ءابىش كەكىلباي ۇلى ادامزاتتىڭ اقىل-وي قازىناسىن كوكىرەك كوزىنەن وتكىزگەن ابىز تۇلعا - اكادەميك ءو. ايتباي ۇلى
مىناۋ جارىق دۇنيەدەن اياداي عانا اۋىلدان شىعىپ، التى الاشتىڭ ارداقتىسىنا اينالعان، ادامزاتتىڭ اقىل-وي قورىنا اسىل تۋىندىلارىن قوسىپ، كوركەم ويدىڭ كوكجيەگىن كەڭەيتكەن ءابىش كەكىلبايەۆ ءوتتى، دەيدى «قازاق ءتىلى» حالىقارالىق قوعامىنىڭ پرەزيدەنتى، اكادەميك ءومىرزاق ايتباي ۇلى قازاقستاننىڭ حالىق جازۋشىسى، مەملەكەت جانە قوعام قايراتكەرى، قازاقستان رەسپۋبليكاسىنىڭ العاشقى مەملەكەتتىك حاتشىسى ءابىش كەكىلباي ۇلىنىڭ قازاسىنا بايلانىستى.
عالىمنىڭ ايتۋىنشا، ابەكەڭ ۇلتىمىزعا ەس، سىرتىمىزعا سەس ەدى. ەلىمىز ابەكەڭ سياقتى الىپتارىمەن ەڭسەلى ەدى، ابەكەڭدەي اسىل ازاماتتارىمەن ارلى ەدى. ابەكەڭدەي جۇمىر جەردى جۇرەگىنە سىيدىرىپ، ادامزاتتىڭ اقىل-وي قازىناسىن كوكىرەك كوزىنەن وتكىزگەن ابىز تۇلعالارىمەن پاراساتتى ەدى. وسىنداي اياۋلى تۇلعاسىنان ايرىلۋ قارا ورمان حالقىمىزدىڭ ارقاسىنا ايازداي باتىپ تۇر.
«دەسەك تە، قازاقتىڭ التىن قۇرساقتى انالارى ابەكەڭدەي اسىل ۇلداردى دۇنيەگە اكەلمەي تۇرماس-اۋ. الايدا، ابەكەڭنىڭ ورنى ءارقاشاندا بولەك، ءارقاشاندا دارا، ەرەكشە ءبىلىنىپ تۇرماق. قالىڭ قازاق اقىل-ويعا سۋساعاندا، تەرەڭدىك ىزدەپ سابىلعاندا، تىعىرىققا تىرەلىپ، داعدارعاندا، بيىكتىك كوكسەپ، كوككە ۇمتىلعاندا، تاڭعى شىقتاي تازا، دالاداي كەڭ تىنىس اڭساعاندا ابەكەڭنىڭ ارتىندا قالعان تەلەگەي-تەڭىز مۇراسى كىتاپتارىنا - «ەلەڭ الاڭىنا»، «ۇركەرىنە»، «شىڭىراۋىنا»، «كۇيشىسىنە»، «حانشا داريا حيكاياسىنا» قايتا-قايتا اينالىپ سوقپاق. وزەكتى ورتەيتىن وكىنىش، قابىرعا قايىستىرار اۋىر قازا...»، - دەيدى اكادەميك ءومىرزاق ايتباي ۇلى.
«قارا ورمانداي قالىڭ جۇرتىمىزعا، ابەكەڭنىڭ وتباسىنا، تۋعان-تۋىستارىنا قايعىلارىنا ورتاقتاسىپ كوڭىل ايتامىز. ابەكەڭنىڭ الدى - پەيىش، ارتى - كەنىش بولسىن. جاتقان جەرى جايلى، توپىراعى تورقا بولسىن»، - دەپ تۇيىندەدى ول.
