ءابىش كەكىلبايەۆ ادەبيەت ەسىگىن يمەنبەي اشىپ، بىردەن تورىنە شىققان تۇلعا - م. جولداسبەكوۆ
بۇگىن استاناداعى «كورمە» كەشەنىندە ءابىش كەكىلباي ۇلىن اقتىق ساپارعا شىعارىپ سالۋ قارالى جيىنىندا كورنەكتى مەملەكەت جانە قوعام قايراتكەرى، پروفەسسور مىرزاتاي جولداسبەكوۆ وسىلاي ءمالىم ەتتى.
«ءبىز بۇگىن حالقىمىزدىڭ زاڭعار جازۋشىسىن، ەلىمىزدىڭ كورنەكتى مەملەكەت قايراتكەرىن قازاقتىڭ ءابىشىن، ابىزىن سوڭعى ساپارعا شىعارىپ سالىپ تۇرمىز. ءابىش كەكىلبايەۆ ادەبيەت ەسىگىن يمەنبەي اشىپ، بىردەن سونىڭ تورىنە شىققان، ونەردە ءوزىنىڭ جولىن تاپقان، تاريح بولمىسىن، دارحان دالانىڭ ۇلىلىعىن جارقىراتىپ اشقان، ءسويتىپ قازاق ادەبيەتىنىڭ كوسەگەسىن كوگەرتكەن، كوركەم شەجىرە جاساي بىلگەن ەپيك جازۋشى ەدى. ازاماتتىق تۇلعاسى، قايراتكەرلىك كەلبەتى، سۋرەتكەرلىك بولمىسى، گۋمانيستىك تابيعاتى، ادامي ءبىتىمى بولەك ءوز ەلىنىڭ سۇيىكتى پەرزەنتى ەدى»، - دەپ ەسكە الدى م. جولداسبەكوۆ.
سونىمەن قاتار عالىم ءوز سوزىندە ءابىش كەكىلبايەۆ ءوز جەرىندە باقىتىن تاپقان ازامات، ماقتاۋعا جانە قولپاشتاۋعا لايىقتى ازامات دەپ اتاپ ءوتتى.
«ءابىش ۇشان- تەڭىز، ءبىلىمپاز جانە دانا ەدى. التىن قۇرساق انالار امان بولسا، ءالى دە تالاي ابىشتەر كەلەر دۇنيەگە، ءبىراق ولاردىڭ ەشقايسىسى كەكىلبايەۆ بولا المايدى. ءابىشتى حالقى لايىقتاپ باعالادى، ەڭبەك ەرى اتاندى، القالى جيىنداردىڭ ۇنەمى تورىندە وتىردى. ارتىندا باي مۇرا، اتالى ءسوز، اسىل ونەگە قالدى. سوندىقتان ونىڭ تۋعان حالقىمەن بىرگە جاساي بەرەتىنىنە ەشقانداي كۇماندانبايمىز»، - دەپ تەبىرەندى م. جولداسبەكوۆ.
اۆتور: رۋسلان عابباسوۆ
