ۇكىمەت اقىسىز كاسىپتىك جانە تەحنيكالىق ءبىلىم بەرۋ بويىنشا جوسپاردى جاساقتاۋدا - ا. ءسارىنجىپوۆ
بۇل تۋرالى ق ر ءبىلىم جانە عىلىم ءمينيسترى اسلان ءسارىنجىپوۆ ءمالىم ەتتى.
«اعىمداعى جىلى تەحنيكالىق ماماندىقتار بويىنشا اقىلى بولىمدە ءبىلىم الىپ جاتقان ستۋدەنتتەرگە 5358 ورىنعا رەسپۋبليكالىق بيۋدجەتتەن مەملەكەتتىك تاپسىرىس ءبولىندى.
ق ر پرەمەر- ءمينيسترىنىڭ تاپسىرماسىمەن ۇكىمەت باسشىسىنىڭ ورىنباسارى داريعا نازاربايەۆانىڭ جەتەكشىل ەتەتىن ارنايى جۇمىس توبى قۇرىلدى. بۇل توپقا كوللەدج وقىتۋشىلارى، مەملەكەتتىك ورگاندار، جۇمىس بەرۋشىلەر، جەرگىلىكتى بيلىك وكىلدەرى ەنىپ وتىر. بۇل جۇمىس توبى قازاقستاندا كاسىپتىك ءبىلىمدى اقىسىز جۇيەگە كوشىرۋدىڭ ناقتى جوسپارىن جاساقتاۋى ءتيىس»، - دەدى ا. ءسارىنجىپوۆ ۆەدومستۆونىڭ القا وتىرىسىندا.
وسى ورايدا مينيستر ءتيىستى دەپارتامەنتتەرگە كاسىپتىك ءبىلىم بەرۋ سالاسىنداعى اقىسىز تەحنيكالىق ماماندىقتاردى انىقتاۋ بويىنشا جۇمىستاردى باستاۋدى جۇكتەدى.
«مەملەكەت باسشىسى 2017 - جىلى اقىسىز كاسىپتىك- تەحنيكالىق ءبىلىم بەرۋ جۇيەسىن ەنگىزۋدى تاپسىردى. ونىڭ زاڭدىق قامتاماسىز ەتۋ قولىمىزدا بار. ءتيىستى وزگەرىستەر «ءبىلىم بەرۋ تۋرالى» زاڭعا ەنگىزىلدى جانە ق ر پرەزيدەنتىمەن بەكىتىلدى»، - دەيدى ا. ءسارىنجىپوۆ.
ونىڭ ايتۋىنا قاراعاندا، ەلىمىزدە 800 گە تارتا كوللەدج بار. ولاردا قازىرگى ۋاقىتتا 183 ماماندىق بويىنشا وقىتۋ ءجۇرىپ جاتىر. ونىڭ ىشىندە 193 ماماندىق تەحنيكالىق، تەحنولوگيالىق جانە اۋىل شارۋاشىلىعى سالاسىندا.
«اقىسىز تەحنيكالىق جانە كاسىپتىك ءبىلىم بەرۋ ءبىرىنشى كەزەڭدە كەلەسىدەي ساناتتارعا تارالادى. ءبىرىنشىسى، جۇمىسشى ماماندىقتار بويىنشا وقىتۋ %100 مەملەكەت تاپسىرىسى بويىنشا جۇرەتىن بولادى. قازىرگى ۋاقىتتا وسى ماماندىقتار بويىنشا وقىپ جاتقان 97 مىڭ ادامنىڭ 93 مىڭى تەگىن وقۋدا. ەندى ول ساندى %100 جەتكىزۋ ءۇشىن 4 مىڭ ادامدى اقىسىز جۇيەگە كوشىرۋ كەرەك»، - دەدى مينيستر.
- ەكىنشىدەن، جۇمىسشى بىلىگى جوق مەكتەپ وقۋشىلارى جىل سايىن كوبەيۋدە. جىل سايىن 20 مىڭ تۇلەك جوعارى وقۋ ورىندارى مەن كوللەدجدەرگە تۇسپەيدى، 34 مىڭى كوللەدجدەردەن، 36 مىڭى ۋنيۆەرسيتەتتەردەن شىعارىلادى ەكەن. اقىسىز كاسىپتىك جانە تەحنيكالىق ءبىلىم بەرۋگە وسىلار تارتىلادى. سونىمەن قاتار ءوزىن- ءوزى قامتىعان، جۇمىسشى بىلىكتىلىگى جوق 29 جاسقا دەيىنگى ازاماتتار دا بار. ولاردى «جۇمىسپەن قامتۋ-2020» اياسىندا وقىتۋ كوزدەلۋدە».
اۆتور: جاسۇلان جولدىبايەۆ
