تۇسىندە نازاربايەۆتان سىيعا ءۇش قالام العان پاۆلودارلىقتىڭ زايىبى دۇنيەگە ۇشەم اكەلدى

قىزداردىڭ سالماعى - 1870, 1960, 2020 گرامم، بويى - 42,44 جانە 46 سانتيمەتر. اگەنتتىك تىلشىسىنە بەرگەن سۇحباتىندا بالالاردىڭ اناسى داليا يباديلدينوۆا ۇشەم دۇنيەگە كەلەتىنىن بولجام بويىنشا بىلگەنىن ايتتى.

«جولداسىم ەكەۋمىز 2007 -جىلى وتباسىن قۇردىق. بۇل كۇنگە دەيىن پەرزەنت سۇيە المادىق. سوندىقتان كوپتەن كۇتكەن قۋانىشقا كەنەلىپ وتىرمىز. ءوزىمنىڭ جۇكتى ەكەنىمدى بىلمەگەندە كۇيەۋىم ءتۇس كورگەنىن جانە تۇسىندە ەلباسى كىرگەنىن ايتتى. پرەزيدەنت وعان ءۇش قالام تارتۋ ەتىپتى. قالام بولعاندا جاي قالام ەمەس، قاۋىرسىنى بولعان»، - دەيدى انا.

ال شىعىس كۇنتىزبەسىنە ساي ءتۇس جورۋعا سۇيەنسەك، بەلگىلى تۇلعانىڭ سىيلىق تارتۋ ەتۋى - ۇرپاق سۇيەتىنىن بىلدىرەدى ەكەن.

«كۇيەۋىم ماعان: «نۇرسۇلتان نازاربايەۆتىڭ ءۇش قىزى بار. دەمەك، ءبىز دە ءۇش قىزدى بولامىز» دەگەن بولاتىن. ۋزي ءتۇستىڭ شىندىققا اينالعانىن كورسەتتى. 5-جەلتوقسان كۇنى ءسابيلى بولدىق"، - دەيدى داليا يباديلدينوۆا.

يباديلديندەر وتباسى ەكىباستۇز قالاسىندا اتا- اناسىمەن بىرگە تۇرادى.

«اتام - ءبىرىنشى توپتاعى مۇگەدەك، ال جولداسىم - وتباسىنداعى جالعىز ۇل. اتا- اناسىن كۇتىپ، باعۋ - ونىڭ باستى مىندەتى. مەن ءۇي شارۋاسىمەن اينالىسامىن. كۇيەۋىم تەمىر جولدا قاۋىپسىزدىك بويىنشا ريەۆيزور بولىپ جۇمىس ىستەيدى. بارلىق قيىندىقتارعا قاراماستان، ۇشەم بولاتىنىن ەستىگەندە قاتتى قۋاندىق»، - دەيدى جاس انا.

پەريناتالدىق ورتالىقتىڭ باس دارىگەرى ايمان وسپانوۆانىڭ ايتۋىنشا، داليا مەن سابيلەر قازىرگى تاڭدا پاتولوگيا بولىمىنە ورنالاستىرىلعان.

«قىزداردىڭ ءبىرى - اناسىمەن بىرگە بولسا، ەكەۋى - ارنايى پالاتادا. ولارعا ازىرگە مەديتسينالىق قىزمەتكەرلەردىڭ كۇتىمى قاجەت. الايدا اناسى نارەستەلەرىن كورە الادى»، - دەيدى وسپانوۆا.

باس دارىگەردىڭ ايتۋىنشا، بالالار اناسىمەن بىرگە پەرزەنتحانادا كەم دەگەندە ءبىر اي بولادى. ودان ءارى قاراي جاعداي بالالاردىڭ سالماق قوسۋىنا بايلانىستى ەكەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى