تارازدا ەرەكشە قابىلەتتى «ماگنيت بالا» بار
بۇگىندە جاسى 6 عا ەندى تولىپ وتىرعان نۇرداۋلەتتىڭ ەرەكشە قابىلەتىن اتا- اناسى جاقىندا عانا بايقاپتى. قازىر بالانىڭ وسى قاسيەتى كۇن ساناپ ارتىپ كەلەدى.
نەمەرەسىنىڭ وسى قابىلەتىن ەڭ ءبىرىنشى بولىپ اتاسى بايقاپتى. ول تەلەديداردان ءبىر قاريانىڭ دەنەسىنە تەمىر زاتتاردى جابىستىرىپ جاتقانىن كورىپ، سونى وزىنە جاساماق بولعان. ەشتەڭە شىقپاعان سوڭ جانىندا ويناپ جۇرگەن نەمەرەسىنىڭ كەۋدەسىنە قاسىقتى قويىپ كورىپ، تاڭعالارلىق جايتقا كەزىگەدى.
«اتا ماعان: «قاسىق اكەل» دەدى. اكەلىپ بەرىپ ەدىم، اتاعا جابىسپادى. ماعان جابىستى. سوسىن ۇيدەگىلەردىڭ ءبارىن شاقىرىپ، ايتىپ بەردى» ، - دەيدى نۇرداۋلەت ارىستانبەك. قازىر بالا مەكتەپتىڭ دايارلىق توبىندا وقيدى. العاشىندا ونىڭ كەۋدەسىنە تەك ءبىر قاسىق قانا جابىسقان ەكەن. كەيىن كەلە بويىنداعى بەلگىسىز كۇش كۇننەن- كۇنگە ارتا ءتۇسىپتى. وسىلايشا سوڭعى 10 كۇندە تارتىلىس بىرنەشە ەسەگە وسكەن. ال قازىر ونىڭ دەنەسى تۇتاس پلانشەتتى ۇستاپ تۇرا بەرەدى.
«دەنەسىنە جابىساتىن زاتتار سانى كۇن وتكەن سايىن كوبەيىپ جاتىر. قازىر ءتورت، التى قاسىققا دەيىن باردى. سودان كەيىن ۇيالى تەلەفوندى جابىستىرۋ تۋرالى وي كەلىپ، ونى دا كوردىك» ، - دەيدى نۇرداۋلەتتىڭ اتاسى ارىستانبەك قاراقۇلوۆ.
بالانىڭ اتا- اناسى ادەپكىدە بۇدان ەپتەپ سەكەم العاندارىن دا جاسىرىپ وتىرعان جوق. سودان كەيىن ولار بىردەن دارىگەرگە جۇگىنىپ، ۇلدارىن مەديتسينالىق تەكسەرۋدەن وتكىزگەن. پسيحولوگقا دا بارىپتى. الايدا، ماماندار بالا دەنساۋلىعىنا كەلەر قاۋىپتىڭ جوق ەكەنىن ايتىپ، بۇلاردىڭ كۇدىكتەرىن باسقان.
«بالانىڭ دەنساۋلىعىندا كىنارات جوق. ەشقانداي شاعىم ايتپايدى. مۇنداي قۇبىلىستار نەگىزى ادامنىڭ، سونىڭ ىشىندە بالانىڭ دەنساۋلىعىنا ەش زيان كەلتىرمەيدى. سوعان قاراماستان، ءبىز بارلىعىن باقىلاۋدان وتكىزەمىز. نۇرداۋلەت - وتە زەرەك بالا. قازىردىڭ وزىندە باعدارلامادان تىس جاتتىعۋلاردى ورىنداپ، قاتارلارىنان الدەقايدا الدا كەلەدى. ءتىپتى، اعىلشىن ارىپتەرىن دە جاتتاپ العان. ول بولاشاقتا عارىشكەر بولۋدى ارماندايدى» ، - دەيدى بالالار دارىگەرى مەرۋەرت ايىمبەكوۆا.
دامير قوجامقۇل.
«ەگەمەن قازاقستان»
