭ نەلىكتەن قيسىق ەكەنىن ءتۇسىندىردى.
«ول ەشقانداي قيسىق ەمەس جانە اسەمدىك ءۇشىن دە جاسالعان جوق. ءار بۇرىشتىڭ وزىندىك اتقارار جۇمىسى بار. جەر قوزعالىسىنا ارناپ ەسەپتەلگەن. قانداي تەرەزەگە قاراساق تا 180 گرادۋستى كورە المايمىز. ال بىزدە تەرەزەدەن قاراساڭ، 180 گرادۋستىق ەندىكتى تولىق باقىلاي الاسىڭ. مۇنىڭ بارلىعى ەسەپتەلگەن. مەشىت جوعارىدان قاراعاندا سەگىز بۇرىشتى جۇلدىزشانى كوز الدىڭا ەلەستەتەدى. سەگىز بۇرىش - بۇل يسلامنىڭ بەلگىسى، مۇنى ءدىني باسقارمانىڭ ءوزى قولدادى. مەشىتتىڭ سىرتى عانا ەمەس، توبەسى مەن ەدەنى دە سەگىز بۇرىشتى بولىپ كەلەدى. كىرە بەرىستەگى توسەلگەن كافەلدەرى دە سەگىز بۇرىشتى. مۇنىڭ بارلىعى الدىن- الا ويلاستىرىلعان. بىزدەگىلەر ءتورت بۇرىشتى، دوڭگەلەك كۇمبەزدى مەشىتكە ۇيرەنگەن. ول بىزگە بۇرىنعى يراندىق شەبەرلەردەن كەلگەن. العاشقى مەشىتتى سولار كەلىپ جاساعاندىقتان ءبىز وعان ۇيرەنىپ قالدىق. باسقاشا بولسا توسىرقاي قارايتىنىمىز سوندىقتان»، - دەيدى ول.
دەرەككوز: Zamana.kz
