قازاقستاننىڭ قۇس وسىرۋشىلەر وداعى جۇمىرتقا باعاسىنا قاتىستى تۇسىنىكتىمە تاراتتى
وسىعان وراي، قۇس وسىرۋشىلەر وداعى باعا ساياساتىنا جۇمىرتقانىڭ ماۋسىمدىق ونىمدىلىگى اسەر ەتىپ وتىرعانىن العا تارتادى. بۇل تۋرالى وداقتىڭ باسپا ءسوز قىزمەتىنەن حابارلاندى.
قۇس وسىرۋشىلەر بۇل رەتتە جازعى ماۋسىمداردا قۇس فابريكالارىنىڭ ونىمىنە باعانىڭ 6-8 تەڭگەدەن اسپايتىنىن العا تارتادى. ال كۇزگى- قىسقى مەرزىم ارالىعىندا وتكىزۋ باعاسى 17-20 تەڭگەنى قۇرايدى. سالىستىرمالى تۇردە العاندا اعىمداعى كەزەڭ بويىنشا 2014 -جىلدىڭ وتكىزۋ باعاسى 15-16 تەڭگەنى قۇراعان.
بۇدان بولەك، تاراتىلعان مالىمەتتەرگە قاراعاندا بۇگىنگى تاڭدا 1 جۇمىرتقانىڭ وزىندىك باعاسى - 13 تەڭگەدەن اسادى. ال ءونىمنىڭ وزىندىك قۇنى ەڭ ءبىرىنشى كەزەكتە 40 پايىزىنا دەيىن اسەر ەتەتىن جەم باعاسىنا تاۋەلدى. ايتا كەتەرلىگى، سوڭعى ەكى اي ىشىندە ەلىمىزدە جەم باعاسى ەكى ەسەگە دەيىن كوتەرىلگەن.
«ەگەر قازان ايىندا كۇنباعىس شروتىن كەلىسىنە 42 تەڭگەدەن الساق، قاراشا ايىندا 78 تەڭگە بولدى. ال سويا شروتى كەلىسىنە 93 تەڭگەدەن 138 تەڭگەگە كوتەرىلدى. باسقا اۋىل شارۋاشىلىعى داقىلدارىمەن قاتار جەمنىڭ نەگىزى بولىپ تابىلاتىن قۇراما جەم جۇمىرتقانىڭ وزىندىك قۇنىنا 50 پايىزعا اسەر ەتەدى. بۇنىڭ ءوزى سوڭعى ۋاقىتتا ايتارلىقتاي قىمباتتادى، ەگەر 4 سۇرىپتى بيدايدى ءبىز 26 مىڭ تەڭگەگە الىپ كەلسەك، قازىر 36 مىڭ تەڭگەگە ارتتى»، - دەپ تۇسىندىرەدى باعاعا قاتىستى ساۋالدارعا «ءۇش بۇلاق 2005» ج ش س ديرەكتورى دياس يسانوۆ.
بۇل رەتتە قۇس وسىرۋشىلەر مونوپولياعا قارسى كوميتەت تاراپىنان باعانىڭ قاتاڭ باقىلاۋ جاعدايىندا ءومىر ءسۇرىپ جاتقانىن، ءسال عانا كوتەرۋدىڭ ءوزى ۇلكەن ايىپپۇلعا سوقتىراتىنىن العا تارتادى. سونىمەن قاتار، قازىر ەلىمىزدەگى بارلىق قۇس فابريكالارىنا تەرگەۋلەر جۇرگىزىلىپ جاتقان كورىنەدى. ال كەيبىر قۇس شارۋاشىلىقتارىنا 30 ميلليون تەڭگەدەن استام ايىپپۇل سانكتسيالارى سالىنعان.
«قۇس فابريكالارى جۇمىرتقانى ءار داناسىن 18 تەڭگەدەن شىعارادى، ال سۋپەرماركەتتەردە ءبىز ون داناسىنىڭ 350-400 تەڭگەگە ساتىلىپ جاتقانىن كورىپ وتىرمىز. سوندا تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتى تەك قۇس شارۋاشىلىعى سۋبەكتىلەرىن قاداعالاپ، سالانىڭ دامۋىنا ەش مۇمكىندىك بەرمەي وتىرعان جوق پا؟ سونىمەن قاتار، بولشەك ساۋدادا ازىق- تۇلىك باعاسىن ءوندىرۋشى عانا ەمەس، ساتۋشىلار دا قالىپتاستىراتىنى بەلگىلى عوي. بۇل جەردە، باعا ساياساتىن ساۋدا جەلىلەرى ايقىنداپ وتىر. سوندىقتان دا، جۇمىرتقا باعاسىنا قاتىستى سۇراقتاردىڭ بارلىعىن سول جاققا جولداساق ەكەن، مۇمكىن ولار جۇمىرتقا باعاسىنا ماۋسىمدىق قۇبىلىستارعا قاتىستى جاعدايدى تۇسىندىرەر»، - دەيدى قازاقستان قۇس وسىرۋشىلەر وداعىنىڭ پرەزيدەنتى رۋسلان شاريپوۆ.
اۆتور: قانات مامەتقازى ۇلى
