ميلليون دا اقشا ما؟
از جازسا دا بارىنشا ءدامدى جازاتىن ارداقتىڭ اڭگىمەلەرى ەزۋىڭىزگە ەرىكسىز كۇلكى ۇيالاتادى. سالدەن سوڭ مىرس ەتە قالىپ، تاعى ءبىرازدان كەيىن اينالاڭىزداعى ادامداردى ۇمىتىپ، قارقىلداپ كۇلە باستايسىز. قىسقاسى، وقىعان ادامنىڭ ءىشىن ۇستاپ قۇلاي كەتەتىنىنە ءبىز كەپىل! ءبىز تومەندە وسى كىتاپقا قازاقتىڭ بەلگىلى ساتيريگى كوپەن امىربەك جازعان العى ءسوز بەن ارداقتىڭ بىرنەشە اڭگىمەسىن ۇسىنىپ وتىرمىز.
ەسىمى ەكى بۋىننان تۇراتىن ارداق شاكىرتىم قانداي قالامگەر؟ «ادەبيەت - اردىڭ ءىسى» دەگەن قاعيداعا ارقا سۇيەسەك، ول ەڭ اۋەلى «ار» - عا «داق» تۇسىرمەۋدى ويلاعان ءھام سونى اداستىرماس تەمىرقازىق ەتىپ ۇستانعان قىز. جارىنا ادال بولعان اياۋلى انالارىمىزداي جانرىنا ادال. جازعان دۇنيەلەرىنىڭ كولەمىنە ەمەس، كوركەمدىگىنە كوڭىل بولەتىندىگى كورىنىپ تۇرادى.
ونىڭ «بىدىق اعاي»، «ءۇتىر» سياقتى سىقاق اڭگىمەلەرى ساياسي- ساتيرالىق «ارا» جۋرنالىندا وسىدان وتىز جىلداي بۇرىن جارىق كورگەنىن بىلەم. وسى ۋاقىت ارالىعىندا ارداقتان باسقا پىسىق بىرەۋ بولسا، نەشە كىتاپ شىعارىپ تاستار ەدى-اۋ. قازاقى قالجىڭنىڭ قايماعىن قالقىپ بەرەتىن ەلگە ءماشھۇر قالتاي مۇحامەدجانوۆ ازۋىن ايعا بىلەگەن «ارادا» رەداكتور بوپ تۇرعاندا ارداقتىڭ «قۇدا بالا»، «توقال ەشكى» دەگەن ەزۋ تارتار ەكى اڭگىمەسىن جۋرنال بەتىنەن وقىپ: «ويپىرماي، ايەل ادامنىڭ يۋمورى قانداي نازىك!» - دەپ سۇيسىنگەنى كوز الدىمىزدا. «از جازسا دا ساز جازادى!» دەپ ريزاشىلىق بىلدىرگەنى سونداي، ارداقتى «ارا» جۋرنالىنا قىزمەتكە قابىلداعان. «ەشتەن كەش جاقسى» دەيدى عوي، قاشاندا وزەكتىلىگىن جويمايتىن ورەلى ماسەلەلەردى قوزعاعان اڭگىمەلەرىنىڭ باسىن بىرىكتىرىپ، «ءۇريت، سوق!» اتتى كىتابىن شىعارىپ جاتقانىنا دا تاۋبە.
تالايدى تامساندىرعان «تاماشا» ويىن- ساۋىق وتاۋىنىڭ ورتانقولداي ازىلكەش ءارتىسى ليديا كادەنوۆا اپكەسى ارداقتىڭ «قۇدا بالا»، «توقال ەشكى»، «قۇدايعا شۇكىر» سياقتى مىسقىلعا تولى مونولوگتارىن ساحنادا ورىنداعاندا، سالاۋاتتى كۇلكىگە سان-مىڭ كورەرمەن دۇرىلدەتىپ قول سوققانى ەسىمدە. ازىلكەش قىز اڭگىمەلەرىنىڭ تاقىرىبى ءار الۋان ءارى شىنايى. قارايعان كەمشىلىكتەردى قالت جىبەرمەي قاعىپ تۇسىرەدى. قوعامداعى «داقتاردى» توتيايىن تىلىمەن ءجىبىتىپ، «حيمچيستكادان» شىعارعانداي تازالاپ تاستايدى.
ۇزىن ءسوزدىڭ قىسقاسى، ارداق ادەبيەتتىڭ تابالدىرىعىن جاۋاپكەرشىلىكپەن اتتاپ، جان- جاقتى دايىندىقپەن كەلگەن. امبەباپ ازىلكەش. قالامىنىڭ جەلى بار، اۋزىنىڭ ەبى بار جۋرناليست، ونەرتانۋشى رەتىندە دە تانىمال تالانت. ءارىسى رەسپۋبليكا، بەرىسى اقتوبە ءوڭىرىنىڭ مادەنيەتى مەن ونەرىندە ويىپ الار ورنى بار تۇلعالار تۋرالى 2013 -جىلى باسپادان شىققان «اتاق قۋماعان تالانتتار» اتتى كىتابى سونىڭ ءبىر دالەلى.
اپتاسىنا التى كويلەك اۋىستىرىپ كيسە دە، اجارى اشىلا قويمايتىن قىز- كەلىنشەكتەر بولادى. ايتپاعىم نە؟ الدا- جالدا كوركەم دۇنيەنى كويلەككە تەڭەسەك، ارداق قوناقبايەۆا ءوزىنىڭ ەكى «كويلەگىمەن- اق» كوپشىلىك وقىرماننىڭ نازارىن اۋداراتىن ناعىز سىقاقشى بيكەش.
كوپەن امىربەك، قازاقستاننىڭ ەڭبەك سىڭىرگەن قايراتكەرى.
ميلليون دا اقشا ما؟
وبالاي تىپ-تىنىش قانا مەكتەبىنە بارىپ-كەلىپ ءجۇر ەدى. بەكەر جۇرگەن جوق، باياعىشا ءولىپ- تالىپ بالا وقىتادى. مەكتەپ اكىمشىلىگىنىڭ كوزىنە تۇسكىسى- اق كەلەدى. ەندى قايتسىن، موينىندا پالەنباي نەسيەسى بار. «ەسەكتىڭ ەڭبەگى ادال، ەتى ارام» دەمەكشى، وبالايدىڭ ەڭبەكقورلىعىن باعالاپ جاتقان تاعى ەشكىم جوق. جاعاڭنان الىپ تۇرعان الەمدىك داعدارىسىڭ اناۋ. ديرەكتور دا قيت ەتسە: «مەنىڭ جۇمىس ىستەۋ ءادىسىم ۇناماسا، بارا بەرىڭدەر، ەشكىمدى ۇستامايمىن» دەپ كۇندە شالقايادى.
بۇگىندە كۇيەۋىنىڭ قاھارىنان قورقاتىن ايەل زاتىن شاممەن ىزدەپ تابۋ قيىن. وبالايدىڭ ايەلىنىڭ دە وتاعاسىنا ءامىرى ءجۇرىپ-اق تۇر. «جۇرتتىڭ ءبارى كرەديتپەن ءۇي الىپ، دۇنيە الىپ، توي جاساپ جاتىر» دەپ بوي بەرمەي، ەكى-ءۇش جىل بۇرىن سۇراۋى جوق دۇنيەدەي بىرنەشە نەسيەنى قاتار العىزعان. الارىن الدى، ازابىن باياعى موينى جۋان وبالاي تارتىپ ءجۇر. بالا وقىتام دەپ ابدەن جۇقارعان جۇيكەسىن نەسيە كەمىرىپ جەپ قويدى. قارىزىن تولەيتىن كۇن دە زىرىلداپ جەتىپ كەلەدى دە تۇرادى. تولەمەسەڭ، توبەڭدى وياتىن كىسىلەرى دە دايىن. ءتىپتى ء«ۇيىڭىزدى ساتۋعا قويامىز» دەپ جان القىمنان الادى. جانى قىدىرعان وبەكەڭ تاپقانىن بىرىنە جەتكىزسە، بىرىنە جەتكىزە الماي شاشىن جۇلعانداي بولادى. وبالاي بايعۇس سودان قيالي بولدى ما، سوڭعى كەزدە ەسى- دەرتى اقشاعا اۋدى. «شىراعىم، اقشا دەگەن ءقازىر اۋانى اۋىستىرىپ تۇر عوي، قولىڭدا ءبىر تيىنىڭ بولماسا سەنى كىم ادام دەيدى؟» دەپ ءپالساپا سوعاتىن بولدى. اقشا تۋرالى اڭگىمەدەن باسقانى تىڭدامايدى. حال سۇراعان كىسىنى: ء«ۇش كرەديتى بار كىسىدەن نە اقىل- ەس سۇرايسىڭ، قويشى ەرىكپەي!» دەپ قايتارىپ تاستايدى. توي- تومالاققا بارۋدان قالدى. ونىسى العان جارىنا جاقپايدى. ەرتەلى- كەش: «اياق استىنان اقشا وزگەرىپ، قارىزىمىزدان قۇتىلىپ كەتسەك قوي، شىركىن!» دەپ ارماندايدى. وبالاي ايتتى ەكەن دەپ قايدان اقشا وزگەرە قويسىن. ء«تىپتى اسپان اينالىپ جەرگە تۇسسە دە، ۇستىمدەگى ءۇيىمدى بانككە بەرە المايمىن!» ءوز- وزىنەن كۇبىرلەپ سويلەپ جۇرەتىن بولدى. ءبىر كۇنى ۇرىنارعا قارا تاپپاي جۇرگەن وبالاي ءۇشىن كۇتپەگەن جاڭالىق بولدى.
جوعارى جاقتاعىلار «مۇعالىمدەرگە قىلداي ەتىپ ءبولىنىپ بەرىلسىن» دەپ وباعاڭ جۇمىس ىستەيتىن ۇزدىك مەكتەپكە ميلليون تەڭگە ءبولىپتى. سول ميلليوندى ەستىگەلى وبالايدان دا، مەكتەپ ديرەكتورىنان دا، مۇعالىمدەردەن دە مازا كەتتى.
وبالاي: «ويپىرماي، وسى مەكتەپكە ءبىر كىسىدەي ەڭبەگىم ءسىڭدى عوي، نەسيەمنىڭ ءبىر- ەكەۋىن جاۋىپ تاستاۋعا جەتەتىن اقشا تيسە بولار ەدى- اۋ!» دەيدى. مەكتەپتەن كەلەدى دە، ميلليون تەڭگەنى ۇجىمىنداعىلاردىڭ سانىنا ءبولىپ كورىپ: «اۋ، مىناۋىڭ دىم ەمەس قوي، ميلليونەر مەكتەپ دەپ الدەعانداي قىلىپ جاتقان اقشاسى وسى ما؟! ءبۇيتىپ بەرگەن اقشاسى بار بولسىن! ءار مۇعالىمگە ءبىر ميلليوننان بەرمەگەسىن، سونى دا جارىلقادىم دەپ وتىر- اۋ!»» دەپ بۇرقان- تالقان بولادى. ءالى قولىنا تيمەگەن اقشانى ساناپ وتىرعان كۇيەۋىنە قاراپ ايەلى ءزىبيلا سىلق- سىلق كۇلەدى:
- نەمەنەگە تاقپاي سىلدىرلاپ وتىرسىڭ؟ سول اقشانى سەندەرگە ديرەكتور تاتىرا قويادى دەگەن. «اتىمدى اتا دا، سىباعامدى يتكە سال» دەمەي مە؟ اتاعى سەندەردىكى، اقشاسى سولاردىكى ەمەس پە؟
- نەمەنە، مەنىڭ باستىعىمدى يتكە تەڭەپ وتىرسىڭ با؟ اباي اتام ء«وزى دە يت، وزگەنى دە يت دەپ ويلار» دەگەن جوق پا ەدى، وزىڭە قاراپ تون پىشپە! - دەپ ايەلىنە تاپ بەردى.
- سول اقشا بار جىرتىعىڭدى بۇتىندەيتىندەي نە بولدى سونشا؟ كرەديتتەن ولگەن كىسىنىڭ مولاسىن كورگەنىم جوق.
وبالايدىڭ قانى باسىنا شاپشىدى:
- سەن كورمەسەڭ، مەن كوردىم. كۇندە ەستىپ، كورىپ- ءبىلىپ جۇرگەن جوقپىز با؟ نەسيەسىن تولەي الماي بىرەۋلەر اسىلىپ، ەكىنشى بىرەۋلەرى ءوزىن ورتەپ، ۇشىنشىلەرى توعىز قابات ۇيدەن قۇلاپ ءولىپ جاتقان جوق پا؟ ۇيىنەن ايىرىلىپ، باسپاناسىز قاڭعىباستار پانالايتىن ءۇيدى جاعالاپ جۇرگەندەر قانشاما؟ ۇيدە وتىرىپ الىپ ەرىكپەشى وسى؟
- توعىز نەسيە الىپ توكەڭدەر دە ولمەي ءجۇر عوي. سەن- اق اسان قايعىنى سوعاسىڭ دا وتىراسىڭ، - دەپ جەڭىستىك بەرمەيدى العان جارى.
«كۇلتوبەنىڭ باسىندا كۇندە جيىن» دەگەندەي، مەكتەپتە كۇندە جينالىس. ديرەكتوردىڭ ايتاتىنى: «جايدان- جاي ميلليونەر مەكتەپ اتانا قالدىق دەيسىڭدەر مە؟ ول ءۇشىن مەكتەپ اكىمشىلىگى نە ىستەمەدى؟ جۇرتتىڭ ءبارىنىڭ كوڭىلىن تابامىز دەپ نەشە اي الاشاپقىن بولىپ جۇگىردىك. ونى سىزدەر قايدان بىلەيىن دەپ ەدىڭىزدەر؟ جالپى بۇل قارجى مۇعالىمدەرگە بەرىلۋى ءتيىس بولعانىمەن، ورتاق ىسكە جۇمسايتىن شىعارمىز. بەس- ون مىڭ تەڭگەدەن ەشكىم بايىپ كەتپەيدى، نە بولماسا ەشكىم كەدەيلەنىپ قالمايدى». مۇعالىم بايعۇستار بۇل ءسوزدى ىشتەي ۇناتىپ وتىرماسا دا، «ا» دەپ اۋىز اشا المايدى. ديرەكتور - قاشاندا مەكتەپتىڭ قۇدايى. ونىڭ ءسوزى - جازىلماعان زاڭ.
كەلەسى جينالىستا ديرەكتوردىڭ كوپ ورىنباسارىنىڭ ءبىرى بىلايشا سايرايدى: ء«تارتىپ اۋەلى وزىمىزدەن باستالادى. سوندىقتان تارتىپكە اسا قاتتى ءمان بەرەتىن بولامىز. جۇمىسقا جارتى ساعات بۇرىن كەلىپ، دايىندالىپ، ساباق جوسپارلارىڭىزدى بەكىتتىرىپ الىڭىزدار. ءالى كۇنگە توقساندىق جوسپارىن تاپسىرماي جۇرگەن مۇعالىمدەر بار. كىم جۇمىستان كەشىگەدى، كىم جوسپاردى ۋاقتىلى تاپسىرمايدى، ەشتەڭە ايتپايمىز، تەك جالاقىسىنان ۇستاپ قالامىز» . بۇل سوزدەن مۇعالىمدەردىڭ ەسى شىعىپ كەتە جازدايدى. كۇندە وسىلاي، مۇعالىمدەرگە قارسى پسيحولوگيالىق شابۋىل ۇدەپ بارادى. ولاردىڭ دا كوڭىلدەرى كۇپتى. جۇيكەسى جۇقارعان بىرەۋى: «ميلليون الىپ قارىق بولامىز دەپ جۇرگەندە، باسىمىز ارىلمايتىن پالەگە قالدى عوي. جىل سايىن اعىمداعى جوندەۋدەن ءوتىپ جاتقان مەكتەپتىڭ جىرتىق- تەسىگى بىتپەيدى ەكەن» دەپ تاۋسىلادى. ء«اي، وسى جينالىس تەگىن جينالىس ەمەس، ديرەكتوردىڭ ويى بەلگىلى بولدى. قۇرىسىن، سول ميلليوندى الماعاندا دا ولگەن جوقپىز عوي، ساداقا» دەپ ساۋەگەيلىك جاساپ، قاراداي اقشادان باس تارتىپ، «اش قۇلاقتان تىنىش قۇلاق» دەپ جۇرگەندەر دە جەتەدى.
وبالاي مەكتەپتە ەشكىمگە ەشتەڭە ايتا المايدى، ۇيىنە كەلەدى دە، جوق نارسەنى ىلىك قىلىپ ايەلىمەن، بالا- شاعاسىمەن شاتىسادى. قۇددى ميلليون تەڭگەنى ءبولىپ بەرمەي وتىرعان سولار سياقتى. «نەگە بەرمەيدى، وكىمەت مۇعالىمدەرگە ءبولىپ بەر دەگەن اقشانى سونشا اڭگىمە قىلىپ، بەرەدى. بەرمەي كورسىن وسىدان، ەكى اياعىن اسپاننان كەلتىرىپ، ءمينيستردىڭ سايتىنا جازايىن» دەپ وزىنەن- ءوزى بۇرقىلداپ وتىرادى. العان جارى ءزىبيلا بولسا: «ميلليون سوققىر، ابدەن مازامىزدى الدىڭ عوي، بەرمەسە قويسىن ءارى، ديرەكتورعا قارسى كەلمە. جۇمىستان شىعىپ قالعىڭ كەلىپ ءجۇر مە؟!» دەپ كەييدى. جانە تاعى «قازىر ميلليون دا اقشا ما؟ » دەپ مۇرنىن شۇيىرەتىنىن قايتەرسىڭ.
ءزىبيلا شىركىن اۋليە عوي، اقىرى سونىڭ ايتقانى كەلدى. ديرەكتور دەگەنىنە جەتتى. كۇنى- ءتۇنى قۇلاق ەتتەرىن جەپ ءجۇرىپ، مۇعالىمدەردى اقشانى الماي- اق، ۆەدوموسقا قول قويىپ بەرەتىن جاعدايعا جەتكىزدى، كوزدەرىنە كوك تيىندى كورسەتپەدى. سول سول ەكەن، جينالىس تا ساپ تىيىلدى. ءمۇعالىم تۇگىل وقۋشىلاردىڭ ءتارتىبى جايىنا قالدى.
بۇل سوققى وبالايدى ويسىراتىپ كەتتى. اندا- مىندا ارىزدانايىن دەسە، ءزىبيلاسى زار قاعادى. ىنىسىمەن تەلەفون ارقىلى ۇرىستى: «سەنىڭ تانىمايتىن ادامىڭ جوق، ءبىر مىقتىعا ايتقىزىپ انا ديرەكتوردان اقشامدى الىپ بەر!». ءىنىسى: «الماعان اقشاڭا ۆەدوموسقا قول قويعانىڭ نە؟ «جۇرت قويدى» دەپ قويدىم دەيدى. نە، جۇرتتىڭ ءبارى ءولىپ جاتسا، سەن دە ولەسىڭ بە؟ ديرەكتور كۇشتەپ قولىڭنان ۇستاپ تۇرماعان شىعار. ەندى سوتقا بەرسەڭ دە، ول اقشا ساعان جوق» ، - دەپ ماڭايلاتپايدى.
كەشە وباعاڭ اۋرۋحاناعا ءتۇسىپتى. ءحالى كىسى ماقتارلىق ەمەس دەيدى. اۋزىنا «ميلليون، ميلليون، ميلليون» دەگەننەن باسقا ءسوز تۇسپەيتىن كورىنەدى. شىنىندا، وبالايعا وبال- اق بولدى.
ال الگى ميلليونەر مەكتەپتىڭ ديرەكتورى تاعى ءبىر ماراپاتقا يە بولىپ، دۋبايدا دەمالىپ ءجۇر دەيدى. ال الگى ايتقىش ورىنباسارى تۇركيادان زات اكەلۋگە كەتىپتى.
قارا سۋدى تەرىس اعىزۋ
جىلدىڭ ءتورت مەزگىلىندە دەپ ارتىق ايتپاي- اق قويايىن، ءبىراق قاي ۋاقىتتا دا ۇستىمنەن تۇسپەيتىن ءبيتتىڭ قابىعىنداي جۇقا كۇرتەشەممەن بۇرسەڭ قاعىپ كەلە جاتقام.... «مەملەكەتتىك تەكسەرۋ كوميتەتى» دەگەن مەكەمەنىڭ تۇسى ەكەن. الگىندە عانا سول جەردەن ء«ىشىپ قويدى، جەپ قويدىدان» تۇراتىن فاكتىلەردى الىپ، پاپكىمە سالىپ، جەمقورلاردى جەرگە تىعىپ جىبەرەردەي جۇلقىنىپ شىققام. كوشەدە «كەدەيلىك- كەمشىلىك ەمەس» دەپ كەلەتىن ءبىر اقىننىڭ ولەڭىن سىردىڭ ماقامىنا سالىپ تەرمەلەتىپ كەلەم. بىردەڭەنى ىڭىلداپ ايتىپ جۇرمەسەم ءىشىمنىڭ كەبەتىن ادەتى... كەنەت قارسى الدىمنان ەسەگىنە ەمەس، ەكى اياعىنا مىنگەن قوجەكەڭ شىعا كەلدى. سالەمىمدى سەلقوس الدى. كادىمگى كەڭ قولتىق، اقجارقىن قوجەكەڭە ءتىپتى ۇقسامايدى.
- ءيا، باياعى يىعى ءومىرى بۇتىندەلمەگەن جۇگىرمەك جۋرناليسپىسىڭ؟! قاشان اۋىزدارىڭ اققا ءتيىپ، ادام بولاسىڭدار وسى؟ - دەپ، مۇسىركەگەن كەيىپپەن تۇلا بويىمدى كوزىمەن ءتىنتىپ شىقتى. - ارينە، ء«اشاپ قويدى، جەپ قويدى» دەپ كورىنگەندى كۇندەپ، بالە ىزدەي بەرسەڭدەر، كوگەرەرسىڭدەر ءالى- اق!
- قوجەكە- اۋ، ءسىز دە وزگەرەيىن دەگەنسىز بە؟ ءبىز دەگەن ادىلەتتىڭ سويىلىن سوعۋشىلار ەمەسپىز بە؟، - دەپ، دالباسالاپ داۋ ايتا باستاپ ەدىم، قوجەكەڭ قولىنداعى تاياعىمەن يىعىمنان ءتۇرتىپ توقتاتتى.
- قىزىل ءسوزىڭدى قالتاڭا سالىپ قوي. مەن وزگەرمەيتىن نەمەنە، ەكى اياقتى، جۇمىر باستى پەندە ەمەسپىن بە؟ ! ونىڭ ۇستىنە ەسەگىمدى ءبىر كوممەرسانت «دجيپىمەن» قاعىپ ءولتىرىپ، جاياۋ قالىپ كۇيىنىپ جۇرسەم...
- ويپىرماي، قوجەكە- اي، ەستىمەپپىز. كەشىرەرسىز. ەسەگىڭىزدىڭ ارتىنىڭ قايىرىن بەرگەي! وبال بولعان ەكەن. سول ەسەگىڭىزدى قاققان الىپساتاردى سوتقا بەرىپ، ءبىر ەمەس، بىرنەشە ەسەكتى ءوندىرىپ الۋعا حاعىڭىز بار عوي!
- ءتۇۋ، ونبەيتىن داۋدى داۋلايتىن داڭعوي ەكەنسىڭ! كوممەرسانت ەسەككە مىنگەن كىسىنى مەنسىنە مە ەكەن؟ سوتقا دا بەرگەم، سول سويقاننىڭ ءسوزىن سويلەپ كەتتى. زەينەتاقىمدى پاراعا بەرىپ، باسىمدى ارەڭ اراشالاپ الدىم.
- ماشينە ەسەكتى ەمەس، ەسەك ماشينەنى بارىپ سوققان بولىپ شىقتى دەسەڭىزشى.
- جۇگىرمەك- اۋ، ەندى نە دەپ تۇرمىن مەن. قۇرىسىن، ون ەسەك الىپ بەرسە دە وزىمدىكىندەي قايدان بولسىن. سوتىڭدى سىناپ كورگەنىم عوي انشەيىن. بۇگىندە اقشالىنىڭ عانا ءسوزى وتەدى، شىراعىم. ايتپاقشى، مەن كەتەيىن. مىنا ءبىر ارزان اقىلىمدى قۇلاعىڭا ىلە كەت! ءوسىپ- ونەم دەسەڭ، قارا سۋدى تەرىس اعىزا ءبىل! كەڭەستىك پسيحولوگيادان ارىل، بايعۇس بالا! - دەدى دە، قوجەكەڭ قايىرىلماستان قايقايدى.
قوجەكەڭنىڭ ءپالساپاسى ويىمدى ايران- اسىر قىلدى:
«شىنىندا، بىزدەر بىرەۋ بايىپ بارا جاتسا، تابانىمىزبەن شوق باسقانداي باجىلدايمىز كەلىپ. بىرەۋ ءوسىپ بارا جاتسا، شالعايىنا جارماسىپ، وزىمىزبەن بىرگە شىڭىراۋعا قۇلاتقانشا ءولىپ- تىرىلەمىز كەلىپ. قولىنان كەلگەن كىسى كوگەرسىن، كوكتەسىن. زاماننىڭ ىڭعايىنا جۇرەتىن ۋاعىمىز بولدى عوي ەندى. قوي، مەن الگى ء«ىشىپ قويدى، جەپ قويدى» دەگەن فاكتىنىڭ ءوڭىن اينالدىرىپ ماقالا جازايىن» ، - دەپ شەشتىم. ارزان ءۇي سالىپ بەرەم دەپ تالايدىڭ حاقىن جەپ كەتكەن جىگىتكە بولىسىپ، ونى بىلاي دەپ اقتاپ شىقتىم: «اپانوۆ ەشكىمنىڭ اقشاسىن ۇيىنە بارىپ بەرمەسىنە قويماي تارتىپ الماعان شىعار نەمەسە ۇرلاپ العان جوق قوي. كىرسە شىققىسىز كەرەمەت ءۇيدى ارمانداعان اقىماقتار بار اقشاسىن اپانوۆتىڭ الاقانىنا سالىپ بەرگەن وزدەرى ەمەس پە؟ كەي ءىستىڭ ءساتى تۇسپەي قالاتىنى بار. ويلاعان ويىنىڭ جۇزەگە اسپايتىنىن ول قايدان ءبىلسىن. نيەتى ءتۇزۋ، اۋىلداستارىنا كەڭ سارايداي ءۇي سالىپ بەرگىسى كەلدى. نەمەنە، ءبىر جىلدا ءجۇز ءۇي تۇرعىزاتىن قۇدىرەت وعان قايدان كەلىپتى. ءۇي سالىپ بەرەمىن دەدى مە، بەرەدى، ول ءبىر شەتەلگە قاشىپ كەتسە ەكەن- اۋ، قۇدايعا شۇكىر، اۋىلدارىڭدا ءجۇر عوي. «ەر موينىندا قىل ارقان شىرىمەيدى» دەگەن، اۋىلدارىڭنان شىققان كاسىپكەردى قولداۋلارىڭ كەرەك قوي. سابىر، ءتوزىم، شىدام دەگەن بولماي ما، اعايىن ادام ەمەسسىڭدەر مە؟ » دەگەن سياقتى سوزدەرمەن باسۋ ايتقانسىدىم.
قوجەكەڭ دە اۋليە عوي، ماقالا گازەت بەتىندە جارىق كورگەن بويدا الگى اپانوۆ قىزمەت ورنىما كەلىپ تۇر. ماعان: «اپاتاي، قانداي ادىلەتتى جانسىز، مىڭ العىس سىزگە! مىنا ۇستىڭىزدەگى كۇرتەشەڭىز نە، سىزدەي مىقتى جۋرناليستەرگە قۇندىز تون عانا جاراسادى» دەپ، قالتاما 3 مىڭ دوللار سالىپ كەتتى.
الگى ارىزقويلارعا ماقالا ۇنادى ما، جوق پا، و جاعىن بىلمەدىم. تاعى ءبىر جاققا شاعىمدانىپ جاتقان شىعار، وندا مەنىڭ شارۋام نە؟ ءوزىمنىڭ يىعىم بۇتىندەلىپ قالدى ايتەۋىر. قازىر ماقالا جازسام، پايدا تۇسەتىن جەردى عانا كوزدەيتىن بولدىم. زامانىنا قاراي وزگەرەدى ەكەن عوي ادام دەگەن...
ارداق قوناقبايەۆا
