ولجاس سۇلەيمەنوۆ تۇركى الەمىن زەرتتەۋلەر قورىنىڭ جىل ادامى اتاندى - فوتو
بيىلعى جىلى تۇركى الەمى قورىنىڭ جىل ادامى اتاعىنا قازاقستاننىڭ اقىن، جازۋشىسى، اتاقتى مەملەكەت جانە قوعام قايراتكەرى ولجاس سۇلەيمەنوۆ يە بولدى، دەپ حابارلايدى تۇركياداعى قازاقستان ەلشىلىگىنىڭ باسپا ءسوز قىزمەتىنەن.
وسىعان بايلانىستى ىستامبۇل قالاسىندا ارنايى ءىس-شارا ۇيىمداستىرىلىپ، وعان ءتۇرلى ەلدەردىڭ، ونىڭ ىشىندە قازاقستاننىڭ، تۇركيانىڭ، ازەربايجاننىڭ، تۇرىكمەنستاننىڭ، رەسەيدىڭ، ماكەدونيانىڭ، مولدوۆانىڭ جانە باسقا دا ەلدەردىڭ وكىلدەرى قاتىستى.
سالتاناتتى ءراسىم بارىسىندا قوردىڭ باسشىسى كوزحان يازگان جانە بىلتىرعى جىلدىڭ لاۋرەاتى، ماجارستاننىڭ ازاماتى اندراش جولت بيرو «جىل ادامى» قۇرمەتتى سىيلىعىن و. سۇلەيمەنوۆكە تاپسىردى.
ءىس-شاراعا قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى جانسەيىت تۇيمەبايەۆ تا قاتىستى. قازاقستاننىڭ ەلشىسى سويلەگەن سوزىندە لاۋرەات العان اتاعىمەن قۇتتىقتاي وتىرىپ، و. سۇلەيمەنوۆتىڭ اعارتۋشىلىعى مەن قوعامدىق-ساياسي قىزمەتىنىڭ حالىقارالىق دەڭگەيدە جوعارى باعالاناتىنىن اتاپ ءوتتى.
و. سۇلەيمەنوۆ وعان كورسەتىلگەن قۇرمەت ءۇشىن ريزاشىلىعىن بىلدىرە وتىرىپ، تۇركى الەمىن زەرتتەۋلەر قورىنىڭ قۇرىلۋ تاريحى، تۇركولوگيا سالاسىنداعى پىكىرلەرى، سونداي-اق باسقا دا وزەكتى ماسەلەلەر مەن تۇركولوگيا سالاسىندا ءوزارا ارەكەتتەسۋ تۋرالى باياندادى.
