ازاماتتاردىڭ الەۋمەتتىك احۋالى ناشارلاپ كەتپەۋى ءۇشىن بار جاعداي جاسالادى - ن. نازاربايەۆ
كەشە اعىمداعى جىلدى قورىتىندىلاپ، جۋرناليستەرگە بەرگەن سۇحباتىندا مەملەكەت باسشىسى نۇرسۇلتان نازاربايەۆ وسىلاي مالىمدەدى.
«بيىلعى جىلدى قورىتىندىلاۋدىڭ ءتۇرلى جاقتارى بارشىلىق. دەگەنمەن، مەن جالپىلاما العاندا اعىمداعى جىل ەلىمىز ءۇشىن تۇراقتى دەپ ويلايمىن. ارينە، قيىندىقتار جوق ەمەس، بار. دەگەنمەن، ازاماتتاردىڭ الەۋمەتتىك جاعدايى ناشارلاپ كەتپەۋى ءۇشىن ءبارىن جاسايمىز»، - دەدى ن. نازاربايەۆ.
بۇدان سوڭ ەلباسى كەلەر جىلدان باستاپ بيۋدجەتتىك مەكەمە قىزمەتكەرلەرىنىڭ جالاقىسى كوبەيەتىنىن، سونىڭ ىشىندە مەملەكەتتىك قىزمەتكەرلەر، مۇعالىمدەر مەن دارىگەرلەردىڭ، «ب» كورپۋسىنىڭ جالاقىسى ارتاتىنىن ايتتى. سونىمەن قاتار داعدارىسقا قاراماستان، زەينەتاقى مەن شاكىرتاقى دەڭگەيى دە ارتادى.
«بۇنىڭ ءبارى ازاماتتاردى داعدارىس سالدارىنان ساقتاۋ ءۇشىن جاسالۋدا»، - دەدى ەلباسى.
اۆتور: قانات مامەتقازى ۇلى
