دەنساۋلىق: ادام سۋدى نەگە كوپ ءىشۋى كەرەك؟
ادام اعزاسىنىڭ 65-70 پايىزى سۋدان تۇرادى. ادام دەنساۋلىعى جاقسى بولۋى ءۇشىن كۇنىنە ەكى ليتر سۋ ءىشۋ كەرەكتىگى دالەلدەنگەن. الايدا، مۇنشا سۋ نە ءۇشىن قاجەت؟
توكسيندەردى شىعارۋ
ادام اعزاسىندا كوپتەگەن توكسيندىك زاتتار كەزدەسەدى. ءوندىرىستىڭ زيانى، پايداسىز تاعام، كولىكتەن شىعاتىن شاڭ- توزاڭ، وسىنىڭ ءبارى ءبىزدىڭ اعزامىز كەزىگەتىن جاعىمسىز زاتتاردىڭ ءبىر بولىگى. ودان بولەك، تاماقتى قايتا ىسىتۋ كەزىندە كوپتەگەن توكسيندىك زاتتار پايدا بولادى. ال بۇل كەيىن تاماقتان ۋلانۋعا اكەلىپ سوقتىرادى. قۋانىشقا قاراي، سۋدىڭ كوپتىگىنەن ءبىزدىڭ بۇيرەكتەرىمىز جاقسى جۇمىس ىستەپ، نەسەپ ارقىلى اعزاداعى قاجەتسىز زاتتاردى شىعارادى. ايتپاقشى، تاعى ءبىر ماڭىزدى مۇشە باۋىر دا سۋسىز جۇمىس ىستەي المايدى.
امبەباپ ەرىتكىش
ءبىزدىڭ ومىرىمىزدەگى كوپتەگەن حيميالىق رەاكسيالار دا سۋدىڭ كومەگىمەن ورىندالادى. اعزاداعى بارلىق زاتتار تەك ەرىتىندى تۇرىندە. بۇلشىق ەت، تەرى، سۇيەك، بۇزىلعان تكاندەردىڭ قالىپقا كەلۋى، گورمونداردىڭ سينتەزدەلۋى، فەرمەنتتەر، مەدياتورلار، ءبارى دە سۋدى قاجەت ەتەدى.
جۇرەك پەن بۋىننىڭ ساۋلىعى
سۋ اتەروسكلەروز بەن باسقا دا ونىڭ اسقىنعان تۇرلەرىنىڭ ەڭ نەگىزگى ەمى بولىپ تابىلادى. ءبىز قاجەتتى مولشەردە سۋ ىشكەندە قان جاقسى تارالادى دا، اتەروسكلەروزدىق تۇيىندەردىڭ پايدا بولۋىنا جول بەرمەيدى. سول سەبەپتى، جۇرەك تالماسى جانە ينسۋلت سىندى اۋرۋلاردىڭ الدىن الادى.
بۋىنداردىڭ قوزعالۋى ءارى ەپتىلىگى
ءاربىر بۋىندا بۋىن سۇيىقتىعى بار. سول سۇيىقتىقتىڭ ارقاسىندا بۋىن جىلجىپ تۇرادى. ال اعزاداعى سۋدىڭ ازدىعى بۋىن سۇيىقتىعىنىڭ وزگەرۋىنە، قۇرعاۋىنا اكەلەدى. بۋىن قيىندىقپەن قوزعالىپ، ءبىزدىڭ بەلسەندى ارەكەت ەتۋىمىزگە كەدەرگى كەلتىرەدى.
يممۋنيتەت جانە سۋ
سۋ يممۋندىق جۇيەنىڭ قىزمەتىن جاقسارتادى. بىرىنشىدەن، يممۋندىق جۇيە اعزاعا قان ارقىلى تارالادى. ال قان قويۋلانىپ قالسا، ۇساق بۋىنداردىڭ اراسىنا جەتۋى نەعايبىل ەكەنىن جوعارىدا ايتتىق. ەكىنشىدەن، يممۋندىق جاسۋشالاردىڭ پايدا بولۋى سۋدى قاجەت ەتەدى. ۇشىنشىدەن، نەسەپتىڭ دۇرىس ايدالماۋى مەن كەرەك ەمەس زاتتاردىڭ اعزادان تولىق كەتپەۋى يممۋنيتەتتى تۇسىرەدى.
سۋ - دەنە تەمپەراتۋراسىن رەتتەيدى
ءسىز سپورتپەن شۇعىلدانعان كەزدە نەمەسە اۋا ىستىق بولسا، اعزا ىستىقتان تەر شىعارۋ ارقىلى قورعانادى. تەر تەرى سىرتىنا شىعادى دا، سول ارەكەتىمەن اعزانى سالقىنداتادى. ايتپاقشى، تەرى توكسيندەردى شىعارۋدىڭ تاعى ءبىر جولى ەكەنىن ۇمىتپاڭىزدار.
سۋ ارىقتاۋعا كومەكتەسەدى
ەگەر ءسىز ارىقتاۋدى ماقسات ەتىپ، ديەتاعا وتىرىپ، سپورتپەن شۇعىلدانساڭىز، سۋدى ۇمىتپاڭىز. سۋ مايدى جويۋعا كومەكتەسەدى. ارينە، ارىقتاۋ ءۇشىن سىزگە جۇگىرىپ، سپورتپەن اينالىسىپ، تەرلەۋ قاجەت. الايدا، ءسىز قاجەتتى مولشەردە سۋ ىشسەڭىز، جاتتىعۋدان دا جاقسى قورىتىندى شىعادى.
مي دا سۋدى قاجەت ەتەدى
باس اۋىرۋ، السىزدىك، جۇمىس ىستەۋ قابىلەتىنىڭ تومەندەۋى - بۇل اعزاسىنداعى سۋ مولشەرى از ادامعا كەزدەسەتىن قيىندىقتار. ورتالىق جۇيكە جۇيەسىندە ورىن الاتىن وزگەرىستەر، قيىن حيميالىق رەاكتسيالار جانە ميعا وتتەگى جەتكىزۋ، مۇنىڭ ءبارى سۋدى قاجەت ەتەدى.
تەرىنىڭ ادەمىلىگى ساقتالادى
جۇمساق، تازا تەرى قانداي جاعىمدى ءارى ادەمى كورىنەدى! ارينە، تەرى تازالىعىن ساقتاۋ ءۇشىن ءبىز ءتۇرلى كوسمەتيكالار قولدانامىز، كوسمەتولوگتار كەڭەسىنە جۇگىنەمىز، الايدا، سۋدىڭ قاجەتتىلىگىن دە ۇمىتپايمىز. سۋدى كەرەكتى مولشەردە قولدانۋ تەرىدەگى ىلعالدىقتى ساقتاۋعا كومەكتەسەدى، تەرىنىڭ قارتايۋىنا قارسى ارەكەت ەتەدى.
اعزانى قالاي «سۋارۋ» قاجەت؟!
1. ادام كۇنىنە 2 ليتر سۋ ءىشۋى كەرەك. بۇل سالماعى 65-70 كەلى ارالىقتاعى ادام ءۇشىن جارامدى. ەگەر ءسىز بۇدان دا ءىرى بولساڭىز، وندا كۇن سايىنعى ىشەتىن سۋ مولشەرىن ەسەپتەپ شىعىڭىز. ءاربىر كيلوگرامم ءۇشىن 30 گرامم سۋدان قوسىلىپ وتىرادى. مىسالى، ءسىز 90 كەلى ءتارتاسىزۇ 90x30=2700 م ل سۋ.
2. ءاربىر تاڭدى ءبىر ستاكان كوفەمەن ەمەس، سۋمەن باستاڭىز. وسىلاي، ءسىز اعزانىڭ ويانۋىنا كومەكتەسەسىز. ميعا كۇش بەرى، ىشەك پەن قارىنعا تاڭعى استى قورىتۋعا مۇمكىندىك بەرەسىز.
3. سىزدە بوس ۋاقىت مۇلدە از بولسا دا، كۇن سايىنعى ىشەتىن سۋ مولشەرىن ۇمىتپاڭىز. بۇل جوسپاردى اسىرا ورىنداۋعا دا بولادى. بۇيرەك ساۋ بولسا، سۋدىڭ كەيبىر ارتىق مولشەرىن دە رەتتەيدى. ەگەر وتە جۇمىسباستى بولساڭىز، سۋدى جۇمىس ۇستەلىنە ارتىعىمەن قويىڭىز. ويتكەنى، سۋ ىزدەپ اۋرە بولمايسىز جانە ماڭىزدى قۇجاتتار اراسىندا سۋدىڭ تۇرعانى ءسىزدىڭ دەنەڭىزگە سۋ كەرەكتىگىن ەسكە سالىپ تۇرادى.
4. ەگەر ءسىز سپورتپەن شۇعىلدانىپ، بەلسەندى قيمىلدايتىن بولساڭىز، اعزاڭىزعا سۋ ارتىعىمەن قاجەت ەكەنىن ەستە ساقتاڭىز. ويتكەنى، اعزاداعى سۋدىڭ كوپ بولىگى تەرمەن كەتىپ قالادى. كۇنىنە ىشەتىن سۋ مولشەرىنە كەم دەگەندە 2 ليتر جانە 2 ستاكان سۋ قوسىڭىز.
5. اۋىرعان كەزدە، اسىرەسە، دەنە قىزۋى كوتەرىلگەندە سىزگە سۋ اسا قاجەت بولادى. مۇنداي كەزدە سۋ ەڭ ماڭىزدى ءدارىنىڭ ءبىرى بولماق. ءسىزدىڭ اعزاڭىزعا جينالعان باكتەريالار مەن ۆيرۋستاردىڭ كەسىرىنەن توكسيندەر جينالىپ، ءسىزدىڭ قيمىلداۋىڭىز دا اۋىرلاپ كەتەدى. اعزاداعى جاعىمسىز زاتتاردان ارىلۋ ءۇشىن سۋ ءىشىڭىز. ەگەر سۋ ىشە الماساڭىز، ليمون قوسىلعان شاي، كومپوت، مورس، تاۋىق سورپاسىن قابىلداڭىز. باكتەريالاردىڭ بوي الۋىنا جول بەرمەي، بۇيرەكتەرىڭىزدىڭ جۇمىسىن جاقسارتۋعا كومەكتەسىڭىز.
6. قۇرعاق اۋا كەزىندە سۋدى كوپ ءىشىڭىز. ويتكەنى، مۇنداي كەزدەردە كوپ تەرلەپ، كوپ تىنىس العاندىقتان، اعزاداعى سۋ ازايادى. مىسالى، ۇشاقتا اۋا قۇرعاق. سول سەبەپتى، ستيۋاردەسسالار جولاۋشىلارعا سۋ، شىرىن جانە شايدى كوپ ۇسىنادى.
7. كەيبىر اۋرۋلار كەزىندە سۋ مولشەرىن ازايتۋعا تۋرا كەلەدى. ەگەر بۇيرەك قىزمەتى بۇزىلسا، جۇرەك ءوز جۇمىسىن دۇرىس اتقارا الماسا، ال اياق ءىسىپ كەتسە، وندا سۋدان باس تارتا تۇرعان دۇرىس.
8. ىشەتىن سۋدى دۇرىستاپ تاڭداڭىز. ارينە، قايناعان سۋدى دا ىشۋگە بولادى. الايدا، قايناعا سۋدا كوپتەگەن ەلەمەنتتەر جويىلىپ كەتەدى. سوندىقتان، ءدامسىز سۋدى كوپ ىشە المايسىز. بوتەلكەلەنگەن سۋدى ساتىپ الىڭىز. ءتىپتى، تابيعي سۋدى الىپ ىشسەڭىز، نۇر ۇستىنە نۇر. الايدا، كوكتەمدە قار ەرىگەن ساتتەگى سۋ دا ءقاۋىپتى بولۋى مۇمكىن. مۇنداي كەزدەردە ىشەك قىزمەتىن بۇزاتىن باكتەريالار كەزدەسەدى. سول سەبەپتى، سۋ ىشكەندە دە ساق بولىڭىز.
9. سۋدى كۇنى بويى ءىشىڭىز. ءبىر كۇننىڭ نورماسىن از ۋاقىتتا ورىندايمىن دەپ ويلاماڭىز. ويتكەنى، ول بۇيرەگىڭىزگە كۇش تۇسىرەدى. ال سالدەن سوڭ بۇل سۇيىقتىقتىڭ تەڭ جارتىسى سىرتقا كەتەدى دە، اعزاڭىزعا تاعى دا سۋ جەتپەۋى مۇمكىن.
كەڭەستەر confederation.kz سايتىنان الىندى.
