سەرىك احمەتوۆ سوتتاعى سوڭعى سوزىندە نازاربايەۆتان كەشىرىم سۇرادى
ايىپتاۋشى تاراپ سوتتان احمەتوۆتى 12 جىل باس بوستاندىعىنان ايىرىپ، دۇنيە-مۇلكىن تاركىلەۋدى سۇراعان. احمەتوۆ نازاربايەۆتى «ۇستازىم» دەپ اتادى.
«نۇرسۇلتان ءابىش ۇلى نازاربايەۆتان سەنىمىن اقتاماعانىم ءۇشىن شىنايى كەشىرىم وتىنەم. ماعان بولا قاراعاندى وبلىسىندا وسىنداي احۋال تۋعانىنا، ونى ويلاپ مەملەكەت باسشىسىنىڭ قايعىراتىنىنا بايلانىستى مورالدىق جاۋاپكەرشىلىگىم بار ەكەنىن تۇسىنەم. ەگەر سوت پەن مەملەكەت باسشىسى قاتارعا قوسىلۋىما مۇرسات بەرسە، بارلىق ءبىلىمىم مەن تاجىريبەمدى ەل يگىلىگى ءۇشىن قولدانىپ، اقتىعىمدى دالەلدەۋگە دايىنمىن. كەز كەلگەن جاعدايدا مەملەكەتكە، حالىققا جانە ۇلت كوشباسشىسىنا (پرەزيدەنت نازاربايەۆقا -رەد.) ادال بولىپ قالام»، - دەدى ول سوڭعى سوزىندە.
احمەتوۆ مەملەكەتتىك ايىپتاۋشىعا اسا ءىرى كولەمدە پارا الدى دەگەن باپتى دالەل تابىلماعانى ءۇشىن ايىپتاۋ قورىتىندىسىنان الىپ تاستاعانى ءۇشىن العىس ءبىلدىردى. ول وبەكتيۆتى جانە ءادىل ۇكىم شىعادى دەپ ۇمىتتەنەتىنىن ايتتى.
سارسەنبى كۇنى وتكەن جارىسسوزدە سەرىك احمەتوۆتىڭ ءتورت ادۆوكاتى سۋديادان ونى اقتاۋدى ءوتىندى. بۇرىنعى پرەمەر-مينيستر قاراعاندىدا ءوتىپ جاتقان اتىشۋلى قىلمىستىق ىستە «زاڭسىز كاسىپكەرلىكپەن اينالىستى» جانە «وكىلەتىن اسىرا قولداندى» دەپ ايىپتالعان. بۇل قىلمىستىق ءىس بويىنشا جالپى سانى 21 ادام سوتقا تارتىلعان. ولاردىڭ اراسىندا قاراعاندى وبلىسى مەن قالاسىنىڭ بۇرىنعى اكىمدەرى بار.
«ازاتتىق»
