ەلباسىنىڭ تۋعان اۋىلى - ءۇشقوڭىردا ق ر تاۋەلسىزدىك كۇنى اتاپ ءوتىلدى - فوتو
وعان قاراساي اۋداندىق اكىمدىگى مەن ءۇشقوڭىر اۋىلدىق وكرۋگىنىڭ وكىلدەرى، ۇلى وتان سوعىسى مەن ەڭبەك ارداگەرلەرى، 1986 - جىلعى جەلتوقسان وقيعاسىنا قاتىسۋشىلار، دەنساۋلىق ساقتاۋ، ءبىلىم، مادەنيەت جانە سپورت سالالارىنىڭ قىزمەتكەرلەرى، بيزنەس سۋبەكتىلەرىنىڭ وكىلدەرى جانە جەرگىلىكتى تۇرعىندار قاتىستى.
الدىمەن ساحناعا قازاقستان رەسپۋبليكاسىنىڭ تۋى شىعارىلىپ، ءانۇران ورىندالدى.
بۇدان كەيىن ءسوز العان الماتى وبلىسى، قاراساي اۋدانى اكىمىنىڭ ورىنباسارى ءجۇمادىل نۇرسۇلتان جينالعان قاۋىمدى تاۋەلسىزدىك كۇنىمەن قۇتتىقتاپ، بۇل كۇننىڭ ەل تاريحىنداعى ماڭىزىن اتاپ كورسەتتى.
«تاۋەلسىزدىك - ۇلت تاريحىنداعى جەڭىستەرىمىز بەن تابىستارىمىزدىڭ باستاۋى. مەملەكەتىمىزدىڭ ىرگەسى نىعايدى، ىنتىماعى جاراسقان تاتۋ ەلىمىزدە دوستىعىمىز بەن ەكونوميكامىز وركەندەپ، حالىقتىڭ ءال- اۋقاتى جوعارى دەڭگەيگە كوتەرىلدى. قازاقستاننىڭ كوپۇلتتى حالقى ءوزىنىڭ 2050 - جىلعا دەيىنگى دامۋ جولىن بەلگىلەپ، ناعىز قۋاتتى دا تابىستى ەل بولۋعا ۇمتىلۋدا. تاۋەلسىزدىكتىڭ 24 جىلىندا ەلىمىز قيان اسۋلار مەن قيلى بەلەستەردى ارتتا قالدىردى.
ماڭگىلىك ەل بولۋدى مۇرات ەتىپ، ەكونوميكالىق ءوسىم مەن حالىقتى جۇمىسپەن قامتۋدى ماقسات تۇتقان «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» جولداۋى، داعدارىس سالدارىنا قارسى ۇتىمدى شارالار مەن كوپسالالى باعىت- باعدارلار ۇسىنىپ وتىر. جولداۋ تاپسىرمالارىن مەرزىمىندە جانە ساپالى ورىنداۋدا جۇدىرىقتاي جۇمىلىپ، ۇيىمداسىپ ۇمتىلىس جاساساق، ءبىز داعدارىستى ەڭسەرەتىنىمىزگە سەنىمدىمىن»، - دەدى ج. نۇرسۇلتان.
مەرەكەلىك شارا بارىسىندا اۋداننىڭ الەۋمەتتىك ەكونوميكالىق دامۋىنا قوماقتى ۇلەس قوسقان ازاماتتار ماراپاتتالدى. سونىمەن قاتار، تاۋەلسىزدىك مەرەكەسىنە وراي اۋداننىڭ جاس مەملەكەتتىك قىزمەتكەرلەرى ادال قىزمەت ەتۋگە انت بەردى.
سالتاناتتى جيىننىڭ سوڭى مەرەكەلىك كونسەرتكە ۇلاستى.
