ق ر قورعانىس ءمينيسترى اسكەري-ديپلوماتيالىق كورپۋستى قابىلدادى - فوتو
«تاۋەلسىزدىك - تاۋەكەل ەتكەننىڭ عانا تاعدىرىنا بۇيىراتىن باقىت. سول ءۇشىن دە ول قاي مەملەكەتتىڭ بولسىن ەڭ باستى ساياسي قۇندىلىعى سانالادى».
بۇل ءبىزدىڭ حالقىمىزعا عاسىرلار بويى ارمانداعان «ەگەمەندىك پەن ەركىندىكتى» قارۋدىڭ كۇشىمەن ەمەس، ساليقالى ىسىمەن، قاقتىعىسقان قولمەن ەمەس، بەيبىت جولمەن اكەلگەن ەلباسىمىز نۇرسۇلتان ءابىش ۇلى نازاربايەۆتىڭ ءسوزى.
سوندىقتان دا ءبىزدىڭ ەلىمىز ءۇشىن تاۋەلسىزدىك - باعا جەتپەس بايلىق بولسا، اسكەرىمىز ءۇشىن - قاسىق قانى قالعانشا قورعايتىن اسىل مۇرا. وسىناۋ ەڭسەلى جىلدارى ءبىز جاڭا قورعانىس جۇيەسىنىڭ نەگىزىن قالاپ، قازاق ارمياسىنىڭ زاماناۋي بەينەسىن، ايبىنى مەن قۋاتىن ارتتىردىق. قازاقستاننىڭ بۇگىنگى قارۋلى كۇشتەرى - جاۋگەرشىلىك پەن سوعىستىڭ قۇمارى ەمەس، بەيبىتشىلىكتىڭ تۇمارى! باسقىنشى اسكەردىڭ وكىلى ەمەس، قاۋىپسىزدىكتىڭ كەپىلى! ەندى مىنە، ءبىز تۋعان جەرىمىزدىڭ وسىناۋ ءبىرتۇتاستىعىن ساقتاي وتىرىپ، بۇگىن وسىندا مەرەكەمىزبەن بولىسۋگە ارنايى كەلگەن سىزدەردىڭ ەلدەرىڭىزبەن قاۋىپسىزدىك پەن قورعانىس سالاسىندا ءتيىمدى ديپلوماتيالىق ارىپتەستىك ورناتىپ وتىرمىز.
بۇل ورايدا، ەل مەن ەلدى، جەر مەن جەردى جالعاپ، ىنتىماقتاستىق پەن ارىپتەستىكتىڭ تۋىن بايلاعان سىزدەردىڭ ەرەكشە ميسسيا - جاۋاپتى قىزمەتتەرىڭىزدىڭ ءمانى دە، ماڭىزى دا بولەك»، - دەدى ق ر قورعانىس ءمينيسترى يمانعالي تاسماعامبەتوۆ.
ول اسكەري-تەحنيكالىق ىنتىماقتاستىقتى دامىتۋ ەلدەرىمىزگە اسكەري- ديپلوماتيالىق قارىم-قاتىناستىڭ اناعۇرلىم جوعارى دەڭگەيىنە شىعۋعا مۇمكىندىك بەرەدى دەپ اتاپ ءوتتى.
ءسوزسىز، قازاقستاننىڭ قارۋلى كۇشتەرى بۇل باعىتتا سەرىكتەس مەملەكەتتەرمەن بەيبىتشىلىكتى قولداۋ جونىندەگى بىرلەسكەن ءىس-قيمىلدارعا ءازىر. وسى جىل ىشىندە رەسەي، ا ق ش، قىتاي، تۇركيا جانە وزگە دە مەملەكەتتەرمەن 10 نان اسا حالىقارالىق اسكەري وقۋ-جاتتىعۋ، جوعارى دەڭگەيدەگى 15 ءىرى كەزدەسۋ مەن ساپارلار وتكىزىلدى، ونىڭ قورىتىندىسى بويىنشا ناتيجەلەرگە قول جەتكىزىلدى جانە ماڭىزدى شارتتار جاسالدى»، - دەدى يمانعالي تاسماعامبەتوۆ.
سونىمەن بىرگە، ول قورعانىس- ونەركاسىبى كەشەنى، عىلىمدى كوپ قاجەت ەتەتىن ءوندىرىس پەن تەحنولوگيا ترانسفەرتىن دامىتۋ تاقىرىبىن قوزعاپ، اسكەري اتتاشە مەن قورعانىس ۆەدومستۆولارىنىڭ رەسمي وكىلدەرىن استانادا كەلەسى 2016-جىلدىڭ جاز مەزگىلىندە وتەتىن «كادەكس-2016» قارۋ-جاراق، اسكەري تەحنيكا مەن مۇلىكتىڭ IV حالىقارالىق كورمەسىنە قاتىسۋعا شاقىردى، دەپ حابارلايدى ق ر ق م باسپا ءسوز قىزمەتى.
