ءابىش كەكىلباي ۇلى ادەبيەتكە قۇبىلىس بولىپ كەلدى - ن. ورازالين
«مىنە ءۇش كۇن بولدى، قازاقستان جۇرتشىلىعى ءبىرىنىڭ كوزىنىڭ جاسىن ءبىرى ءسۇرتىپ، الىس-جاقىننان كەلگەن اعايىن جۇرت، تانىس جانە بەيتانىس ەل بىرىنە-ءبىرى كوڭىل ايتىپ، سابىرعا شاقىرۋدا. حالقىمىزدىڭ ماڭدايىنا بىتكەن ۇلىلارىن، ءبىرتۋارلارىن ءبىزدىڭ تامىرىن تەرەڭنەن تارتار ۇلى جۇرتىمىز قالاي الاقانىنا سالىپ، قالاي قادىرلەپ، سوڭعى ساپارعا دا قالاي شىعارىپ سالاتىندىعىنىڭ تالاي كۋاسى بولىپ كەلە جاتىرمىز. بۇگىن قايعىمىزدى جەڭىلدەتىپ، كوزىمىزدىڭ جاسىن ءسۇرتىپ، ابەكەڭنىڭ وتباسىنا كوڭىل ايتىپ وتىرمىز»، - دەدى نۇرلان ورازالين.
وسى ورايدا ول ءوز سوزىندە 1960- جىلدارى ءابىش كەكىلباي ۇلى ادەبيەتكە قۇبىلىس بولىپ كەلگەنىن، بيىكتەن جىعىلماي، ىشكى تازالىعىن ساقتاپ ومىردەن وتكەنىن اتاپ ءوتتى.
«ۇلىلارعا ءتان عۇمىر كەشتى. قازاقتا، اسىرەسە كوركەم ادەبيەتتە «ءداۋىر» دەيتىن ءسوزدى ءجيى ەسكە الامىز. «ابايدىڭ ءداۋىرى»، «ماحامبەتتىڭ ءداۋىرى»، «جامبىلدىڭ ءداۋىرى» دەيمىز. مىنە كەشەگى «اۋەزوۆتىڭ ءداۋىرى» دەپ ايتۋشى ەدىك. ەندى ءابىش كەكىلبايەۆتىڭ ءداۋىرى ۇلتتىڭ ۇلكەن ۇلى ارەناسىنا شىعىپ وتىر. قالىڭ ەلىنىڭ ادەبيەتىن ۇلى بيىككە، الەمدىك دەڭگەيگە، جاڭا ساتىعا كوتەردى. ەلباسىمىزدىڭ قاسىندا ءجۇرىپ، حالقى ءۇشىن جانىن پيدا ەتۋگە دە دايىن ەكەنىن بايقاتىپ ەدى. سول بىزگە ۇلگى ءارى مەكتەپ»، - دەپ تەبىرەندى ن. ورازالين.
سونىمەن قاتار دەپۋتات ءوز سوزىندە ءابىش كەكىلباي ۇلىنىڭ ومىردەن وتۋىنە بايلانىستى قازاقستان جازۋشىلار وداعىنىڭ اتىنا جان-جاقتان كوڭىل ايتۋ جەدەلحاتتارى كەلىپ جاتقانىن جەتكىزدى. كوپتەگەن ەلدەردىڭ جازۋشىلارىنان كەلگەن وسى جەدەلحاتتار وتباسىنا تاپسىرىلاتىن بولادى.
اۆتور: رۋسلان عابباسوۆ
