بەيجىڭ قويۋ ءتۇتىن استىندا قالدى
بىرنەشە كۇن بويى تازا اۋامەن تىنىس الىپ قالعان قىتايلىقتار ۇيرەنشىكتى بولىپ كەتكەن بەتپەردەلەرگە قايتا ورالۋعا ءماجبۇر.
ال بيلىك ەكولوگيالىق ءقاۋىپتىڭ «قىزعىلت» دەڭگەيىن جاريالاپ وتىر. بەيجىڭدەگى ەكولوگيالىق جاعدايدىڭ ناشارلاۋىنا بايلانىستى اسپان استى ەلىنىڭ بيلىگى شاھارداعى بارلىق بالاباقشالار مەن مەكتەپتەرگە سىرتتا ساباق وتكىزۋىنە ءۇزىلدى- كەسىلدى تىيىم سالىپ وتىر. بۇل شەشىم الداعى 3 كۇن ىشىندە كۇشىن جويماۋى ءتيىس. ال وقۋشىلاردىڭ قامىن ويلاپ، ولاردىڭ سىرتقا شىقپاۋىن سۇراعان كەيبىر ءبىلىم مەكەمەلەرى تىپتەن عالامتور ارقىلى ساباق جۇرگىزۋدى ۇيعارىپتى.
حۋ لۋن، جەرگىلىكتى تۇرعىن:
- مەن كۇنى بويى كەڭسەدە وتىرىپ جۇمىس ىستەيمىن. سول سەبەپتى كەشكىسىن ۇيگە جاياۋ قايتقاندى ۇناتامىن. ال دالادا مىناداي كورىنىس بولسا، تازا اۋا تۋرالى ۇمىتۋعا تۋرا كەلەدى. زياندى گازدار كەيبىر تۇرعىنداردىڭ بەرەكەسىن قاشىرىپ جاتسا، كەيبىرەۋلەرى ودان تۋىندىلار جاساپ الەك. ماسەلەن، قىتايلىق سۋرەتشى ارنايى قۇرىلعىنىڭ كومەگىمەن قالاداعى ءتۇتىندى جيناعان. ارتىنشا ونى ساز بالشىقپەن ارالاستىرىپ، كىرپىش باسىپ شىعارىپتى. جاس جىگىت بۇل ارەكەتى ارقىلى الەم حالقىنىڭ نازارىن بەيجىڭنىڭ ەكولوگيالىق جاعدايىنا اۋدارماق بولسا كەرەك. شىنجىن قالاسىنىڭ تۇرعىنى:
- كوپ ادام مەنىڭ بۇل قىلىعىمدى اقىلعا قونىمىز ارەكەت دەپ ەسەپتەۋى مۇمكىن. الايدا لاس اۋامەن تىنىس الۋ - ودان دا بەتەر اقىماقتىق، مەنىڭشە. مەن العاشىندا بەيجىڭگە كەلگەندە بەتىمدى تۇمشالاپ الاتىنمىن. الايدا ودان ەش پايدا بولعان جوق. بۇل قيىندىقتى بەتپەردە تاعۋ ارقىلى شەشۋ مۇمكىن ەمەس، ارينە. جالپى اسپان استى ەلىنىڭ بيلىگى اۋانىڭ لاستانۋىمەن كۇرەس جونىندەگى باعدارلامانى وسىدان ءبىر جىل بۇرىن ىسكە قوسقان بولاتىن. الايدا شەنەۋنىكتەر 2030 -جىلعا دەيىن جوسپارلانعان كورسەتكىشكە قول جەتكىزە الماۋىمىز مۇمكىن دەپ ۇرەيلەنەدى.
www.24.kz
