رەسەيلىكتەر بەلارۋس پەن قازاقستاندى سەنىمدى سەرىكتەس دەپ سانايدى

مۇنى قوعامدىق پىكىردى زەرتتەۋدىڭ بۇكىل رەسەيلىك ورتالىعى ساۋالناماسىنىڭ مالىمەتتەرى ايعاقتايدى. سونىمەن بىرگە بۇل ەكى مەملەكەتتىڭ باسشىلارى رەسەيلىكتەر سەنەتىن تۇلعالار رەيتينگىندە جانە ورىس ءتىلدى تۇرعىندار قۇقىعىنىڭ ساقتالۋىن قامتاماسىز ەتۋ بويىنشا رەيتينگتە كوش باستاپ تۇر، دەپ حابارلادى ر ي ا نوۆوستي.

قوعامدىق پىكىردى زەرتتەۋدىڭ بۇكىل رەسەيلىك ورتالىعى بەيسەنبى كۇنى رەسەيلىكتەردىڭ ت م د ەلدەرىنە دەگەن قارىم-قاتىناسى بويىنشا كەزەكتى زەرتتەۋلەرىنىڭ ناتيجەلەرىن ۇسىندى. الەۋمەت تانۋشىلاردىڭ ءتورت سۇراعىنىڭ اربىرىنە رەسپوندەنتتەر ەڭ كوبى ءۇش جاۋاپ قانا بەرە الدى.

«رەسەيلىكتەردىڭ بەلارۋس پەن قازاقستانعا دەگەن سۇيىسپەنشىلىگى جىلدان-جىلعا ارتىپ كەلەدى. وسىلايشا، التى جىل قاتارىنان رەسەيلىكتەر ت م د- عا مۇشە مەملەكەتتەردىڭ اراسىندا وسى ەكى ەلدى قول جەتكىزگەن جەتىستىكتەرى بويىنشا كوش باسىنا قويىپ كەلەدى»، - دەلىنگەن زەرتتەۋ ماتەريالدارىندا.

وسىلايشا، 2015-جىلى ساۋالناماعا قاتىسقانداردىڭ %72  بەلارۋستى، %50 قازاقستاندى ءساتتى دامىپ كەلە جاتقان ەل دەپ سانايدى. وتكەن جىلى رەسپوندەنتتەردىڭ سايكەسىنشە %66 جانە %45 وسىنداي جاۋاپ بەرگەن. ايتا كەتۋ كەرەك، زەرتتەۋ العاش رەت 2010-جىلى جۇرگىزىلدى. ول كەزدە رەسپوندەنتتەردىڭ %31 بەلارۋستىڭ قول جەتكىزگەن جەتىستىگى مول دەپ ەسەپتەسە، %34 قازاقستاندى العا شىعاردى.

بەلارۋس پەن قازاقستان ليدەرلەرى دە ت م د ەلدەرىنىڭ باسشىلارى اراسىنداعى رەيتينگتىڭ كوشىن باستاپ تۇر. ساۋالناماعا قاتىسقانداردىڭ باسىم بولىگى (%63) بەلارۋس پرەزيدەنتى الەكساندر لۋكاشەنكوعا سەنەتىنىن (وتكەن جىلى - %61)، سونىمەن قاتار قازاقستان پرەزيدەنتى نۇرسۇلتان نازاربايەۆقا (%45 رەسەيلىك، وتكەن جىلى - %38) سەنەتىنىن ايتتى. ت م د ەلدەرىنىڭ وزگە پرەزيدەنتتەرىنە ساۋالناماعا قاتىسقانداردىڭ وننان ءبىر بولىگىنەن ازداۋ رەسپوندەنتتەر داۋىس بەردى.

ساۋالناما 2015-جىلى 22-23- قاراشا ارالىعىندا رەسەيدىڭ 46 وڭىرىندە جۇرگىزىلدى. وعان 1600 ادام قاتىستى. ستاتيستيكالىق دالسىزدىك %3,5 دان اسپايدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى