ەلوردادا «ازاتتىق تۋى جەلبىرەپ...» اتتى ادەبي كەش وتۋدە
كەش شىمىلدىعىن تۇرگەن تىلدەردى دامىتۋ باسقارماسىنىڭ باسشىسى تىلەۋعالي قىشقاشبايەۆ «ازاتتىقتى اڭساعان ازات ەلدىڭ وتكەنى، بۇگىنى مەن كەلەشەگى ءبىر-بىرىمەن ساباقتاسا، بىتە قايناسا، ءان مەن كۇي، وي مەن پىكىر تولقىنىندا ۇيلەسە بايلانىساتىن، رۋحاني مانگە تولى مەرەكەلىك كەشتىڭ جاستارعا بەرەر عيبراتى مول» ەكەنىن جەتكىزدى.
«بارشالارىڭىزدى الداعى تاۋەلسىزدىك مەرەكەسىمەن قۇتتىقتايمىن. ءاردايىم كوك تۋىمىز جەلبىرەپ، ەلىمىز الەمگە جارقىراي بەرسىن. ءبىزدىڭ ەلدىڭ تاۋەلسىزدىگى ماڭگىلىك بولادى»، - دەدى قۇتتىقتاۋ سوزىندە ت. قىشقاشبايەۆ.
جالپى، كەشكە پارلامەنتى ءماجىلىسىنىڭ دەپۋتاتتارى، زيالى قاۋىم وكىلدەرى، جەلتوقسان وقيعاسىنىڭ كۋاگەرلەرى مەن تاۋەلسىزدىك قۇرداستارى، ءتىل جاناشىرلارىمەن قاتار، دوسىمجان تاڭاتاروۆ، مارجان اراپبايەۆا، يبراگيم ەسكەندىر، سەكەن تۇرىسبەك سياقتى ءان مەن كۇيدىڭ جۇيرىكتەرى قاتىسۋدا.
كەش سوڭىندا استانا قالاسى بويىنشا مەملەكەتتىك ءتىلدىڭ قولدانۋ اياسىن كەڭەيتۋ جانە ناسيحاتتاۋعا ۇلەس قوسىپ جۇرگەن ۇجىمدار مەن جەكە تۇلعالار ماراپاتتالادى.
اۆتور: كەنجەكەي توقتامۇرات قىزى
