جازيرا بايىربەكوۆا: اتاققا ەشقانداي قىزىققان ەمەسپىز
جانبولات پەن جازيرا ەسىمىمەن كوپشىلىككە تانىلىپ، ونەرىمەن ەلدى ءتانتى ەتىپ جۇرگەن انشىمىزبەن وتكەن سۇحباتتى نازارلارىڭىزعا ۇسىنامىز.
- شىعارماشىلىقتاعى جاڭالىقتارمەن بولىسە وتىرساڭىز؟
- وسى جىلداعى باستى جاڭالىعىمىز شاكىرت تاربيەلەپ جاتىرمىز. جاقىندا «جەتى» دۋەتى كوپشىلىككە دە تانىستىرىلادى. بۇيىرسا وسى ايدىڭ 13 كۇنى «جەتى» دۋەتىمەن بىرگە رۋدنىي قالاسىندا كونسەرت قويعالى جاتىرمىز، ال 14 -كۇنى قوستاناي قالاسىندا كونسەرت قويامىز. وزگە قالالارعا گوسترولدىك ساپارىمىزدى اقپان ايىنان باستايمىز دەگەن جوسپار بار. تاعى ءبىر جاڭالىق، جاڭا ءبىر بەينەبايان تۇسىردىك، تۇسىرىلگەنىنە 2 كۇن عانا بولدى. جاڭا جىلعا دەيىن دايىن بولىپ قالادى.
- «جەتى» توبىن قۇرۋداعى ماقسات قانداي؟
- وزىمىزدە ىشتەي ەرتەڭگى بولاشاقتا ءبىزدىڭ ورنىمىزدى باساتىن، ارى قاراي ونەرىمىزدى جالعاستىرىپ جۇرەتىن شاكىرتتەرىمىز بولسا دەگەن كىشكەنە ارمان بولدى. بۇل ارماندى كەيىن الدىمىزعا ماقسات ەتىپ قويىپ، وسى دۋەتتى قۇردىق. دۋەتتىڭ ءان قورجىندارىندا بىزدىكىندەي اندەر بولسا دەپ ويلادىق، الايدا ولار بىزگە مۇلدە ۇقسامايدى. جاستارعا دا، ۇلكەندەرگە دە ورتاق اندەرى بار توپ. توپ مۇشەلەرىن اتاپ وتەر بولسام، سىرىم قۇرمانوۆ پەن ءاليا اتىمتايەۆا ەسىمدى جاستار. بۇل ءبىزدىڭ شاكىرت دايىنداۋداعى العاشقى قادامىمىز. بۇگىندە دۋەتتە «سوعادى جۇرەك» اتتى جاڭا بەينەبايان بار.
- ەڭ العاش شىعارماشىلىقتى پروديۋسەرسىز باستادىڭىزدار؟ قانداي قيىندىقتار كەزدەستى؟
- ءيا، بىزدە ەشقانداي پروديۋسەر بولعان جوق. جاي عانا ءانىمىزدى ايتىپ، جازىپ باستادىق. الايدا وسىنداي بۇگىنگىدەي كۇنگە جەتەمىز دەگەن وي بولعان جوق. كوپ ەڭبەكتەندىك. اتاققا ەشقانداي قىزىققان ەمەسپىز. ءوز ونەرىمىزدى شىڭداپ، ىزدەنىستە جۇردىك. سودان، مىنە، ازدى-كوپتى حالىق تانىپ، شاكىرت تاربيەلەپ وتىرمىز.
- قاي قالادا تۇراسىزدار؟ استانادا ما، الدە الماتىدا ما؟
- الماتىدا تۇرامىز. الايدا استاناعا ءجيى بارىپ تۇرامىز.
- ۇلدارىڭىز قازىبەك تە ەرجەتىپ قالدى. قانداي مامان يەسى بولعىسى كەلەدى؟
- قازىبەك وتە سالماقتى جىگىت. ارتىق ءىس- ارەكەتى دە جوق. بالامىز ونەر جولىن تاڭداعان جوق. بۇگىندە زاڭگەر ماماندىعىمەن قاز ۇ ۋ- دا وقيدى.
- جانۇيا باقىتى دەپ نەنى ايتار ەدىڭىز؟
- جانۇيا باقىتى، بۇل - مەن ءۇشىن وتباسىنداعى تىنىشتىق، جۇبايلاردىڭ سابىرلىلىعى، كەز كەلگەن ىسكە قاناعات ەتە ءبىلۋى، ءبىر-بىرىنە دەگەن ماحابباتى، سىيلاستىعى، جاناشىرلىعى.
قانداي جاعداي بولماسىن وتباسىندا كەشىرىمدى بولۋ كەرەك. ال وسى ايتىلعاننىڭ ءبارىن تاربيە كوزى رەتىندە بالالارىنا دا ۇيرەتە ءبىلۋى كەرەك.
- «سەن ماعان ءسۇيۋدى ۇيرەتتىڭ» ءانىنىڭ شىعۋ تاريحىن ايتىپ كەتسەڭىز؟
- بۇل ءاننىڭ ءانىن اعام ەربول بايىربەكوۆ شىعارعان، ال ءسوزىن اقمارال لەۋبايەۆا جازدى. وسى ولەڭ ماعان قاتتى ۇنادى، وسىعان ءبىر ادەمى ءان كەرەك دەگەن ەدىم اعام ءبىر كۇندە شىعارىپ بەردى. شىققاننان سوڭ وزىمە ىڭعايلاپ، وڭدەپ ورىنداپ شىقتىم. ۇزىنسونارى 4-5 كۇندە جارىققا شىققان ءان.
- «قىز باقىتى» ءانى قالاي دۇنيەگە كەلدى؟ وسى انمەن تويلارعا ءجيى شاقىرا ما؟
مەنىڭ «قىز ۇزاتۋ» ءانىمدى يسرايل ساپارباي اعامىز شىعارىپ بەردى. تەاتردا ءبىر قويىلىمدا سەن وسى ءاندى ايتىپ، قىزدى ۇزاتاسىڭ دەدى. الايدا ءبىر انمەن قىزدى باسىندا الىپ كەلىپ، سوڭىندا قايتا تاعى وسى انمەن قىزدى ۇزاتقىم كەلمەدى. سول سەبەپتى وسى «قىز باقىتى» ءانىن اعاما جازدىرتقان بولاتىنمىن. الايدا مەن سازگەر بەرگەن ءاندى سول قالپىندا ايتا سالمايمىن، ءوز داۋسىما ىڭعايلاندىرىپ وڭدەپ الامىن. جاسىراتىنى جوق، تويلارعا شىعىپ تۇرامىز. كوبىنە وسى "قىز ۇزاتۋ"، "قىز باقىتى" اندەرىمەن قىز ۇزاتۋ تويىنا شاقىرىپ جاتادى. وسى ۋاقىتتقا دەيىنگى بارعان قىز ۇزاتۋ تويىن ساناسام، 150 گە جۋىق ەكەن.
- عالامتوردىڭ قوعامعا تيگىزەر پايداسى مەن زيانى جايىندا نە ايتاسىز؟
- الەۋمەتتىك جەلىنىڭ قوعامدا قانشالىقتى پايداسى بولسا، سونشالىقتى كەرى اسەرى دە بار. كەيدە سول پايداسىنان زيان شەگىپ تە وتىرمىز. سەبەبى كۇندىز-ءتۇنى وتىراتىنداردى كورىپ، وتباسى، بالا-شاعاسى قايدا دەگەن سەكىلدى ونىڭ ءومىرىن ويلاپ قويامىن. بۇل ءبىر قاراعاندا جاي ۋاقىتىن زايا كەتىرۋ دە سەكىلدى. جاسىراتىنى جوق الەۋمەتتىك جەلىلەردىڭ تيىمدىلىگى - ەلدە بولىپ جاتقان جاڭالىقتاردى وقىپ، جول ۇستىندە دە حاباردار بولىپ وتىرامىز. ءوز باسىم الەۋمەتتىك جەلىلەردە كوپ وتىرمايمىن. تەك جولدا نەمەسە ەرتە بارىپ الىپ كۇتىپ وتىراتىن ساتتەردە عانا كىرەمىن. سەبەبى ەلدەن كەلگەن حاتتاردى جاۋاپسىز قالدىرعىم كەلمەيدى. مۇمكىندىگىنشە بارلىعىنا جاۋاپ بەرۋگە تىرىسامىن.
- 16 -جەلتوقسان تاۋەلسىزدىك كۇنىنە وراي حالىققا ايتار تىلەگىڭىز؟
- تاۋەلسىزدىك كۇنى قۇتتى بولسىن! بۇل قانشاما جىل ارمانداعان قازاعىمىزدىڭ اماناتى. بۇل ارمان مەن اماناتتى بەرىك ساقتاپ قالايىق! ءاردايىم ەلىمىزدە تىنىشتىق بولسىن! حالقىمىزدىڭ كوڭىل- كۇيى تۇسپەسىن! ەڭبەك ەتەيىك! مەرەكەدەن مەرەكەگە امان- ەسەن جەتە بەرەيىك!
