كىشكەنتايىنان ازاپ شەككەن الماتىلىق سۋرەتشى قىز ءوز شىعارمالارىن قوعامعا تانىستىردى - فوتو

وعان دينارانىڭ ۇساق مونشاقپەن كەستە تىگۋ ادىسىمەن جاسالعان 16 جۇمىسى قويىلدى. ولاردى ازىرلەۋگە 3 جىل ۋاقىتى كەتكەن. ويتكەنى دينارا بالالار سەرەبرالدى سال اۋرۋىنا شالدىققان.

سوندىقتان، ول قولىنىڭ دارمەنسىزدىگىنە بايلانىستى اياعىمەن كوپ نارسە جاساۋعا داعدىلانعان. ءتىپتى، اياعىمەن كەستە دە تىگە الادى.

 دينارا ءشارىپوۆا 1989 -جىلى 18- مامىردا الماتى وبلىسىندا تۋعان. 2011 -جىلى ەكونوميكا جانە قۇقىق كوللەدجىن تامامداپ، قاشىقتىقتان وقىتۋ جۇيەسى بويىنشا ماسكەۋدىڭ «سينەرگيا» قارجى-ونەركاسىپ ۋنيۆەرسيتەتىنە وقۋعا تۇسكەن. قازىر ول سوڭعى كۋرستا وقىپ ءجۇر جانە سونىمەن قاتار، الماتىداعى بانكتەردىڭ بىرىندە جۇمىس ىستەيدى.

دينارا بەس جاسىنان باستاپ سۋرەت سالۋدى، 14 جاسىنان باستاپ كەستە تىگۋدى ۇيرەنگەن. كورگەن قيىندىقتارى، شەككەن ازاپتارى ونىڭ وسى ونەرگە دەگەن تالپىنىسىنا توسقاۋىل بولا الماعان. ول مۇگەدەك بالالاردىڭ اتا-انالارى قاۋىمداستىعىنىڭ مۇشەسى. سوندىقتان، وسى ۇيىم ۇيىمداستىرعان كورمەلەرگە قاتىسىپ تۇرادى.

دينارانىڭ ايتۋىنشا، ءبىر جۇمىسقا ورتا ەسەپپەن 1,5 اي ۋاقىت جۇمسايدى ەكەن. جاسايتىنى - نەگىزىنەن ولار كىشىگىرىم فورماتتاعى تۋىندىلار، مۇندا باستى تاقىرىپ - انالىق سەزىم، ايەل بەينەسى، قۇستار جانە گۇلدەر.

«مەن دينارامەن العاش رەت تانىسقان سوڭ-اق، ونىڭ ءوز ماقساتتارىنا قول جەتكىزۋ جولىندا تاباندىلىق تانىتا الاتىندىعىنا كوزىم جەتتى. ول ارمانىنا قاراي باياۋ بولسا دا جاقىنداي تۇسەدى. ول ءبىلىم الۋعا قۇشتار بولدى. ەسەپشى بولۋدى ارماندادى. مىنە، قازىر بانكتە جۇمىس ىستەيدى. ول: «مەن سۋرەتشىمىن» دەپ جار سالمايدى. ونىڭ شىعارمالارى جان دۇنيەسىن، ىشكى قۇشتارلىعىن بىلدىرەدى. 2011 -جىلى وسى مۇراجايدا قاۋىمداستىقتىڭ وڭالتۋ ورتالىعىنىڭ بالالارىنىڭ كورمەسى ءوتتى. سوندا دينارانىڭ كەستەلەرى تولىعىمەن ساتىلىپ كەتتى. ەندى ونىڭ تاعى ءبىر ارمانى ورىندالسا ەكەن دەيمىن. ول وتباسىن قۇرۋدى ارماندايدى»، - دەدى كورمەنىڭ تالىمگەرى ناتاليا باجەنوۆا.

سونداي-اق ونىڭ ايتۋىنشا، جەكە كورمەنى وتكىزۋ «بويجەتكەن جانە تەڭىز» اتتى فيلمنىڭ ارقاسىندا تۋىنداپتى. ول فيلمدە دينارا باستى ءرولدى سومدايدى.

فيلمنىڭ ءتۇسىرۋ جۇمىستارى بيىل باستالعان. ءبىراق، قارجىلاندىرۋدىڭ جەتىسپەۋشىلىگىنە بايلانىستى ۋاقىتشا توقتاپ تۇر. فيلمنىڭ رەجيسەرى ازيز زايروۆ پەن مۇحامەد مامىربەكوۆ.

ايتا كەتەلىك، دينارانىڭ اتا-اناسى وعان بارلىق جاعىنان قولداۋ كورسەتىپ كەلەدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى