اتىراۋدا جەتى شاقىرىم تەرەڭدىككە دەيىن بۇرعىلاي الاتىن قوندىرعى جاساپ شىعارادى - اكىم

بۇل قوندىرعى قازاقستاندا عانا ەمەس، رەسەيدە دە سۇرانىسقا يە.

بۇل تۋرالى بۇگىن استانا باسپا ءسوز ءماسليحاتىن وتكىزگەن اتىراۋ وبلىسىنىڭ اكىمى باقتىقوجا ىزمۇحامبەتوۆ ءمالىم ەتتى.

«وبلىستا ەكى جىلدىڭ ىشىندە امەريكالىق جانە يتالياندىق تەحنولوگيامەن جۇمىس جاسايتىن ەكى ءۇي قۇرىلىسى كومبيناتى ىسكە قوسىلدى. سونىڭ ناتيجەسىندە، وبلىس قۇرىلىس ءۇشىن اسا قاجەتتى بەتون بۇيىمدارمەن تولىقتاي قامتاماسىز ەتىلدى. قازاقستاندا العاش رەت جەتى شاقىرىم تەرەڭدىككە دەيىن بۇرعىلاي الاتىن بۇرعىلاۋ قوندىرعىسى جاسالدى. وبلىستا شىعىپ جاتقان بۇرعىلاۋ قاشاۋلارى تەحنيكالىق كورسەتكىشتەرى بويىنشا الەمدىك ستاندارتقا تولىقتاي سايكەس كەلەدى جانە باعالارى تومەن. سونىڭ ارقاسىندا، بۇرعىلاۋ قاشاۋلارىنا سۇرانىس تەك قازاقستاندا ەمەس، رەسەيدەن دە ارتىپ وتىر»، - دەپ حابارلادى ايماق باسشىسى.

ب. ىزمۇحامبەتوۆ ءمالىم ەتكەندەي، اتىراۋدا سونىمەن قاتار بۇرىن تەك قانا شەتەلدەن قىمبات باعاعا قيىندىقپەن تاسىمالداناتىن سالماعى بەس ءجۇز توننادان اساتىن اسا اۋىر جانە ۇلكەن تەمىر قوندىرعىلار شىعا باستاعان. جالپى، اكىمنىڭ ايتۋىنشا، ايماق 2015 -جىلى جالپى قۇنى 29 ميلليارد تەڭگە بولاتىن 11 جوبا ىسكە قوسۋدى جوسپارلاپ وتىر.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى