ي. يليندى ماراپاتتاۋ راسىمىندە تاعى دا قازاقستاننىڭ ەسكى ءانۇرانى وينالدى

تاعى ءبىر سپورتشىمىز الەكساندر زايچيكوۆ كۇمىس مەدال يەلەنگەن ەدى.

جەڭىمپازداردى ۇلىقتاۋ راسىمىندە قازاقستاننىڭ ەسكى ءانۇرانى تاعى دا وينالدى. باستاپقىدا جەڭىس تۇعىرىندا تۇرعان الەكساندر مەن يليا تۇسىنبەي قالىپ، ءبىر-بىرىنە قارادى. وسىدان كەيىن يليا جارىستى ۇيىمداستىرۋشىلار مەن ماراپاتتاۋعا شىققان ازاماتتارعا بۇل ەسكى ءانۇران ەكەنىن ايتتى. وسىلايشا يليانىڭ تاباندىلىعىنىڭ ارقاسىندا 2-3 مينۋتتىق ۇزىلىستەن كەيىن ەلىمىزدىڭ جاڭا ءانۇرانى شىرقالدى.

بۇعان دەيىن حابارلاعانىمىزداي، يليا العاشقى جۇلقا كوتەرۋ سايىسىندا 191 كەلىنى باعىندىرىپ، ءبىرىنشى ورىنعا تابان تىرەگەن بولاتىن. ال ەكىنشى جاتتىعۋدا ول العاشقى مۇمكىنشىلىگىندە-اق قارسىلاستارىنان وق بويى وزىق بولىپ، 231 كەلىنى باعىندىردى. وسىدان كەيىن التىن مەدال يليانىڭ قانجىعاسىن مايلاعان ەدى. ءبىراق ول تاۋەكەلگە بارىپ بىردەن 246 كەلىگە تاپسىرىس بەردى جانە ونى ەركىن ەڭسەردى.

ەستە بولسا، وتكەن جىلى الماتىدا وتكەن الەم چەمپيوناتىندا يليا يلين 242 كەلىنى باعىندىرىپ، الەم رەكوردىن ورناتقان بولاتىن. ال اراعا ءبىر جىل ۋاقىت سالىپ داڭقتى سپورتشىمىز ءوز رەكوردىن جاڭارتىپ وتىر. قوس سايىستىڭ ناتيجەسىندە دە يليا 437 كەلى كوتەرىپ جاڭا رەكورد ورناتتى.

ال ءدال وسى سالماق ساناتىندا جارىس جولىنا شىققان تاعى ءبىر سپورتشىمىز، الەم چەمپيونى الەكساندر زايچيكوۆ جۇلقا كوتەرۋدە 190، سەرپە كوتەرۋدە 226 كەلىنى باعىندىردى. وسىلايشا ول ەكى جاتتىعۋدىڭ قورىتىندىسىندا كۇمىس مەدالدى قانجىعاسىنا بايلادى. ءۇشىنشى ورىن ەكى جاتتىعۋدا 411 كەلى كوتەرگەن رەسەيلىك زىلتەمىرشى تيمۋر نانيەۆكە بۇيىردى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى