قازاقستان ءانۇرانى بويىنشا تۇسىنىكتەمە حاتتار بارلىق شەتەل ەلشىلىكتەرىنە جولداندى

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ق ر مادەنيەت جانە سپورت ۆيتسە-ءمينيسترى ساكەن مۇسايبەكوۆ ءمالىم ەتتى.

«قازاقستاندا سوڭعى 2-3 جىلدىڭ ىشىندە اۋىر اتلەتيكادان، بوكستان، دزيۋدودان الەم چەمپيوناتتارى مەن ازيا بىرىنشىلىكتەرى جانە حالىقارالىق گران-پري جارىستارى ءوتتى. ءبىزدىڭ ەلدە وتكەن شارالاردا بىردە-ءبىر رەت قاتىسۋشى مەملەكەتتەردىڭ ءانۇرانىنا قاتىستى داۋ-داماي تۋعان ەمەس. مەنىڭشە، بۇل ۇيىمداستىرۋشى مەملەكەتكە بايلانىستى. ءبىز ەشكىمنىڭ كوڭىلىن قالدىرماۋ ءۇشىن وسى ماسەلەدەگى جۇمىستاردى وتە مۇقيات اتقارامىز»، - دەدى س. مۇسايبەكوۆ.

ونىڭ ايتۋىنشا، قازاقستان ءانۇرانىنا قاتىستى تۇسىنىكتەمە حاتتار بارلىق شەتەل ەلشىلىكتەرىنە جولداندى.

«ءىرى سپورتتىق جارىستاردا قازاقستان ءانۇرانىنا قاتىستى تۋىنداعان ولقىلىقتاردان كەيىن، ارنايى تۇسىنىكتەمە حاتتار قازاقستاندا تىركەلگەن بارلىق شەتەل ەلشىلىكتەرىنە جولداندى. ول تۋرالى ءبىز ءوزىمىزدىڭ باپكەرلەرمەن جانە سپورتشىلارمەن سويلەستىك، بارلىعى ونى بىلەدى. ءبىراق ۇيىمداستىرۋشىلاردان قاتە كەتىپ جاتادى. مۇمكىن سول ەلدەگى ءبىلىم بەرۋ دەڭگەيىنىڭ تومەندىگى بولسا كەرەك، ولار الەم رەكوردىن جاڭارتىپ، وليمپيادا مەدالدارىن جەڭىپ الىپ جاتقان سپورتشىلاردىڭ مەملەكەتتىك ءانۇراندارىن تەكسەرمەيدى. بارلىعى ۇيىمداستىرۋشىلارعا بايلانىستى»، - دەپ كەستى ۆيتسە- مينيستر.

ەسكە سالا كەتەيىك، بيىل قازاقستان ءانۇرانىنا قاتىستى ءۇش بىردەي قاتەلىك كەتتى. الدىمەن قاراشا ايىندا «بارىس» يوكەريت» ماتچىندا ەسكى ءانۇران شىرقالسا، ءدال وسىنداي جاعداي گروزنىيدا اۋىر اتلەتيكادان وتكەن ر ف پرەزيدەنتى كۋبوگىندە يليا يلين جانە زاگرەبتە دەنيس تەنمەن ورىن العان بولاتىن.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى