ريو وليمپياداسىنا قازاقستان قانشا جولداماعا يە بولدى؟
ناقتىراق ايتساق، تۋرا 9 ايدان كەيىن، تامىزدىڭ 5 كۇنى برازيليانىڭ ريو- دە- جانەيرو قالاسىندا ХХХІ جازعى وليمپيادا ويىندارىنىڭ الاۋى تۇتانادى.
الەم نازارىن وزىنە ەرىكسىز بۇراتىن ءتورتجىلدىق دوداعا تورتكۇل دۇنيەنىڭ كىل مىقتىلارى قاتىساتىنى انىق. قازىردىڭ وزىندە ءار مەملەكەت وسى ءدۇبىرلى دودا ءۇشىن بەرىلەتىن ساناۋلى جولدامالاردى بارىنشا ءوز قورجىندارىنا جيناپ قالۋعا تىرىسىپ باعۋدا. قازاقستاندىق سپورتشىلار دا وليمپيادا جولدامالارى ساراپقا سالىناتىن ءبىرقانشا الەمدىك دودالاردا باقتارىن سىناپ، قازىرگە دەيىن سپورتتىڭ 10 تۇرىنەن 41 جولداماعا يەلىك ەتتى.
ءار سپورت ءتۇرىن تارقاتىپ، جەكە-جەكە توقتالىپ وتەيىك. ءبىرىنشى، كەشە عانا ا ق ش- تا وتكەن اۋىر اتلەتيكادان الەم بىرىنشىلىگىنەن 10 جولداماعا يەلىك ەتىپ قايتقان زىلتەمىرشىلەرىمىزدەن باستايىق.
سەبەبى، قازىرگە دەيىن قازاقستان سپورتشىلارىنىڭ ىشىندە اۋىر اتلەتتەرىمىز عانا ريو وليمپياداسىنا بەرىلەتىن جولدامالاردىڭ بارلىعىن (10 جولداما، 6 ەر، 4 ايەل) تولىق يەلەندى. ەندى ولار جولداما ماسەلەسىنە الاڭداماي، تەك جاتتىعۋعا كىرىسىپ، وليمپيادا ويىندارىندا جەڭىس تۇعىرىنان كورىنۋگە كۇش سالاتىن بولادى. ال، ناقتىلى ريوعا كىمدەردىڭ باراتىنىن الداعى ۋاقىتتا باپكەرلەر قۇرامى انىقتايتىن بولادى. ەستەرىڭىزگە سالا كەتەيىك، حيۋستونداعى الەم بىرىنشىلىگىندە قازاقستان ۇلتتىق قۇراماسى 2 التىن، 2 كۇمىس، 1 قولا مەدالعا قول جەتكىزىپ، جالپى ەسەپتە 3 ورىنعا تابان تىرەگەن بولاتىن.
قازىرگە دەيىن ەكىنشى كوپ جولداماعا يەلىك ەتكەن سپورتشىلارىمىز - جەڭىل اتلەتتەر. ولاردىڭ ەنشىسىندە 9 جولداما بار. جولداماعا يەلىك ەتىپ وليمپيادا ويىندارىنا باراتىن جەڭىل اتلەتتەرىمىز مىنالار: ولگا رىپاكوۆا، ۆيكتوريا زيابكينا، ولگا سافرونوۆا، گۇلجانات جاناتبەك، ميحايل كراسيلوۆ، يرينا سمولنيكوۆا، گەورگي شەيكو، يرينا ەكتوۆا، فلوريدا مينيانوۆا.
ال ءۇشىنشى كوپ جولداماعا يەلىك ەتكەن سپورتشىلارىمىز - ەسكەك ەسۋ سپورتىنىڭ شەبەرلەرى. ولاردىڭ قورجىندارىندا قازىرگە دەيىن 7 جولداما بار. ءبىر توپتا ونەر كورسەتەتىن جىگىتتەرىمىز اراسىندا يليا گولەندوۆ، الەكساندر ەمەليانوۆ، داۋلەت سۇلتانبەكوۆ جانە اندرەي ەرگۋچيەۆ ءبىر جولداما جەڭىپ العان بولاتىن. ال ايەلدەر اراسىندا وتەتىن كوماندالىق سايىستا ناتاليا سەرگەيەۆا، يرينا پودوينيكوۆالار ءبىر جولداماعا، ەرلەر اراسىندا الەكسەي دەرگۋنوۆ، ەۆگەني الەكسەيەۆتار ءبىر جولداماعا يەلىك ەتتى. ال جەكەلەي سىنداردا يننا كلينوۆا، زويا انانچەنكو، سەرگەي توكارنيتسكي، تيمۋر حايداروۆتىڭ ءتورت جولداماسىن قوسقاندا جالپى 7 جولداما بار.
ال قازاق جانكۇيەرلەرىنىڭ سۇيىكتى سپورتىنا اينالىپ كەتكەن بوكستان قازىرگە دەيىن 4 سپورتشىمىز جولداماعا يەلىك ەتتى.
ەڭ ءبىرىنشى بوكسشىلارىمىزدان ارۆ جوباسى اياسىندا استانا تورىندە 60 كەلىدە بەرىك ءابدىراحمانوۆ جولدامانى جەڭىپ العانى ەسىمىزدە. ودان كەيىن وسى جوبا اياسىندا 49 كەلىدەگى ءبىرجان جاقىپوۆ ەكىنشى جولداماعا قول جەتكىزدى. ءۇشىنشى جولدامانى WSB جوباسى اياسىندا 91 كەلىدە ۆاسيليي ليەۆيت جەڭىپ العان بولاتىن. ال ءتورتىنشى جولدامانى كاتاردىڭ باس قالاسى دوحادا بوكستان ەرەسەكتەر اراسىنداعى الەم چەمپيوناتىندا 69 كەلىدە دانيار ەلەۋسىنوۆ قورجىنىمىزعا سالدى.
ەندى مىرزاعالي ايتجانوۆ باپتايتىن ءبىزدىڭ بىلعارى قولعاپ شەبەرلەرى ريو وليمپياداسىنا تولىق قۇرامدا بارۋ ءۇشىن قالعان ءۇش ليتسەنزيالىق جارىستا بارىنشا تابىستى ونەر كورسەتۋلەرى كەرەك. العاشقى وليمپياداعا ىرىكتەۋ ءتۋرنيرى 2016 -جىلى 23 -ناۋرىز بەن 3 -ءساۋىر ارالىعىندا قىتايدىڭ شيانان قالاسىندا ازيا مەن تىنىق مۇحيت بوكسشىلارىنىڭ قاتىسۋىمەن بولادى. ال مامىر ايىندا بولگاريا استاناسى سوفيادا بوكسشىلار WSB مەن APB جوبالارى بويىنشا جولداماعا تالاسسا، سوڭعى جالپى دۇنيەجۇزىلىك ىرىكتەۋ شىلدەنىڭ 7-19 ارالىعىندا باكۋدە وتەدى.
ال بەسىنشى كوپ جولداماعا يە بولعان سپورتشىلارىمىز - قۇرالايدى كوزگە اتقان مەرگەندەرىمىز. نىسانا كوزدەۋ سپورتىنان راشيد يۋنۋسمەتوۆ، ۆلاديمير يساچەنكو، يۋري يۋركوۆ، ەليزاۆەتا كورول تورتەۋى ءتورت جولداماعا يەلىك ەتتى. ال ساداق اتۋدان ەرلەر اراسىندا سۇلتان دۇزەلبايەۆ پەن ايەلدەر اراسىندا لۋيزا سايديەۆا ءبىر-ءبىر جولداماعا يەلىك ەتتى.
گرەك- ريم كۇرەسىنەن ەكى جولداما بار. ونى دوسجان كارتيكوۆ پەن المات كەبىسپايەۆ جەڭىپ الدى. ال قازىرگە ەركىن كۇرەستەن جالعىز جولداما بار. ونىڭ يەسى - ارتاس سانا. سونداي- اق، ءجۇزۋ سپورتىنان دميتريي بالاندين ءبىر جولداماعا يەلىك ەتسە، قازىرگى بەسسايىستان ەلەنا پوتاپەنكو ءبىر جولداما جەڭىپ الدى.
مىنە، بۇل قازاقستان سپورتشىلارىنىڭ قازىرگە دەيىنگى ريو وليمپياداسىنا جەڭىپ العان 41 جولداماسى. بۇل جولدامالار سانىنا جاڭا جىلعا دەيىن ءالى دە وزگەرىستەر ەنۋى مۇمكىن. ويتكەنى 31 -جەلتوقسانعا دەيىن ريوعا جولداما ۇلەستىرەتىن كەيبىر جارىستاردىڭ بار ەكەنىن ەستەن شىعارماۋىمىز كەرەك.
ال 2016 -جىلى وتانداستارىمىز 70 قۇرلىقتىق، 52 الەم كۋبوگى كەزەڭدەرىندە باق سىناپ، ريو وليمپيادا ويىندارىنىڭ جولداماسىنا تالاساتىن بولادى. سوندىقتان، الداعى جىل ناعىز باسەكەگە تولى جىل بولاتىنى انىق.
قازاقستان ءۇشىن ريو- دە- جانەيرو 1991 -جىلى كەڭەس وداعى ىدىراعاننان كەيىنگى تاۋەلسىز ەل رەتىندە قاتىسقالى وتىرعان جەتىنشى وليمپيادا ويىنى بولماق.
ەستەرىڭىزگە سالا كەتەيىك، 1992 -جىلى XXV جازعى وليمپيادا ويىندارىندا قازاقستان قۇراماسى بۇرىنعى كسرو- نىڭ 15 ەلى بىرىگىپ «بىرىككەن كوماندا» قۇرامىندا ونەر كورسەتتى.
ال جەكە ەل رەتىندە العاش رەت وتانداستارىمىز جازعى وليمپيادا ويىندارىنا 1996 -جىلى قاتىستى. اتلانتادا (ا ق ش) وتكەن دودادا ەلىمىزدىڭ نامىسىن 96 سپورتشى قورعادى. 14 سپورت تۇرىنەن جارىس جولىنا شىعىپ، 3 التىن 4 كۇمىس، 4 قولا جۇلدە (جالپىكوماندالىق ەسەپتە 24- ورىن) ەنشىلەپ قايتتى.
اراعا 4 جىل سالا سيدنەيدە وتكەن وليمپيادادا ۇلتتىق قۇرامانىڭ قۇرامى ارتا ءتۇستى. 130 سپورتشى 17 سپورت تۇرىنەن باق سىنادى. وندا جەرلەستەرىمىز 3 التىن، 4 كۇمىس (جالپىكوماندالىق ەسەپتە 22-) ەنشىلەدى. 2004 -جىلى افينادا وتكەن وليمپيادا قازاقستان قۇراماسى 17 سپورت تۇرىنەن سىنعا ءتۇسىپ، بارعان 119 سپورتشى 1 التىن، 4 كۇمىس، 3 قولا مەدال (جالپىكوماندالىق ەسەپتە 40- ورىن) يەلەندى.
2008 -جىلى بەيجىڭدە وتكەن دودادا ەلىمىزدىڭ نامىسىن 132 سپورتشى 22 سپورت ءتۇرى بويىنشا باق سىناپ، 2 التىن، 4 كۇمىس، 7 قولا ەنشىلەپ، جالپىكوماندالىق ەسەپتە 29-ورىنعا تۇراقتادى.
قازاقستاندىق سپورتشىلار ءىرى جەتىستىككە لوندون وليمپياداسىندا قول جەتكىزدى. 115 سپورتشىمەن اتتانىپ، 20 سپورت تۇرىنەن جەرلەستەرىمىز 7 التىن 1 كۇمىس 5 قولا مەدالمەن جالپىكوماندالىق ەسەپتە 12- ورىننان كورىندى. بۇل قازاقستان سپورتشىلارىنىڭ وليمپيادا ويىندارىنداعى بۇرىن- سوڭدى بولماعان رەكوردى.
ەندى قازاقستان قۇراماسى ريو- دە- جانەيروداعى وليمپياداسىنا 27 سپورت تۇرىنەن 110 سپورتشىدان ارتىق قۇراممەن بارۋدى كوزدەپ وتىر.
ايتا كەتەيىك، ريو- دە- جانەيرو وليمپياداسى 2016 -جىلدىڭ 5-21 -تامىز ارالىعىندا وتەدى.
كۇنسۇلتان وتارباي
