داعدارىستىڭ سالقىنى سوعىمعا دا ءتيدى
سوعىم كەزىندە مال بازاردى ارالاپ كەلگەن "كەرەك.info" ءتىلشىسى ءىرى قارا باعاسىنىڭ وزگەرمەگەنىنە كوز جەتكىزدى. سۇرانىس بار. ءبىراق سۇرانىس جىلداعىداي ەمەس.
قۇلتاي ساعيدۋللين اقتوبەگە شالقار اۋدانىنداعى ايشۋاق اۋىلىنان مال الىپ كەلگەن. ايتۋىنشا، ءتورت جىلدان بەرى مال ساۋداسىمەن اينالىسادى. سوعىمنىڭ جاي- جاپسارىنا قانىق ساۋداگەر بيىل سۇرانىستىڭ جىلداعىداي ەمەستىگىن اڭعارعان.
- ءبىر بايقاعانىم، حالىق بۇرىنعىداي ءبىر ءىرى قارانى تۇتاستاي ساتىپ الىپ جاتقان جوق. اعايىندارىمەن بىرىگىپ، اياقتاپ الىپ كەتىپ جاتىر. سوعان قاراعاندا، حالىقتا اقشا جوق بولعانى عوي، - دەيدى قۇلتاي ساعيدۋللين.
داعدارىستىڭ سوعىمعا تيگىزگەن سالقىنى وسىنداي. ءبىراق اقتوبەدە مال باعاسى قىمباتتاماعان. مىسالى، شالقارلىق قۇلتاي ساعيدۋللين سەمىز جاباعىنى 100 مىڭ تەڭگەدەن ساتىپ تۇر. ايتۋىنشا، بىلتىر جاباعىنىڭ باعاسى 120 مىڭ تەڭگە بولىپتى.
مال بازار اكىمشىلەرىنىڭ سوزىنشە، اقتوبەلىكتەر سوعىمعا جىلقى سويعاندى ۇناتادى. سوندىقتان جىلقى مالىنىڭ قوڭدىسى بازاردا كوپ تۇرماي، تەز ءوتىپ كەتىپ جاتىر. ال تۇيە ساتىپ الاتىندار نەكەن ساياق.
سۇرانىسقا يە ءتورت تۇلىكتىڭ ءبىرى - سيىر مالى. قالا تۇرعىنى ساۋلە سوعىمعا تۋ سيىر ساتىپ العان. باعاسى 150 مىڭ تەڭگە. "كەرەك.info" ءتىلشىسى ساۋلەنى سوعىمىن مال بازارداعى قاساپشىلارعا سويدىرتىپ جاتقان جەرىنەن كەزىكتىردى. سوعىمىنىڭ سەمىز بولعانىنا قۋانىپ تۇرعان قالا تۇرعىنى مال باعاسىنا كوڭىلى تولاتىنىن دا ايتىپ قالدى.
تاعى ءبىر اقتوبەلىك تۇلكىباي ەلعوندين جىل سايىن سوعىمعا ورتا ەسەپپەن 300 مىڭ تەڭگە جۇمسايتىن كورىنەدى.
- بۇگىن 230 مىڭعا بيە ساتىپ الدىم. بالا- شاعا، كەلىمدى- كەتىمدى كىسى بار. بۇل ءۇش اي قىسقا ازدىق ەتەدى. ەندى سيىردىڭ جارتى ەتىن العىم كەپ تۇر. جىلدا سويتەمىز. سوندا ءۇش اي قىستا 300 مىڭ تەڭگەنىڭ ەتىن جەيدى ەكەنبىز، - دەيدى تۇلكىباي ەلعوندين.
7-8 -جەلتوقسان كۇندەرى اقتوبەدە كۇن كۇرت جىلىپ كەتىپ، مال بازارىنا كەلۋشىلەر دە ازايىپ كەتكەن. بازار اكىمشىلەرى اۋا-رايىنا قاراماستان دەمالىس كۇندەرى كىسى قاراسىنىڭ وتە كوپ بولاتىندىعىن ايتادى.
مال دارىگەرى حابيت ەشنيازوۆتىڭ سوزىنە قاراعاندا، بيىل سوعىمنىڭ ۋاقىتى جىلداعىعا قاراعاندا ۇزاپ كەتكەن. وعان سەبەپ- اۋا- رايىنىڭ قولايسىزدىعى. جۇرت قار ءتۇسىپ، كۇن سالقىنداماي سوعىم سويۋعا اسىقپايدى. دەسەك تە، سوعىمعا دەپ بورداقىلاعان مالىن وبلىس ورتالىعىنا اكەلەتىندەر قاتارى از ەمەس. مال بازارىندا اسىرەسە، ويىل، ايتەكە ءبي، قوبدا اۋداندارىنان جەتكىزىلگەن ءىرى قارا كوپ.
