ا ق ش- تىڭ تانىمال انتروپولوگى پول تەيلور تامعالى جارتاسىن زەرتتەمەك
بىرلەسكەن جۇمىس ساپارىنىڭ باستى ناتيجەسى تامعالى لاندشافتىن جاھاندىق ەكولوگيالىق قورعا ەنگىزۋ (GEF) بولماق، دەپ حابارلايدى ق ر م س م باسپا ءسوز قىزمەتى.
پول م. تەيلور قازاقستانعا تامعالى لاندشافتىنىڭ بيولوگيالىق كوپ تۇرلىلىگىن زەرتتەۋگە ادەيىلەپ كەلدى. تانىمال انتروپولوگ گەف جوباسىنىڭ باستى حالىقارالىق ارىپتەسى رەتىندە قاتىسۋعا قىزىعۋشىلىعىن بىلدىرۋدە. ساپار بارىسىندا ازيا مادەنيەتىن زەرتتەۋمەن اينالىساتىن كورنەكتى عالىم سميتسون ينستيتۋتى تاريحي-مادەني مۇرالاردى زەردەلەۋ مەن ساقتاۋ سالاسىنداعى بىرلەسكەن قازاق-امەركاندىق جوبالارعا ەرەكشە مۇددە بىلدىرەتىندىگىن جەتكىزدى.
بۇعان دەيىن پول تەيلور ازەربايجانداعى گوبۋستان ارحەولوگيالىق لاندشافتىن زەرتتەۋمەن اينالىسقان بولاتىن. تەيلور جەتەكشىلىك ەتەتىن انتروپولوگيا دەپارتامەنتى باعدارلاماسىنىڭ ارقاسىندا زەرتتەۋشىلەر 3D- مودەل جاساۋ، سيفرلىق وڭدەۋ، بەينەلەردى ارحيۆتەۋ جانە ت. ب. ءتۇرلى تەحنيكالارمەن جۇمىس ىستەۋگە مۇمكىندىك الدى.
«قازىرگى ۋاقىتتا قازاق عىلىمي-زەرتتەۋ مادەنيەت ينستيتۋتى جاھاندىق ەكولوگيالىق قورعا (GEF) بايقاۋعا ءوتىنىش جوباسى بويىنشا جۇمىستار جۇرگىزۋدە. «بيولوگيالىق كوپتۇرلىلىك» نوميناتسياسى بويىنشا ءبىز الماتى وبلىسىنداعى تامعالى جارتاسىنىڭ بىرەگەي لاندشافتىن قوسۋدامىز، - دەدى قازاق عىلىمي- زەرتتەۋ مادەنيەت ينستيتۋتىنىڭ باس ديرەكتورى ا. حازبۋلاتوۆ. - بۇل جۇمىستى ينستيتۋت قازاقستان رەسپۋبليكاسى مادەني ساياساتىنىڭ تۇجىرىمداماسى جانە تۋريزم سالاسىن 2020-جىلعا دەيىن دامىتۋ تۇجىرىمداماسىن جۇزەگە اسىرۋ اياسىندا جۇرگىزىپ جاتىر».
اندرەي حازبۋلاتوۆ ۇستىمىزدەگى جىلدىڭ ماۋسىم ايىندا ۆاشينگتوندا (ا ق ش) گەف وكىلدەرى پيتەر لاللاس جانە پاتريسيا كوككامەن كەزدەسۋ وتكەندىگى تۋرالى ايتتى. بۇل كەزدەسۋ كەزىندە ىقتيمال جوبا ماسەلەلەرى تالقىلاندى. تامعالىنىڭ بىرەگەي پەتروگليفتەرى يۋنەسكو- نىڭ بۇكىل الەمدىك مۇرا تىزىمىنە ەنگىزىلگەندىگى بارلىعىمىزعا ءمالىم، دەگەنمەن، وتاندىق ساراپشىلاردىڭ پىكىرىنشە، تامعالى لاندشافتى قىزىل كىتاپقا ەنگىزىلگەن قالدىق وسىمدىكتەر مەن جانۋارلاردى بىرىكتىرەتىن عاجايىپ فلوراسى مەن فاۋناسى تاڭ قالدىرادى.
ەسكە سالا كەتسەك، تامعالى جارتاسى - بەس مىڭنان اسا ءتۇرلى پەتروگليفتەرى بار جارتاس ونەرىنىڭ ەڭ كونە جانە اسا ءىرى ەسكەرتكىشتەرىنىڭ ءبىرى. ولاردى زەرتتەۋ ىشكى جانە سىرتقى مادەني تۋريزمنىڭ دامۋىنا سەپتىگىن تيگىزەدى.
