قايرات نۇرتاس ءوزىنىڭ وتباسى تۋرالى سۇراقتان تاعى دا جالتارىپ كەتتى
جۋرناليست 27 گە كەلگەن ازاماتتىڭ جانۇياسىن نەگە جاسىراتىنىن ايتىپ، ءانشىنى تىعىرىققا تىرەدى.
ومىرىندەگى قىزىقتى وقيعالارىن قايرات نۇرتاس پەن ونىڭ وتباسى «قازاقستان» تەلەارناسىنداعى «دارا جول» باعدارلاماسىندا جۋرناليست دانا نۇرجىگىتپەن ءبولىستى. ءارتىس جايلى ەستەلىكتەرىن لاكي كەسوگلۋ، ونەردەگى ارىپتەسى ەركىن نۇرجان ۇلى، جانكۇيەرى نازىم بيباتىروۆا دا ورتاعا سالدى.
قايرات نۇرتاس «ارمان» اتتى تۇڭعىش ءانىنىڭ حيتقا اينالعانىن العاش رەت باراحولكادان بىلگەن. ءانشى ارنايى بازارعا بارىپ، حالىقتىڭ نە تىڭداپ جاتقانىن تەكسەرىپ كورگەن. ءبىرىنشى ءانى حيت بولعان سوڭ، ءوزىن «جۇلدىز» سەزىنگەن ءانشى كەشكىلىك ونەر كورسەتەتىن كافەگە كەلىپ، تالاپتارىن ايتا باستاپتى.
«كافەگە كولونكا قويىڭدار، كوبىرەك جارىق قويىڭدار، كافەنى تازا ۇستاڭدار دەپ اقىرىن ايتا باستادىم»، - دەيدى قايرات اڭگىمەسىندە.
ايتا كەتەرلىگى، ءانشىنىڭ العاشقى «ستاۆكاسى» 500-1000 تەڭگە بولعان. بۇل جايىندا ءانشىنىڭ ءوزى بىلاي دەيدى: «العاشقى ستاۆكام 500-1000 تەڭگە بولدى. «سلەدۋيۋشايا پەسنيا پوسۆياشاەتسيا» دەپ ۇرا بەرەتىنبىز».
ال تانىمال تۇلعا بەكبولات تىلەۋحان قايراتتىڭ وزگە ارتىستەردەن ءبىر ەرەكشەلىگى - ورىسشا بىلمەي-اق، حالىققا تانىمال بولىپ كەتۋىن سۇيسىنە ايتتى. اتاقتى جىرشى قايراتتىڭ اتتىڭ قۇلاعىندا وينايتىن قابىلەتىن دە تەبىرەنە ءسوز ەتتى.
قايراتتىڭ شىعارماشىلىق جولىنىڭ باستاۋ العان شاعىندا حالىقتىڭ قانداي اندەردى تىڭدايتىنىن قايراتتىڭ اناسى ءارى پروديۋسەرى گۇلزيرا ايداربەكوۆا الدىمەن بازارداعى ارىپتەستەرىنەن سۇراپ العان ەكەن. ياعني، ۇلىنىڭ «سۇرانىسى كوپ ءانشى» بولۋى ءۇشىن اناسى ماركەتينگتىك زەرتتەۋ جۇرگىزگەن.
العاشقى «ارمان» ءانىن تانىمال ءارتىس 700 دوللارعا ساتىپ الىپتى. وسى انىمەن اتاعى بۇكىل ەلگە جايىلعان ءانشى العاشقى كونسەرتىن قىزىلوردادا بەرگەن. رەپەرتۋارىندا 7 ءان عانا بولعان قايرات كونسەرتتىڭ ۋاقىتىن تولتىرۋ ءۇشىن «ارمان» ءانىن ساحنادا 6-7 رەت ورىنداعان كورىنەدى.
باعدارلاما بارىسىندا جۋرناليست دانا نۇرجىگىتتىڭ «27 گە كەلگەن ازاماتسىز. مۇنداي ادامنىڭ وتباسى بولۋى زاڭدى نارسە. نەسىنە جاسىراسىز؟» دەگەن سۇراعىنان قايرات بۇل جولى دا جالتارىپ كەتتى.
اناسى گۇلزيرا ايداربەكوۆا كورەرمەندەردەن بۇل تاقىرىپتى قوزعاماۋىن ءوتىنىپ، جاقىندا كورەرمەندەرگە ۇلكەن جاڭالىق دايىنداپ جاتقاندىعىن جەتكىزدى. توسىن جاڭالىعىن تەلەارناعا كەلىپ جاريالاۋعا ۋادە بەردى.
Nur.kz
