استانا اكىمى جاڭا بالالار جۇقپالى اۋرۋلار اۋرۋحاناسىن اشتى - فوتو

 اۋرۋحانا قۇرىلىسى «100 مەكتەپ، 100 اۋرۋحانا» جوباسى اياسىندا جۇرگىزىلدى. بۇل تۋرالى ەلوردا اكىمدىگىنىڭ رەسمي سايتىندا حابارلادى.

عيمارات ءبىر- بىرىمەن گالەرەيا ارقىلى بايلانىساتىن 6 كورپۋستان تۇرادى. ناۋقاستاردى قابىلداۋ ءۇشىن سەگىز قابىلداۋ- قاراۋ مەلتسەر بوكسى جاسالعان، ولاردىڭ ءارقايسىسىنا كىرەتىن جەكە جول بار. باس عيماراتتىڭ كىرە بەرىسىندە بەينەكەزدەسۋلەر بولمەسى ورنالاسقان. وسىلايشا، ناۋقاستار ءوز پالاتاسىندا جاتىپ تۋىستارىمەن كورىسىپ، سويلەسە الادى. ءا. جاقسىبەكوۆ اتالعان جۇيەنى ءبىرىنشى بولىپ سىناقتان وتكىزدى.

جاڭا اۋرۋحانانىڭ بىرنەشە ءبولىمىن قاراعاننان كەيىن اكىم مەديتسينالىق پەرسونال ۇجىمىمەن اڭگىمەلەسىپ، دەنساۋلىق ساقتاۋ قىزمەتكەرىنە ۇلكەن جاۋاپكەرشىلىك جۇكتەلەتىنىن اتاپ ءوتىپ، ولارعا ەڭبەكتەرى ءۇشىن العىسىن ءبىلدىردى.

«بۇل قالاداعى ۇزدىك اۋرۋحانالاردىڭ ءبىرى، مۇندا زاماناۋي تەحنولوگيالار مەن مەديتسيناداعى جەتىستىكتەر ۇيلەسىم تاپقان. مەكەمەنىڭ اشىلۋىمەن قالادا كەرەۋەت ورىندار تاپشىلىعى شەشىلەدى، كولەمى كەڭەيتىلىپ، بالالارعا كورسەتىلەتىن مەديتسينالىق كومەكتىڭ قولجەتىمدىلىگى ارتادى. بۇل مەملەكەت باسشىسىنىڭ جەكە قولداۋىنىڭ ارقاسىندا مۇمكىن بولدى»، - دەدى ءا. جاقسىبەكوۆ. قالا باسشىسى ەكونوميكالىق جاعدايعا قاراماستان الەۋمەتتىك نىساندار قۇرىلىسى توقتاتىلمايتىنىن اتاپ ءوتتى.

بيىل استانادا ءتورت دەنساۋلىق ساقتاۋ نىسانى پايدالانۋعا بەرىلدى - قالالىق بالالار جۇقپالى اۋرۋلار اۋرۋحاناسى، امبۋلاتوريالىق- ەمحانا كەشەنى، ب م س ك ورتالىعى، ونكوديسپانسەرگە جاپسارلاس سالىنعان عيمارات. جىل سوڭىنا دەيىن مەديتسينالىق- سانيتارلىق وڭالتۋ ورتالىعى سالىنىپ بىتەدى. كەلەسى جىلى تاعى دا ءتورت زاماناۋي مەديتسينالىق مەكەمەنىڭ قۇرىلىسىن اياقتاۋ جانە جالعاستىرۋ جوسپارلانعان. ولار قالانىڭ سۇرانىس بولعان اۋداندارىندا سالىنادى.

اكىمنىڭ سوزىنە قاراعاندا، بۇگىندە استانادا ءاربىر قالا تۇرعىنى ۋاقىتىلى جانە ساپالى مەديتسينالىق كومەككە قول جەتكىزۋى ءۇشىن بارلىق جاعداي جاسالىپ جاتىر.

اۋرۋحانانىڭ جالپى اۋدانى 60070,49 شارشى مەتر، سونىڭ ىشىندە جەكە تۇرعان عيماراتتار مەن قۇرىلىستاردىڭ اۋدانى - 1606,05 شارشى مەتر.

ەمدەۋ بلوگى ءۇش بلوكتان تۇرادى، ولاردىڭ ءارقايسىسىندا 48 بوكس بار. جالپى، ستاتسيونار بويىنشا 144 بوكس - 44 ءبىر ورىندىق جانە 98 ەكى ورىندىق. اۋرۋحانادا 9 كلينيكالىق ءبولىم، سونىڭ ىشىندە جانساقتاۋ جانە ءۇش پاراكلينيكالىق ءبولىم اشىلدى. جاڭا اۋرۋحانانىڭ اشىلۋىمەن جاڭا بولىمدەر دە اشىلادى، اتاپ ايتقاندا، گەپاتيت، زوونوزدى ينفەكتسيالار، نەيروينفەكتسيالار، يممۋنولوگيالىق زەرتحانا.

جانساقتاۋ جانە قارقىندى تەاپيا بولىمدەرى بارلىق جاستاعى بالالارعا ارنالعان قازىرگى زامانعى تىنىس الۋ اپپاراتتارىمەن، سالماعى تومەن بالالارعا ارنالعان ينكۋباتورلارمەن، كولىكتىك كيۋۆەزبەن، ەكستراكورپورالدى دەتوكسيكاتسيا اپپاراتىمەن جابدىقتالعان. بارلىق پالاتالار اسەپتيكالىق، جەلدەتكىشى اۆتونومدى جانە قىسىمى تەرىس تازا بولمەلەر كەشەنى بولىپ تابىلادى. ءبولىم ۆيرۋستىق، اۋا- تامشى جانە ىشەك ينفەكتسيالارى بلوكتارىنان تۇرادى.

 جاڭا قوندىرعىلارمەن جابدىقتالعان جەكە زەرتحانا دياگنوستيكالاۋ ساپاسىن ارتتىرۋعا مۇمكىندىك بەرەدى. جاڭا اۋرۋحانادا تەستتەر سانىن ەكى ەسەگە (بۇرىن 62 تەست جۇرگىزىلەتىن) ۇلعايتۋ كوزدەلگەن. بۇعان دەيىن جىلىنا ورتا ەسەپپەن  59500 زەرتتەۋ جۇرگىزىلسە، بۇگىندە ەكى ەسەگە ارتىق ورىنداۋ جوسپارلانعان. كلينيكالىق- دياگنوستيكالاۋ زەرتحاناسىندا جۇرگىزىلەتىن تالداۋلارمەن قوسا، قازاقستاننىڭ بىردە- ءبىر بالالار جۇقپالى اۋرۋحاناسىندا جوق قىزمەتتەر كورسەتىلمەك. جاڭا اۋرۋحانانىڭ اسحاناسىندا تاماقتانۋدى ۇيىمداستىرۋدىڭ كوپتەگەن پروتسەسى اۆتوماتتاندىرىلدى. بۇدان باسقا، انالار مەن بالالار مۇندا بارلىق ديەتالىق رەجيمدى ساقتاي وتىرىپ، تاماقتانا الادى.

 

 

 

 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى