الداعى قاڭتاردان باستاپ قارۋدى زاڭسىز الىپ جۇرگەن ازاماتتار قىلمىستىق جاۋاپكەرشىلىككە تارتىلادى

بۇل تۋرالى ق ر ىشكى ىستەر مينيسترلىگىنىڭ تاراتقان ۇندەۋىندە جاريالانىپ وتىر.

مينيسترلىكتىڭ مالىمەتىنە قاراعاندا، تراۆماتيكالىق قارۋدى (جاراقات سالاتىن پاتروندارمەن اتۋ مۇمكىندىگى بار ۇڭعىسىز جانە گازدى اتىس قارۋىن) ازاماتتىق اينالىمدا تىيىم سالۋعا بايلانىستى ىشكى ىستەر ورگاندارى 2015 -جىلعى 1 -قاڭتاردان باستاپ تراۆماتيكالىق قارۋدى ساقتاۋعا جانە الىپ جۇرۋگە ىشكى ىستەر ورگاندارىنىڭ رۇقساتى بار جەكە تۇلعالاردان ساتىپ الۋ بويىنشا جۇمىس جۇرگىزۋدە. ال ەرىكتى تۇردە تاپسىرىلعان تراۆماتيكالىق قارۋدى قابىلداۋدى 2016 -جىلعى 1 -قاڭتارعا دەيىن جۇزەگە اسىراتىن بولادى. وسىعان بايلانىستى، ىشكى ىستەر مينيسترلىگى قازاقستان رەسپۋبليكاسىنىڭ تراۆماتيكالىق قارۋدى ساقتاۋعا جانە الىپ جۇرۋگە رۇقساتى بار ازاماتتارىنا كورسەتىلگەن مەرزىمگە دەيىن (2016 -جىلعى 1 -قاڭتارعا دەيىن) ونى ەرىكتى تۇردە وتەمدى تاپسىرۋ تۋرالى ۇندەۋ جاريالادى.

«2016 -جىلعى 1 -قاڭتاردان باستاپ قىلمىستىق كودەكستىڭ 287-بابىنىڭ 2-بولىگىنە سايكەس تراۆماتيكالىق قارۋدى زاڭسىز يەمدەنگەنى، بەرگەنى، وتكىزگەنى، ساقتاعانى، تاسىمالداعانى نەمەسە الىپ جۇرگەنى ءۇشىن ازاماتتاردىڭ قىلمىستىق جاۋاپكەرشىلىگى كوزدەلگەن. بۇل رەتتە زاڭنامانى بۇزعاندار 2000 ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە ءبىر جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى. سونىمەن قاتار، ىشكى ىستەر ورگاندارىندا تراۆماتيكالىق قارۋ يەسى رەتىندە ەسەپتە تۇرعان جانە ولاردى 2016 -جىلعى 1 -قاڭتارعا دەيىن تاپسىرماعان ازاماتتار تۇرعىلىقتى جانە تىركەلگەن مەكەنجايلارى بويىنشا تەكسەرىلەدى»، دەلىنگەن ۇندەۋدە.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى