ارالدى قۇتقارۋ قورى شالعاي اۋىلدارعا تەحنيكالار الىپ بەردى
اتالمىش قور اۋدانداعى كوركەيتۋ-كوگالداندىرۋ جۇمىستارىن جۇرگىزۋ ءۇشىن قاجەتتى تەحنيكالار مەن بارلىق مەكتەپتەرگە شاعىن جىلۋ قازاندىعىن الىپ بەردى.
سوڭعى 3 جىلدىڭ وزىندە اۋدانداعى شەت ايماقتار بولىپ سانالاتىن اۋىلدارعا حالىقتىڭ تۇرمىستىق الەۋەتىنە اسەر ەتەتىن تەحنيكالاردى قوردىڭ ەسەبىنەن الىپ بەرۋدە. 2013-جىلى ساربۇلاق اۋىلدىق وكرۋگىنە جەدەل-جاردەم اۆتوكولىگىن، جانە تراكتور تىركەمەسى تاپسىرىلسا، وتكەن جىلى تاسارىق اۋىلدىق وكرۋگىنە تراكتور تىركەمەسىمەن بەرىلدى.
بۇل جۇمىستار بيىل دا ءوز جالعاسىن تابۋدا. «حالىقارالىق ارالدى قۇتقارۋ قورى» اكىمگەرشىلىك ءبولىمىنىڭ باسشىسى دوسجان نۇرباتىروۆ شاكەن اۋىلدىق وكرۋگىنە قور ەسەبىنەن تەحنيكا كىلتىن تابىستادى.
ءوز كەزەگىندە د. نۇرباتىروۆقا اۋدان اكىمى ناجمادين شامۇراتوۆتىڭ العىس حاتى تابىستالدى. ال كەلەر جىلى شالعايداعى مال شارۋاشىلىعىمەن اينالىساتىن قوجالىقتارعا ەسكى قۇدىقتاردى جوندەۋگە قولداۋ كورسەتىلمەك.
اۆتور: ەلۋباي اۋەزوۆ
