قازاقستاندا بيزنەسمەندەردىڭ قۇقىعىن بۇزعان سەگىز لاۋازىم يەسى قىزمەتىنەن بوساتىلدى
بۇل تۋرالى بۇگىن ق ر ۇلتتىق كاسىپكەرلەر پالاتاسى جانىنداعى كاسىپكەرلەر قۇقىعىن قورعاۋ جونىندەگى كەڭەستىڭ كەزەكتى وتىرىسىندا كەڭەس ءتوراعاسى عاني قاسىموۆ ءمالىم ەتتى.
«پروكۋراتۋرانىڭ ورگاندارىمەن بىرلەسە مەملەكەتتىك ورگانداردىڭ لاۋازىمدى تۇلعالارىنا قاتىستى 19 قىلمىستىق ءىس قوزعالىپ، 39 لاۋازىم يەلەرى تارتىپتىك نەمەسە قاتاڭ اكىمشىلىك جاۋاپكەرشىلىككە تارتىلدى. بۇگىندە سەگىز لاۋازىمدى تۇلعا قىزمەتىنەن بوساتىلدى، ونىڭ ىشىندە اتقارۋشى بيلىك ورگاندارىنان»، - دەدى ول.
ونىڭ سوزىنە قاراعاندا، وتكەن جىلدا ۇ ك پ- عا بيزنەستى قورعاۋ باعىتى بويىنشا ءتورت مىڭنان استام ءوتىنىم كەلىپ تۇسكەن. ۇكپ ساراپشىلارى وسى وتىنىمدەردىڭ 40 پايىزعا جۋىعىن شەشۋگە جاردەمدەستى. 9,7 ميلليارد تەڭگەدەن استام سوماداعى كاسىپكەرلىك سۋبەكتىلەرىنىڭ مۇلىكتىك قۇقىقتارى قورعالدى.
اۆتور: رۋسلان عابباسوۆ
