ءجۇرسىن ەرمان قىتايدىڭ قازاقتار ءجيى قونىستانعان ايماقتارىندا ايتىس وتكىزەتىندىكتەرىن ايتتى
بۇل تۋرالى بۇگىن «نۇر وتان» پارتياسىنىڭ باسپا ءسوز ورتالىعىندا وتكەن «التىن دومبىرا» رەسپۋبليكالىق اقىندار ايتىسىنىڭ قورىتىندىسىنا ارنالعان بريفينگ كەزىندە ايتىس اقىندارى مەن جىرشى، تەرمەشىلەردىڭ حالىقارالىق وداعىنىڭ ءتوراعاسى ءجۇرسىن ەرمان ايتتى.
«كەلەسى جىلى «نۇر وتان» پارتياسىنىڭ قولداۋىمەن ءتورت حالىقارالىق جانە رەسپۋبليكالىق دەڭگەيدە اقىندار ايتىسىن وتكىزۋدى جوسپارلاپ وتىرمىز. 2016 -جىلدىڭ 11 -ناۋرىزى كۇنى وزبەكستانداعى قازاق مادەنيەت ورتالىعىمەن بىرلەسىپ، تاشكەنتتە حالىقارالىق ايتىس وتكىزبەكپىز. وعان قازاقستان، وزبەكستان، موڭعوليا، قىتاي جانە رەسەيدىڭ ايتىسكەر اقىندارى قاتىسادى. ال رەسپۋبليكالىق دەڭگەيدە، كەلەسى جىلى يۋنەسكو-نىڭ دەڭگەيىندە اتالىپ وتەتىن الماتى قالاسىنىڭ 1000 جىلدىعى، تاۋەلسىزدىگىمىزدىڭ 25 جىلدىعى جانە جەكەلەگەن كاسىپكەرلەرلىڭ كومەگىمەن «تۇركىستان ەكى دۇنيە ەسىگى عوي» اتتى الامان ايتىس وتەدى. بۇدان بولەك ناۋرىز سياقتى مەرەكە- مەيرامدار دا ايتىسىز وتپەيتىنى بەلگىلى. ونىڭ سىرتىندا جىل سايىن ءداستۇرلى ءوتىپ كەلە جاتقان «التىن دومبىرا» قورىتىندى ايتىسى بار»، - دەدى اقىن ج. ەرمان.
سونداي-اق، ايتىس جاناشىرى شينجاڭ قازاقتارىنىڭ شاقىرتۋىمەن كەلەسى جىلى ناۋرىز ايىنىڭ باسىندا قىتايدىڭ قازاقتار ءجيى قونىستانعان ايماقتارىندا ايتىس وتكىزەتىندىكتەرىن ايتتى.
