وڭتۇستىك قازاقستاندا تۇرمىس قۇرماعان قىزداردىڭ باعىن اشاتىن كيەلى ورىن كوپشىلىكتى تاڭ قالدىردى
«اڭىز- دەرەكتەرگە سۇيەنسەك، ەرتەرەكتە ءامىرحان ەسىمدى ەل تۇتقاسىن ۇستاعان ءارى اسا باي كىسى ءومىر ءسۇرىپتى. سول كىسىنىڭ شەشۋشى دەگەن بالاسىنان دىلداربەك ەسىمدى نەمەرەسى بولىپتى. مىنە، وسى دىلداربەك بابانىڭ نۇرزادا، سۇلۋشاش، قاراشاش، ساندۋعاش ەسىمدى قىزدارى بولعان ەكەن. جاۋگەرشىلىك ورىن الىپ، جوڭعارلار قازاقتارعا قىرعيداي تيىپ جاتقان تۇستا الگى قىزدار شىداي الماي، سوعىسقا ارالاسىپ، ءدال وسى جەردە قازا تاۋىپتى. ولار جاس كەزدەرىندە ونەرلى، ىسمەر بوپ وسكەن ەكەن. سوندىقتان شىعار، اۋليەگە زيارات ەتىپ كەلۋشىلەردىڭ كەيبىرىنىڭ ويلاماعان جەردەن ءان ايتاتىن، ولەڭ جازاتىن، ويۋ ويىپ، تىگىس تىگەتىن قاسيەتى اشىلادى دەيدى. زيارات ەتۋگە كوبىنە-كوپ باعى اشىلماي جۇرگەن قىز- كەلىنشەكتەر، ونەردەگى، قىزمەتتەگى جولدارىن اشتىرعىسى كەلەتىن ازاماتتار كەلەدى ەكەن»، - دەپ جازادى باسىلىم.
«قىز اۋليەنىڭ» شىراقشىسى ۇلتۋار مەشبايەۆا كيەلى جەرگە كىمدەردىڭ كەلەتىنىن ايتىپ ءوتتى.
ۇلتۋار مەشبايەۆا شىراقشىلىقتى باستاعان تۇستا قازىرگى «قىز اۋليەنىڭ» ورنى جازىق دالا بولعان ەكەن. شىراقشىلىق ەتەتىن دايىن باسپانا دا بولماعان. سول ساتتە پانيس ەسىمدى ءبىر بالا كەلىپ، شاتىردان ءۇي تىگىپ بەرۋگە جاردەمدەسىپتى. كەيىننەن جەردى قازىپ، جەرتولە سالىپ بەرگەن. مىنە، سول جەرتولەدە ۇلتۋار 5 جىل ءومىر ءسۇرىپتى. ال سوڭعى 13 جىلدان بەرى اۋليەگە كەلۋشىلەردىڭ جاردەمىمەن تۇرعىزىلعان 3 بولمەلى شاعىن ءۇيدى پانالاۋدا.
ءوزى شاعىن بولسا دا ۇيگە كىرىپ، شاي ىشۋشىلەر، زيارات ەتۋگە كەلگەن ادامدار وتە كوپ. ادام قاراسى ۇزىلمەيدى ەكەن. اسىرەسە، ءتۇس اۋا باستاعاندا ادامداردىڭ قاتارى كوبەيە ءتۇستى.
«بۇل جەرگە اتا-اناسىنىڭ ءتىلىن الماي، تەرىس جولعا ءتۇسىپ كەتكەن، اياعىن شالىس باسقان جاستار وتە كوپ كەلەدى. مەن كورىپكەل ەمەسپىن، بال دا اشپايمىن. مەن تەك انالىق اقىلىمدى ايتامىن، ومىردەن كورگەنىمدى، كوڭىلگە تۇيگەنىمدى جاستارعا ۇيرەتەمىن. قازىرگى زاماننىڭ جاستارى اتا-اناسىن سىيلاپ، ۇلكەندەردى رەنجىتپەي جۇرسە، قىزدارىمىز وڭ بوساعادا وتىرىپ ابىرويىنان ايىرىلماي، ءوز تەڭىن تاپسا، بالا كوتەرمەي جۇرگەن قازاقتىڭ كەلىندەرى ۇلدى- قىزدى بولىپ، ۇرپاق وربىتسە، وعان «قىز اۋليەنىڭ»، مەنىڭ تيتتەي دە بولسا كومەگىم تيسە دەيمىن. سول ءۇشىن ءۇي- جايىمنان، بالا-شاعامنان جىراقتا، اۋليەنىڭ باسىندا ءومىر ءسۇرىپ جاتىرمىن»، - دەيدى شىراقشى اجەي.
كيەلى جەردەن كومەك كۇتە كەلگەن 32 جاستاعى ءداميرا (اتى-ءجونى وزگەرتىلدى) تۇرمىسقا شىعا الماي جۇرگەنىن ايتتى.
«وسىدان ءبىراز ۋاقىت بۇرىن تانىستارىمنان «قىز اۋليەگە» بارعان قىزداردىڭ تىلەگى ورىندالىپ، ەرتەرەك تۇرمىسقا شىعاتىنىن ەستىگەنمىن. سودان بەرى بىرنەشە مارتە كەلىپ ءجۇرمىن. كەلگەن سايىن ءدامدى-تاتتىلەرىمدى پىسىرىپ اكەلەمىن، اۋليەنىڭ باسىندا زيارات ەتىپ، اللادان كەرەگىمدى سۇرايمىن. ماعان كەرەگى - ەرتەرەك تۇرمىسقا شىعۋ. بالا بوسانىپ، انا باقىتىنا بولەنسەم دەيمىن. كەزىندە ۇيلەنۋگە ۇسىنىس جاساعان جىگىتتەر بولدى، ءبىراق تاڭداپ جۇرە بەرىپپىن»، - دەيدى ءداميرا.
وسى ساتتە شىراقشى ءداميراعا قابىرعادا ىلۋلى تۇرعان توي كويلەكتەرىنىڭ ءبىرىن كيۋدى ۇسىنعان. ءداميرا دا بىرنەشە مارتە كەلىپ ۇيرەنىپ قالعاندىقتان، ارتىق سۇراق قويماستان اپپاق توي كويلەگىن كيىپ الدى. ال شىراقشى اپا قىزدىڭ يىعىنا اق جاۋلىق سالىپ، باسىنا ساۋكەلە كيگىزدى. ءسويتتى دە ءداميراعا قۇران كىتاپتار، ءتاسپى، قامشى سەكىلدى زاتتار تۇرعان ۇستەلدى ءۇش رەت اينالىپ شىعۋدى بۇيىردى. ال ءوزى الاقانىن جايىپ، اللادان ءداميرانىڭ جولىنىڭ اشىلۋىن تىلەپ، دۇعا ەتتى.
مۇنداي ءراسىمدى سارىاعاش اۋدانىنا قاراستى اباي اۋىلىنان كەلگەن گۇلسارا دا قايتالادى. ونىڭ دا جاسى 32 دە، «قىز اۋليەگە» وسىمەن ءۇشىنشى رەت كەلىپ وتىر ەكەن. گۇلسارا تۇرمىسقا شىعاردان بۇرىن دەنساۋلىعىنىڭ تۇزەلىپ كەتۋىن تىلەپ كەلىپتى.
«مەنى بۇل جەرگە جەڭگەم ەرتىپ كەلگەن. ول كەزدەرى مەنىڭ دەنساۋلىعىم ناشار بولاتىن. بولماشى نارسەگە اشۋلانىپ، ءوز-ءوزىمدى ۇستاي الماي قالاتىنمىن. «قىز اۋليەگە» كەلگەلى بەرى جاقسىمىن. الدىمەن اللانىڭ، سوسىن وسى كيەلى جەردىڭ قاسيەتىنىڭ ارقاسىندا ءوزىمدى جاقسى سەزىنىپ ءجۇرمىن. بۇل جەرگە مەن سەكىلدى جاسى وتىزدان اسىپ كەتكەن، تۇرمىسقا شىعا الماي جۇرگەن قىزدار وتە كوپ كەلەدى. وزدەرىمەن بىرگە ازىق-تۇلىك نەمەسە ۇيىنەن اس دايىنداپ اكەلەدى. كوبىنە جولىمداعى تۇيىندەر شەشىلسىن دەپ ءتۇشپارا ءتۇيىپ اكەلەدى، نەسىبەم كۇرىشتىڭ دانىندەي كوپ بولسىن دەپ پالاۋ پىسىرەدى. جەتى كۇننەن بەرى وسى جەردە تۇنەپ ءجۇرمىن. ساۋاپ جينايىن دەپ كەلگەن-كەتكەندەردىڭ اس-سۋىن دايىندايمىن، شىراقشى اپاعا جاردەمدەسەمىن. ءارى وسى جەردە جۇرگەن سۇلتانعالي ەسىمدى كىسىگە وقىتىلامىن»، - دەيدى گۇلسارا.
دەرەككوز: Zamana.kz
