استانادا «مىڭ بالا» جوباسى مارەسىنە جەتتى
قازاقستان حالقى اسسامبلەياسىنىڭ قولداۋىمەن وتكەن شارا اعىمداعى جىلدىڭ اقپان ايىندا باستالىپ، رەسپۋبليكانىڭ بارلىق وڭىرلەرىن قامتىعان بولاتىن.
«مىڭ بالا» - ءتۇرلى ەتنيكالىق توپتاردىڭ مەكتەپ جاسىنا دەيىنگى بالالارعا جانە مەكتەپ وقۋشىلارىنا قازاق ءتىلى مەن مادەني ورتاسىنا بوي ۇيرەتىپ، مەملەكەتتىك ءتىلدى مەڭگەرۋىنە، قازاقتىڭ تاريحى مەن مادەنيەتىن، سالت- داستۇرلەرى مەن ادەت- عۇرىپتارىن بويىنا ءسىڭىرۋ مۇمكىندىكتەرىن كوزدەگەن ەدى. ونىڭ اياسىندا تىلدەردى جەدەلدەتە وقىتۋدىڭ «ءتىل دارىن» ادىستەمەسى بويىنشا «سيقىرلى قالام» يننوۆاتسيالىق ادىستەمەلىك كەشەنىنىڭ جانە باسقا دا وزىق ءتىل ۇيرەتۋ قۇرالدارىنىڭ كومەگىمەن ءتۇرلى ەتنوستىق توپتاردىڭ بالالارىنا مەملەكەتتىك ءتىلدى ۇيرەتۋ قاراستىرىلعان بولاتىن.
ۇيىمداستىرۋشىلاردىڭ ايتۋىنا قاراعاندا، «مىڭ بالا» جوباسىنىڭ باعدارلاماسى «مادەني- تىلدىك بوي ۇيرەتۋ» حالىقارالىق تاجىريبەسىنىڭ ناتيجەلەرىن ەسكەرە وتىرىپ قۇرىلعاندىقتان، بارلىق قاتىسۋشىلاردىڭ مادەني جانە تىلدىك ورتاعا تولىعىمەن ۇيىسۋىنا مۇمكىندىك بەرىلدى. رەسپۋبليكا كولەمىندە بارلىق دەرلىك وڭىرلەردە مەملەكەتتىك تىلدە ءتۇرلى كونكۋرستار مەن سايىستار جۇزەگە اسقان.
اتاپ ايتقاندا، جوبا اياسىندا استانا جانە الماتى قالالارى، وبلىس اكىمدىكتەرىمەن ۇيىمداستىرىلعان شارالار بويىنشا 235 مىڭ 71 بالا قاتىسقان. قازاق تىلىنە ۇيرەتۋدىڭ اۆتورلىق كۋرستارى بويىنشا 7 مىڭ 863 ءىس شارا جۇزەگە استى. تۇتاستاي العاندا، «مىڭ بالا» جوباسى اياسىندا 44 مىڭ 497 بالا مەملەكەتتىك ءتىلدى ەركىن ءارى ساپالى مەڭگەرۋگە قول جەتكىزىپ وتىر.
تاۋەلسىزدىك كۇنى قارساڭىندا ۇيىمداستىرىلىپ وتىرعان «مىڭ بالا» جوباسىن سالتاناتتى قورىتىندىلاۋ شاراسى اياسىندا قازاقستان حالقى اسسامبلەياسىنىڭ مەملەكەتتىك ءتىلدى جانە ەتنوستار تىلدەرىن دامىتۋ سالاسىنداعى يننوۆاتسيالىق جاڭالىقتارىنىڭ كورمەسى، «الەم قادىرلەگەن ەلباسى» شەت مەملەكەتتەردىڭ جوعارى ناگرادالارىنىڭ كورمەسى، «قازاقستاندا پرەزيدەنتتىك ينستيتۋتتىڭ قالىپتاسۋى مەن دامۋى» ينتەراكتيۆتىك كورمەسى دە وتكىزىلۋدە.
تۇتاستاي العاندا، جوبانىڭ ناتيجەسىندە «مىڭ بالا - تاتۋلىق تىرەگى!» اتتى دەرەكتى فيلم تۇسىرىلمەك. بۇدان بولەك، جىل سايىن مەملەكەتتىك ءتىلدى ەركىن مەڭگەرىپ شىققان وزگە ۇلت وكىلدەرىنەن تۇراتىن مىڭ مەكتەپ وقۋشىسى - قازاق تىلىندە ەركىن سويلەيتىندەردىڭ جانە مەملەكەتتىك ءتىلدى ۇيرەتۋدى ناسيحاتتايتىن ەرىكتىلەردىڭ قاتارىندا بولادى.
ايتا كەتەيىك، «مىڭ بالا» رەسپۋبليكالىق مادەني- اعارتۋشىلىق جوباسىن قورىتىندىلاۋ جيىنى بارىسىندا «شەشەندىك ونەر» ، «كەمەڭگەر» ، «ىنتىماعى جاراسقان تۋعان ولكەم» باعىتتارى بويىنشا كونكۋرستاردىڭ جەڭىمپازدارى دا ماراپاتتالدى.
اۆتور: قانات مامەتقازى ۇلى
