قازاقستاندىق سپورتشىلاردىڭ مىقتى دەمەۋشىلەرى كىمدەر؟ - فوتو
اسىرەسە، ءىرى دودالاردا توپ جارعان سپورتشىلارعا لاۋازىمدى تۇلعالار مەن قالتالى ادامداردىڭ دەمەۋشىلىك تانىتاتىنىن ءجيى بايقاۋعا بولادى.
وسى ورايدا، NUR. KZ ەلىمىزدەگى سپورتشىلارعا قولداۋ كورسەتىپ جۇرگەن كاسىپكەرلەر مەن ساياساتكەرلەر ءتىزىمىن نازارلارىڭىزعا ۇسىنادى.
تيمۋر قۇلىبايەۆ، ۇلتتىق وليمپيادا كوميتەتىنىڭ ءتوراعاسى، قوعام قايراتكەرى:
تيمۋر قۇلىبايەۆتى قازاقستاندىق بوكسشىلاردىڭ باستى جانكۇيەرى دەسەك، ارتىق ەمەس. قازاقستان بوكس فەدەراتسياسىنىڭ پرەزيدەنتى قىزمەتىن اتقاراتىن ول وتاندىق بىلعارى قولعاپ شەبەرلەرىنە بارلىق جاعدايدى جاساپ بەردى.
AIBA- مەن (حالىقارالىق اۋەسقوي بوكس فەدەراتسياسى) وڭدى بايلانىس ورناتا بىلگەن قۇلىبايەۆ اتالعان ۇيىم پرەزيدەنتى چينگ كۋو ۆۋمەن دە جاقسى بايلانىستا.
ءاربىر ءىرى جارىستاردان ورالعان قازاقستان قۇراماسىنىڭ بوكسشىلارىن قوماقتى سىياقىمەن قۋانتاتىن تيمۋر اسقار ۇلىنىڭ سۇيىكتى بوكسشىسى دەپ دانيار ەلەۋسىنوۆتى اتاۋعا بولادى. 69 كەلى سالماقتا جۇدىرىقتاساتىن ەلەۋسىنوۆكە قارجىلاي قولداۋدان بولەك، 2013-جىلعى الەم چەمپيوناتىنداعى جەڭىسى ءۇشىن شەتەلگە دەمالۋ جولداماسىن دا سىيعا تارتقان بولاتىن. بوكس جانكۇيەرلەرىنىڭ اراسىندا دانيار تەك تيمۋر قۇلىبايەۆتىڭ عانا ەمەس، AIBA پرەزيدەنتىنىڭ دە سۇيىكتى بوكسشىسى دەگەن اقپار بار.
كەڭەس راقىشەۆ، دزيۋدو فەدەراتسياسىنىڭ پرەزيدەنتى، كاسىپكەر:
2012-جىلعى لوندون وليمپياداسىندا ەل دزيۋدوشىلارى وتە تومەن ناتيجە تىركەگەن سوڭ، اتالعان سپورت تۇرىنە ەرەكشە كوڭىل بولىنە باستادى. باپكەرلەر قۇرامى اۋىستىرىلىپ، باسشىلىق قۇرامدا دا وزگەرىس ورىن الدى. قازاقستان دزيۋدو فەدەراتسياسىنىڭ پرەزيدەنتى بولىپ كەڭەس راقىشەۆ تاعايىندالدى.
وسىدان سوڭ، ەلىمىزدەگى دزيۋدو سپورتىنىڭ تامىرىنا قان جۇرە باستادى دەۋگە نەگىز بار. سپورتشىلاردىڭ كورسەتكىشتەرى جاقسارىپ، الەمدىك جارىستارداعى جۇلدەلەر سانى كوبەيدى. ال الەم چەمپيونى اتانعان ەلدوس سمەتوۆ پەن 2013-جىلعى كۇمىس جۇلدەگەر ازامات مۇقانوۆتى راقىشيەۆ ءىرى كولەمدەگى سىياقىمەن قۋانتتى.
باۋىرجان وسپانوۆ، «جەر-سۋ» كورپوراتسياسىنىڭ پرەزيدەنتى، مەتسەنات:
قازاق سپورتشىلارىنا ەرەكشە قولداۋ كورسەتەتىن تۇلعالاردىڭ ءبىرى - باۋىرجان وسپانوۆ. تانىمال كاسىپكەر بۇگىندە قازاقستان كۇرەس تۇرلەرى فەدەراتسياسىندا قىزمەت ەتۋدە. بۇدان بولەك، ەلىمىزدەگى تانىمال بوكسشىلاردى ءوز قامقورلىعىنا العان.
اتاپ ايتار بولساق، مەتسەنات قىتاي قۇراماسىنىڭ ساپىندا بەيجىڭ وليمپياداسىنىڭ قولا جۇلدەگەرى اتانعان قانات يسلامنىڭ قازاقستانعا ورالۋىنا سەپتىگىن تيگىزدى. بوكسشى ءوز سۇحباتتارىندا الماتى ماڭىنان ءۇي الۋىنا دا باۋىرجان وسپانوۆتىڭ كومەكتەسكەنىن ايتىپ ءجۇر. وسپانوۆتى قانات يسلامنىڭ كاسىبي بوكسقا اۋىسىپ، ەلەۋلى تابىسقا جەتۋىنە ۇلەس قوسقان باستى تۇلعالاردىڭ ءبىرى دەسەك، ارتىق ەمەس.
قاناتتان بولەك، بوكستان 2013-جىلعى الەم چەمپيونى جانىبەك ءالىمحان ۇلى مەن كاسىبي بوكسشى جانقوش تۇراروۆ تا باۋىرجان وسپانوۆتىڭ قولداۋىن سەزىنىپ جۇرگەن سپورتشىلار.
قانات بوزىمبايەۆ، پاۆلودار وبلىسىنىڭ اكىمى:
بۇگىندە پاۆلودار وبلىسىن باسقاراتىن قانات بوزىمبايەۆ جامبىل وبلىسىنىڭ اكىمى قىزمەتىندە جۇرگەندە بالۋان بەيبىت ىستىبايەۆقا ەرەكشە قولداۋ كورسەتكەن جانداردىڭ ءبىرى. بوزىمبايەۆ تەك جەڭىسكە جەتكەندە عانا ەمەس، ىستىبايەۆ جەڭىلىسكە ۇشىراسا دا كومەگىن اياعان ەمەس.
ماسەلەن، قانات بوزىمبايەۆ 2013-جىلعى «قازاقستان بارىسى» باسەكەسىندە داۋلى جەكپە-جەكتەن سوڭ جەڭىلىپ قالعان بەيبىتتى ۇتىلعانىنا قاراماستان، تارازدا قىمبات كولىكپەن قارسى العان بولاتىن. بۇگىندە اكىم باسقا وبلىستى باسقارۋعا كەتسە دە، بەيبىتپەن بايلانىسىن ۇزگەن ەمەس.
بۇدان بولەك، ەلىمىزگە تانىمال بالۋان وزىنە جەڭىستە دە، جەڭىلىستە دە قولداۋ كورسەتىپ جۇرگەن باعبان تايىمبەتوۆ، ازامات مەلدىبەكوۆ، ايدوس مايلىتايەۆ، داۋرەن سەرىك ۇلى جانە عالىمجان ساعىنتايەۆ سەكىلدى جومارت اعالارىنىڭ بارىن دا جاسىرمادى.
ازات پەرۋاشەۆ، ءماجىلىس دەپۋتاتى:
«اق جول» پارتياسىنىڭ ءتوراعاسى ازات پەرۋاشەۆ بەيجىڭ وليمپياداسىنان سوڭ بوكسشى باقىت سارسەكبايەۆقا قولداۋ كورسەتىپ ءجۇردى. سارسەكبايەۆتىڭ «اق جول» پارتياسىنىڭ مىنبەرىنەن تالاي رەت ءسوز سويلەگەن كەزدەرى دە بولعان. ب ا ق- تا پەرۋاشەۆتىڭ سارسەكبايەۆقا پاتەر سىيلاعانى تۋرالى دا اقپارات بار. الايدا، بۇگىندە ەكى تانىمال تۇلعانىڭ اراسى الشاقتاپ كەتتى.
دانيار قاسقاراۋوۆ، «الاش پرايد» كلۋبىنىڭ پرەزيدەنتى:
ەلىمىزدەگى ەرەجەسىز جەكپە-جەك سپورتىن ءبىر ىزگە ءتۇسىرىپ، «جاۋىنگەر» سپورتشىلارعا قولداۋ كورسەتىپ كەلە جاتقان تۇلعالاردىڭ ءبىرى - دانيار قاسقاراۋوۆ. «الاش پرايد» كلۋبىن اشىپ، وتاندىق سپورتشىلاردىڭ باسەكەلەرىن ۇيىمداستىرىپ جۇرگەن ول قايرات احمەتوۆ، ارمان وسپانوۆ سىندى تانىمال بالۋانداردى ءوز قامقورلىعىنا العان.
قىرىمبەك كوشەربايەۆ، قىزىلوردا وبلىسىنىڭ اكىمى:
قىزىلوردا وبلىسىنىڭ اكىمى قىرىمبەك كوشەربايەۆ تا سپورتشىلاردى ءجيى قۋانتىپ تۇرادى. جاقىندا عانا ول اۋىر اتلەتيكادان الەم چەمپيونى اتانعان الەكساندر زايچيكوۆكە ءۇش بولمەلى پاتەر سىيلاعان بولاتىن.
ەندى جاس مانەرلەپ سىرعاناۋشى، ماسكەۋدە تۋىلعان ەتنيكالىق قازاق سپورتشىسى ەليزابەت تۇرسىنبايەۆاعا قولداۋ كورسەتىپ ءجۇر. جاقىندا وتاندىق سايتقا بەرگەن سۇحباتىندا ەليزابەتتىڭ اكەسى بايتاق تۇرسىنبايەۆ قىرىمبەك كوشەربايەۆتىڭ باستاماسىمەن قىزىنىڭ قىزىلوردا وبلىسى اتىنان سىنعا ءتۇسىپ جۇرگەنىن، اكىمنىڭ ۇنەمى قولداۋ كورسەتىپ تۇراتىنىن ايتقان.
مارات تۇرلىحانوۆ، باپكەر، ءانشى:
«يكان» لاقاپ اتىمەن تانىلعان ءانشى مارات تۇرلىحانوۆ گرەك-ريم كۇرەسىندەگى بالۋاندارعا، اسىرەسە، نۇرماحان تىناليەۆكە قولداۋ كورسەتەتىنىمەن تانىمال. تۇرلىحانوۆ الەم چەمپيوناتتارى مەن وليمپيادا ويىندارىنا دايىندىق كەزىندە نۇرماحان تىناليەۆ پەن اسەت مامبەتوۆتى ماسكەۋدە بولەك جاتتىقتىرىپ، ولاردىڭ پاتەراقىسىنا دەيىن ءوز قالتاسىنان تولەگەنى تۋرالى جاتتىقتىرۋشىلاردىڭ ءبىرى باياندادى.
ال اۋىر اتلەت، 2 دۇركىن وليمپيادا چەمپيونى يليا يلين مەن مانەرلەپ سىرعاناۋدان وليمپيادا ويىندارىنىڭ جۇلدەگەرى دەنيس تەندى «استانا» كاسىبي سپورتتىق كلۋبى ءوز قاراماعىنا العان. وسى ورايدا، يليا يليندى پرەزيدەنت نۇرسۇلتان نازاربايەۆتىڭ سۇيىكتى سپورتشىسى دەپ اتاۋعا بولادى.
سەبەبى، بەيجىڭ وليمپياداسىنان سوڭ باپكەرلەرمەن كەلىسپەي، باسى داۋعا قالعان يلياعا قولداۋ كورسەتىپ، تەك دايىندىقتى ويلاۋ كەرەكتىگىن پرەزيدەنت ايتقان بولاتىن.
2014-جىلعى الەم چەمپيوناتىندا يلين ءتورتىنشى رەت الەم چەمپيونى اتانعان ساتتە، سپورتشىنى پرەزيدەنتتىڭ ءوزى ارنايى قۇتتىقتادى.
