ءجۇرسىن ەرمان: «التىن دومبىرا» اسپانبەككە ەش تالاسسىز بەرىلدى
«مەن وسىنداي جاس، تالانتتى اقىنداردىڭ شىعىپ كەلە جاتقانىنا قۋانامىن. كۇللى قازاقتىڭ ارعى- بەرگى تاريحىن جىرلاعاندا، كوزىڭە جاس ۇيىرىلتەدى. تۇيدەك- تۇيدەك تەڭەۋلەرى توبەڭنەن بۇلت بولىپ كوشكەندە، كوز الدىمدا بۇقار جىراۋ وتىرعانداي سەزىنەمىن. «اقىننىڭ قۇلاعى وزىنەن قىرىق جىل بۇرىن تۋادى» دەيدى عوي. سۇراستىرسام، اسپانبەك اتاسى مەن اجەسىنىڭ تاربيەسىن كورىپ، كونە ءسوزدىڭ كوبىن قۇلاعىنا قۇيىپ وسكەن بالا ەكەن. بىلگەنىنىڭ بارلىعىن اسا شەبەرلىكپەن ايتىپ، كوركەم ايتىس جاسادى. سوندىقتان «التىن دومبىرا» يەگەرىن ءبىز تالاسسىز تاڭدادىق. اسپانبەك ايتىستىڭ اسپانىندا ءالى تالاي جارقىراپ كورىنىپ، ءبارىمىزدىڭ كوز قۋانىشىمىزعا اينالادى دەپ سەنەمىن»، - دەگەن ايتىس جاناشىرى ەكى كۇنگە جالعاسقان «التىن دومبىرا» ايتىسىنىڭ جوعارى دەڭگەيدە وتكەنىن جەتكىزدى.
ايتا كەتەيىك، «نۇر وتان» پارتياسىنىڭ قولداۋىمەن 5-6 -جەلتوقسان كۇندەرى الماتىدا «تاۋەلسىزدىككە تاعزىم» اتتى «التىن دومبىرا» رەسپۋبليكالىق اقىندار ايتىسى ءوتتى. جىر سۇلەيلەرى ايبەك قاليەۆ، مۇحتار نيازوۆ، اسەم ەرەجە قىزى، مەيىربەك سۇلتانحان جانە جاس اقىندار جانىبەك بەيبىت ۇلى، ەرجان ءامىروۆ، نۇرلان ەسەنقۇلوۆ قاتارلى 22 اقىن قاتىسقان جىر دوداسىنىڭ باس جۇلدەسىن پاۆلودارلىق اقىن اسپانبەك شۇعاتايەۆ جەڭىپ العان بولاتىن.
