الماتىدا «التىن دومبىرا» رەسپۋبليكالىق اقىندار ايتىسى باستالدى
وعان بۇكىل قازاقستان بويىنشا ايتۋلى 22 اقىن قاتىسۋدا.
«التىن دومبىرا» رەسپۋبليكالىق اقىندار ايتىسى وسىمەن ءتورتىنشى رەت ءوتىپ جاتىر. بۇل شارانىڭ نەگىزگى ماقساتى - تاۋەلسىزدىك كۇنى قارساڭىندا ەلىمىزدىڭ ءوتىپ بارا جاتقان جىل ىشىندە قول جەتكىزگەن تابىستارىن ولەڭ سوزبەن حالىققا جەتكىزۋ.
سونداي- اق، بيىل ءوزىنىڭ جيىرما بەس جىلدىعىنا قادام باسقالى تۇرعان تاۋەلسىز ەلىمىزدىڭ دامۋىنداعى قول بايلاۋ بولىپ وتىرعان كەيبىر كەلەڭسىز ماسەلەلەردى ايتۋ. بۇل ايتىس بۇعان دەيىن استانادا ءوتىپ كەلگەن بولاتىن. ال بيىل الماتى قالاسىنىڭ اكىمى باۋىرجان بايبەكتىڭ ۇسىنىسىمەن تاۋەلسىزدىكتىڭ التىن بەسىگى، ازاتتىعىمىزدىڭ التىن ورداسى الماتىدا وتكىزىلىپ وتىر» - دەدى «قازاقپارات» تىلشىسىنە بەرگەن سۇحباتىندا قازاقستاننىڭ ەڭبەك سىڭىرگەن قايراتكەرى، م. ماقاتايەۆ اتىنداعى سىيلىقتىڭ ەكى مارتە يەگەرى، اقىن ءجۇرسىن ەرمان.
سونىمەن قاتار، ول ەكى كۇنگە سوزىلاتىن ايتىسقا ناعىز مىقتى اقىندار جينالعانىن جەتكىزدى.
«بيىل جىل بويى ەلىمىزدىڭ بارلىق وڭىرلەرىندە قازاق حاندىعىنىڭ 550 جىلدىعىنا ارنالعان ۇلكەن ايتىستار ءوتتى. سول ۇلكەن ايتىستاردا توپ جارىپ، جەڭىمپاز اتانعان، جۇلدەگەر بولعان 22 اقىن بۇگىنگى الامان ايتىسقا كەلىپ وتىر. ولاردىڭ ىشىندە ايبەك قاليەۆ، بولاتبەك ورازبايەۆ، ەركەبۇلان قاينازاروۆ، اسپانبەك شۇعاتايەۆ، ەرەنعايىپ كۇزەمبايەۆ، قاليجان بىلداشەۆ، جانسايا مۇسينا، ماقسات اقانوۆ سىندى اۋزىمەن قۇس تىستىگەن اقىندار بار» - دەدى ج. ەرمان.
اۆتور: جاپپاربەرگەن ايبوتا
