رۋعا، جىككە بولىنگەن جۇرت ليۆيانىڭ تاعدىرىن قايتالايدى - ەلباسى
كەشە مەملەكەت باسشىسى نۇرسۇلتان نازاربايەۆ اعىمداعى جىلدى قورىتىندىلاپ تەلەارنا جۋرناليستەرىنە سۇحبات بەرۋ بارىسىندا رۋشىلدىق دەرتىنە قاتىستى ءوز پىكىرىن وسىلاي جەتكىزدى.
سۇحبات بارىسىندا جۋرناليست بەيسەن قۇرانبەك پرەزيدەنتتەن رۋشىلدىق تۋرالى پىكىرىن سۇراعان بولاتىن.
«قازىر رۋدىڭ اتىن كولىگىنە، كيىمىنە جازىپ الاتىنداردى كورەمىز. مەنىڭ ويىمشا، قازاق رۋعا بولىنبەيدى، رۋدان قۇرالادى. ءبىزدى قۇراۋشى رۋ بولۋى ءتيىس ەدى. الايدا جاڭاعىداي جاعىمسىز ارەكەتتەرگە نە ايتاسىز؟» - دەپ سۇرادى بەيسەن قۇرانبەك.
ءوز كەزەگىندە ەلباسى رۋشىلدىقتى مۇلدەم جاقتامايتىنىن العا تارتتى.
«ءبىز ات توبەلىندەي قازاقپىز. ءبىز تۇرىكتەر سەكىلدى 80 ميلليون، ورىستار سياقتى 140 ميلليون ادام ەمەسپىز. ەۋروپانىڭ كوپتەگەن ەلىنەن ازبىز. ارەڭ دەگەندە ون-ون ءبىر ميلليونعا جەتكەن قازاقتى قىرىق رۋعا جىكتەيتىن بولساق، وندا ەل بولمايمىز. رەسەيدىڭ تاريحىندا، ورىستاردىڭ ارحيۆىندا قازاقتى قالاي جاۋلاپ العاندىعى تۋرالى ءبارى جازۋلى جاتىر. كوپ تاريحشىلار دا بىلەدى، قازاقتى رۋعا، جۇزگە ءبولىپ جاۋلادى. كەرىسىنشە، قازاق بىرىككەن اڭىراقايدا اتاقتى جاۋىنا ۇلكەن سوققى بەردى. قالاي جەڭدى؟ باسى بىرىككەندە جەڭدى. «سەن قاي جاقتانسىڭ؟ قاي رۋدانسىڭ؟» دەپ ەشكىم سۇراعان جوق، بار قازاق بىرىكتى. ابىلاي حاننىڭ جانىندا ءار ءوڭىردىڭ دە باتىرلارى بولدى. ەگەر ءبىز بۇنداي دەرتكە ىلىگەتىن بولساق، ليۆيا سەكىلدى قۇردىمعا كەتەمىز. قازىر وندا تايپالار سوعىسىپ جاتىر دەيدى، ال ءبىزدىڭ رۋلار سول تايپالار سەكىلدى بولىپ كەتسە نە بولامىز؟»، - دەدى ن. نازاربايەۆ.
سونىمەن قاتار مەملەكەت باسشىسى ەل بولۋ ءۇشىن بىرلىككە سىزات تۇسپەۋى شارت ەكەنىن باسا ايتتى.
«كەزىندە ۆەتنامدى الپاۋىت امەريكا الا المادى. رۋحى كۇشتى، بىرلىگى مىقتى بولاتىن ول ەلدىڭ. ءبىزدىڭ دە ەل بولۋىمىز - بىرلىگىمىزگە قاراي. رۋشىلدىق دەرتىنەن كەلەر ۇرپاق تا ادا بولۋى كەرەك. بۇعان، اسىرەسە، زيالى قاۋىم كوبىرەك زەر سالۋى كەرەك. مەن اعايىن-تۋعاننان الىس جۇرىڭدەر دەپ ايتپايمىن. توي-تومالاقتا كەزدەسەمىز، سول كەزدە قالجىڭداپ ايتارمىز اڭگىمەلەردى، بۇل جاقسى قاسيەت. دەگەنمەن، رۋشىلدىقتا ارى قاراي بارماۋ كەرەك. ابايدىڭ: «ءبىرىڭدى قازاق ءبىرىڭ دوس، كورمەسەڭ ءىستىڭ ءبارى بوس» دەگەن ءسوزدى ءار اۋىلدىڭ تورىنە جازىپ قويسا دا بولادى. تاۋەلسىزدىگىمىزگە ءولىپ-ءوشىپ جەتكەن حالىقپىز. بۇنداي زامان قازاقتىڭ باسىندا بۇرىن-سوڭدى بولعان ەمەس. مەنىڭ ايتارىم، ءبىزدى سىرتتان الاتىن جاۋ جوق. بىرلىگىمىز بولسا، قازاق ەشكىمگە دە بوي بەرمەيدى. ءبىز «ارىم - جانىمنىڭ ساداعاسى» دەيتىن نامىسقوي حالىقپىز. سوندىقتان دا بابادان قالعان اماناتتى ساقتاۋ ءۇشىن ءبىر بولۋىمىز كەرەك»، - دەدى ن. نازاربايەۆ.
اۆتور: قانات مامەتقازى ۇلى
