ەندى «پروتون» قۇلاسا، شىعىندى رەسەي ءوزى تولەيدى - ن. نازاربايەۆ

«بايقوڭىر بولماسا، رەسەيمەن سەنىمدى قارىم-قاتىناس بولماسا، ءبىزدىڭ جىگىتتەرىمىز عارىشقا ۇشپاس ەدى. بۇل - ءبىر. ەكىنشىدەن، قازىر قازاقستان عارىشقا شىعاتىن زىمىران جاساي المايدى. عارىش ايلاعىن ۇستاپ تۇراتىن، كادرلار دايىندايتىن جاعداي جوق. ءبىراق ءبىز وسىعان قاراي بەت الىپ كەلەمىز، وسىنى ورىندايمىز. ەلدى قوبالجىتاتىن «پروتون» دەگەن زىمىران بار. ول جەرگە ءتۇسىپ، جارىلعان كەزدە، زىمىران تۇسكەن جەردە قيىندىق بولادى. سوڭعى رەت «پروتون» قۇلاعان وقيعا ءالى ەسىمىزدە. سول جاعدايدان كەيىن ءبىز رەسەيمەن كەلىسسوز جۇرگىزىپ، ەگەر دە ونداي وقيعالار تاعى قايتالاناتىن بولسا، رەسەي جاعى اپات شىعىنىن تولەيدى دەگەن كەلىسىمگە كەلدىك. سوندىقتان ەندى ول زىمىران قۇلاسا، شىعىن رەسەي ءوزى تولەيدى، «پروتون» قۇلاعان جەردى ءوزى تازالايدى»، - دەپ قاداپ ايتتى ن. نازاربايەۆ.

ەلباسى اتاپ وتكەندەي، قازاقستان رەسەي تاراپىمەن باسقا زىمىران تاسىمالداعىش تۋرالى كەلىسىمگە قول قويعان.

«ءبىز تۇبىندە سول زىمىرىننان ارىلىپ، باسقا زىمىران تاسىمالداعىش بولادى دەگەن شارتقا قول قويدىق. كوپ ماسەلەلەردى شەشتىك. قازاقستانمەن بىرلەسە عارىشقا ۇشىرىلاتىن جاڭا قۇرىلعى - «بايتەرەك» جاسالدى. وسى ءىستىڭ جولىندا قيىندىقتارى كوپ بولعانىمەن، ءبىز ايتقان بەتىمىزدەن قايتپاي، وسى ماسەلەنى كوتەرىپ كەلە جاتىرمىز. ورىستار اراسىندا «شىعىستا تاعى ءبىر عارىش ايلاعى بولادى» دەپ ءسوز شىعارىپ قالادى. ءبىزدىڭ ەشقانداي قارسىلىعىمىز جوق، جاساسىن دا بارا بەرسىن. بايقوڭىر باسسىز قالادى دەگەن اڭگىمە جوق. سوندىقتان تاۋەلسىزدىك العان العاشقى جىلدارى بايقوڭىردى ەشكىمگە بەرمەي، ءوزىمىز الىپ قالامىز دەگەندە، ول جەردە قىزىلوردانىڭ شاڭىنان باسقا تۇك قالمايتىن ەدى. رەسەيمەن كەلىسسوزگە وتىرىپ، بايقوڭىردى ساقتاپ قالدىق، جۇمىس ىستەپ تۇر. «شىعىس» عارىش ايلاعى بولادى ەكەن دەپ، بايقوڭىر جابىلمايدى. سەبەبى، ونىڭ ءوز مىندەتى بار. كەڭەس وداعى اقىماق ەمەس، بەكەردەن بەكەر ءدال سول جەردى تاڭداعان جوق. بايقوڭىردىڭ ورنالاسقان جەرى ەكۆادورعا جاقىن، عارىشقا الىپ ۇشا الاتىن جۇگى كوپ. سوندىقتان ارى قاراي دا رەسەيمەن بىرگە جۇمىس ىستەي بەرەمىز. بايقوڭىر - قازاقتىڭ ابىرويى ءۇشىن، ەكىنشى جاعىنان ماماندار دايارلاۋ ءۇشىن قاجەت»، - دەدى ەلباسى.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى