پوشتا سالاسى قىزمەتىنە ۇلى بريتانيانىڭ وزىق تاجىريبەسى ەنگىزىلەدى
بۇل تۋرالى بۇگىن پارلامەنت سەناتىندا وتكەن دوڭگەلەك ۇستەلدە «قازپوشتا» ا ق باسقارما ءتوراعاسى باعدات مۋسين ءمالىم ەتتى.
ءتوراعانىڭ ايتۋىنشا، زاڭ جوباسىنىڭ باستى ماقساتى - قولدانىستاعى زاڭنامانىڭ ولقىلىقتارىن جويۋ، پوشتا وپەراتورلارى قىزمەتىنىڭ قۇقىقتىق نەگىزىن قامتاماسىز ەتۋ بولىپ تابىلادى. سونىمەن قاتار، جاڭا قۇجات ارقىلى پوشتا قىزمەتىن زاماناۋي حالىقارالىق تالاپتارعا سايكەستەندىرۋ دە كوزدەلگەن. بۇعان بايلانىستى پوشتا بايلانىسى قىزمەتىنىڭ تيىمدىلىگىن ارتتىرىپ، ساپاسىن كوتەرۋ، پوشتا سالاسىنداعى قاۋىپسىزدىك شارالارىن نىعايتۋ قاراستىرىلادى.
بۇدان بولەك، «قازپوشتا» باسشىسىنىڭ ايتۋىنا قاراعاندا، جاڭا زاڭ جوباسىندا «گيبريدتى جونەلتىلىمدەردى جەتكىزۋ» تەرمينى قاراستىرىلىپ وتىر. بۇل جەدەلدەتىلگەن تارتىپپەن پوشتالاردى ادرەساتقا جەتكىزۋدى قامتاماسىز ەتەدى.
«قازىرگى تاڭدا جوعارعى سوت پەن «قازپوشتا» ا ق بىرلەسە وسىنداي جۇيەمەن جۇمىس جاساۋدا. ول بويىنشا سوت شاقىرتۋلارى نەمەسە حابارلامالارى ەلىمىزدىڭ بەلگىلى ءبىر وڭىرلەرىنە لەزدە جەتكىزىلەدى. بۇدان باسقا، ۇلى بريتانيانىڭ وزىق تاجىريبەسى نەگىزىندە جاڭا پوشتالىق يندەكستەر ەنگىزۋ جوسپارلانادى. ونداي تەتىك پوشتا وپەراتورلارىنىڭ وندىرىستىك وبەكتىلەرىنە عانا ەمەس، ەلىمىزدىڭ تۇرعىن ءۇي نەمەسە تۇرعىن ءۇي ەمەس عيماراتتارىنا دا ەنگىزىلەدى. بۇل پايدالانۋشىلار مەكەنجايىن ناقتى انىقتاپ، حاتتاردى سۇرىپتاۋ ۇدەرىسىن جەڭىلدەتەدى»، - دەيدى باعدات مۋسين.
اۆتور: قانات مامەتقازى ۇلى
