الماتىدا رەۆماتولوگيالىق ورتالىق دارىگەرلەرى ناۋقاستاردى تەگىن قابىلدادى - فوتو
بۇگىن الماتىلىقتار ورتالىق ماماندارىنىڭ كەڭەسىن الىپ، تەگىن تەكسەرۋدەن ءوتتى.
كەلۋشىلەر ءارقيلى اناليز تۇرلەرىن، يممۋنولوگيالىق تەست تاپسىردى. ولارعا ە ك گ، وستەودەنستومەتريا سياقتى دياگنوستيكالىق قىزمەت تەگىن ۇسىنىلدى.
بارلىعى 71 ادام 10 رەۆماتولوگ ماماننىڭ تەگىن كەڭەسىن الدى.
«ناۋقاستاردىڭ باسىم كوپشىلىگى قيمىل- تىرەك اپپاراتىنىڭ اۋرۋلارىمەن (%62)، دانەكەر ءتىننىڭ جۇيەلى اۋرۋلارىمەن (13 پايىز) اۋىراتىنى بەلگىلى بولدى. ولاردىڭ ىشىندە العاش رەت رەۆماتولوگتىڭ الدىنا كەلگەندەر دە بار»، - دەدى گۇلنار سەرىكالي قىزى.
ادامداردى قاراۋعا ستاتسيونار جانە كەڭەستىك بولىمدەردىڭ دارىگەرلەرى، س. اسفەندياروۆ اتىنداعى قازۇمۋ كافەدراسىنىڭ پروفەسسورى گاۋحار قۇرمانوۆا تارتىلدى.
ايتا كەتۋ كەرەك، مۇنداي شارالار ورتالىقتا قالالىق دەنساۋلىق ساقتاۋ باسقارماسىنىڭ باستاماسىمەن ءجيى وتكىزىلىپ تۇرادى. قازاننىڭ اياعىندا تۇڭعىش پرەزيدەنت كۇنىنە وراي اشىق ەسىك كۇندەرى وتكەن بولاتىن.
تامىزدا وتكەن اشىق ەسىك كۇندەرىندە 127 ادام تەكسەرۋدەن وتكەن. ولاردىڭ 89 ى، ياعني 74 پايىزى العاش قارالعاندار ەكەن.
ماماننىڭ ايتۋىنشا، ءقازىر ريەۆماتولوگيالىق اۋرۋلاردىڭ 150 ءتۇرى بار. «جاستار دا، ورتا جاستاعىلار دا ءجيى اۋىرادى. بۇل - ءومىر ساپاسىن تومەندەتەتىن، مۇگەدەكتىككە اكەلەتىن اۋرۋلاردىڭ ءبىرى. تىرەك- قيمىل اپپاراتىنىڭ زاقىمدانۋىنان وسىنداي جاعدايعا جەتەدى. اشىق ەسىك كۇندەرىن وتكىزۋ سەبەبى دە سول. ادام ۋاقتىلى كەلىپ، ەرتەرەك تىركەلىپ ەمدەلسە، ناۋقاستىڭ ءومىر ساپاسى جاقسارادى. ستاتسيونارلىق كومەك كورسەتەمىز، كونسۋلتاتسيالىق كەڭەس بەرىپ، باقىلايمىز. ارىق قاراي باقىلاۋدى ىسكە اسىرامىز. بۇل - ءبىزدىڭ مىندەتىمىز»، - دەدى ول.
دارىگەر ريەۆماتولوگيالىق اۋرۋلاردىڭ سانىنىڭ ارتۋىن زاماناۋي ءومىر سالتىمەن بايلانىستىرادى.
«ەڭ الدىمەن دياگنوستيكا شارالارى جاقساردى. حالىقتىڭ وزىنە دەگەن كوزقاراسى دا وزگەرگەن. اقپارات كوپ. ولار بىردەن وزىنەن سيمپتوم بايقاسا كەلىپ وزدەرى قارالىپ جاتادى. زامان اعىمىنا بايلانىستى سترەسس كوپ، ءومىر اعىنى تەز. سوعان بايلانىستى اۋتويمۋندىق اۋرۋلار كوبەيىپ كەتتى. ءقازىر ادام ومىرىندە گيپوديناميالىق رەجيم باسىم. بۇل ءوزى تۇقىم قۋالايتىن بەيىمدىلىك بولاتىن اۋرۋ. اتا- اناسىندا بار بولسا، بالاسىنان كورىنىس بەرۋى مۇمكىن. رەۆماتولوگيالىق اۋرۋدى انىقتاۋ وڭاي ەمەس. ول ءارتۇرلى بەتپەردەمەن وتەدى. بۋىندىق سيندروممەن 90 پايىزى باستالسا، قالعانى باسقا قىرىنان كورىنىس بەرۋى مۇمكىن. سوندىقتان، بۇل جەردە دارىگەردىڭ بىلىكتىلىگى اسا زور ءرول وينايدى»، - دەدى گۇلنار سەرىكالي قىزى.
