جاپون جىگىتى قازاقتىڭ دومبىراسىن ناسيحاتتاپ ءجۇر - كەسكىن
ۇلتىمىزدىڭ باي مادەنيەتىنە دەگەن قۇمارلىق كۇنشىعىس ەلىنىڭ شىعارماشىل وكىلدەرىن قازاقستاننىڭ بايتاق دالاسىنا تارتۋدا. سولاردىڭ ءبىرى تاكاحاشي ناوكي ەسىمدى جاپون ونەرپازى دومبىرا، قىلقوبىز جانە سىبىزعىنى ءمىنسىز مەڭگەرىپ العان.
تاكاحاشي ناوكي - فۋكۋي پرەفەكتۋراسىنىڭ تۇرعىنى. اعىلشىن تىلىنەن ساباق بەرەدى. ۇلى دالا ەلىنىڭ اندەرى مەن كۇيلەرىن ناسيحاتتاۋ دا جاپون جىگىتىنىڭ بيىك ماقساتىنا اينالعان.
«قازاقستان - وتە كوركەم، تاڭعاجايىپ ەل. مەن وندا ءجيى بارا الماسام دا، سول جاقتا ۇيرەنگەن سۇيىكتى ءىسىمدى ءومىر بويى جالعاستىراتىن بولامىن»، - دەيدى تاكاحاشي ناوكي.
تاكاحاشيدىڭ قازاق اۋەندەرىنە دەگەن سۇيىسپەنشىلىگى 13 جىل بۇرىن كۇتپەگەن جەردەن ويانعان. كەزدەيسوق قولىنا تۇسكەن ديسكىدەن دومبىرانىڭ ءۇنىن ەستىگەن ول مۇنىڭ نەندەي اسپاپ ەكەندىگىن بىلۋگە قۇمارتادى. كوپ ۇزاماي، ىنتىزار بولعان دومبىراسى قولىنا تۇسەدى. سول ساتتەن باستاپ ونەرلى جىگىت كۇي تارتۋدى وزدىگىنەن ۇيرەنە باستاعان. كيەلى اسپاپتىڭ قۇدىرەتى كەيىن ونى قازاقستانعا جەتەلەپ الىپ كەلدى. بىلىكتى ۇستازدارمەن تانىسىپ، ءوزى ونەرپازدارمەن ارالاسقاننان كەيىن، تاكاحاشي «قازاقتىڭ مادەنيەتىنە تىپتەن قۇمارتتىم»، دەيدى.
ونىڭ تاڭداعان جارى دا قازاق قىزى ينارا سەرىكبايەۆا - استانا مەملەكەتتىك فيلارمونياسىندا قىزمەت ەتكەن كاسىبي مۋزىكانت. ول قازىر ونەردەگى ءارى ومىردەگى سەرىگىمەن بىرگە جاپونيا ساحنالارىندا ونەر كورسەتىپ ءجۇر، دەپ حابارلايدى 24.kz.
