استانادا كورەي دجازى كەشى ءوتتى - فوتو

 كورەي دجازىنىڭ العاشقى كەشى استانادا وتكەن جىلى اتاقتى ءانشى مالو مەن گيتاراشى پاك دجۋ ۆوننىڭ قاتىسۋىمەن تابىستى وتكەن بولاتىن.

بيىلعى جىلى ەكى دجاز مۋزىكاسى ۇجىمى: دجي حە لي (Gee Hey Lee) كۆارتەتى مەن چو يون دوك (Jo Young Deok) تريوسى كورەرمەندەردى وزدەرىنىڭ شىعارماشىلىعىمەن ءتانتى ەتتى. توپتار ولاردىڭ كوشباسشىلارى مەن نەگىزىن قالاۋشىلاردىڭ ەسىمدەرى قۇرمەتىنە اتالعانىن ەسكە سالا كەتەيىك.

دجاز پيانيسى دجي حە لي سەۋلدە تۋعان جانە سوندا كلاسسيكالىق فورتەپيانونى وقىپ- ۇيرەنگەن. دجي حە ليدىڭ 1996 -جىلى سەۋلدەن شتۋتگارتقا (گەرمانيا) اۋىسۋى ونىڭ كلاسسيكالىق مۋزىكادان دجاز ورىنداۋىشىسىنا اينالۋىنا اسەر ەتتى.

«دجاز ماعان ەركىندىكتى سەزىنۋگە كومەكتەسەدى. مەن قاي جەردە دە وزىمە جىگەر- قايرات الامىن. بۇگىن مەن ازىرەت سۇلتان مەشىتىندە بولدىم، ماعان استانانىڭ اۋا رايى مەن ادامدارى ۇنادى. مىنە، وسىنىڭ بارلىعى دا جىگەرىمە جىگەر قوسادى»، دەپ ءوزىنىڭ اسەرىمەن ءبولىستى دجي حە لي «قازاقپارات» تىلشىسىمەن اڭگىمەسىندە.

2003 -جىلى ول شتۋتگارت جوعارى مۋزىكا جانە تەاتر مەكتەبىن ۇزدىك ءبىتىردى جانە سول جىلى وعان بوستونداعى بەركلي مۋزىكالىق كوللەدجىنىڭ ستيپەندياسى بەرىلدى. شتۋتگارتقا كەلگەننەن كەيىن ول 2005 -جىلى بادەن- ۆيۋرتەمبەرگ كوركەمسۋرەت قورىنىڭ كونكۋرسىندا جەڭىمپاز اتانىپ، ستيپەندياسىن يەلەندى. 2012 -جىلعى شىلدەدە ول گەرمانياداعى ەڭ بەدەلدى دەپ سانالاتىن بادەن- ۆيۋرتەمبەرگ دجاز ناگراداسىنا يە بولدى.

استاناداعى كونسەرتتە دجي حە لي كۆارتەتىنىڭ قۇرامىندا گەرمانيا مۋزىكانتتارى: Franziska Schuster (ۆوكال)، Frank Kuruc (گيتارا)، Hansmartin Eberhardt (ساكسوفون) ونەر كورسەتتى.

دجي حە لي قازاقستاندا تۇڭعىش رەت بولىپ وتىر جانە ول استانا ساحناسىندا ءان سالۋ مۇمكىندىگىنە قۋانىشتى. ول استانا كورەرمەندەرىنىڭ ونەرگە قۇشتارلىعىن اتاپ وتەدى. «مەن زالدىڭ جارتىسى - كورەيلىكتەر بولار، ولار دجازدى جانە كورەي مۋزىكاسىن تىڭداۋعا كەلگەن شىعار دەپ ويلادىم. ءبىراق تا زالداعىداردىڭ بارلىعى دەرلىك قازاقتار ەكەنىن كورگەنىمدە تاڭعالدىم. ءبىزدىڭ شىعارماشىلىعىمىز سىزدەردىڭ كوڭىلدەرىڭىزدەن شىققانى مەن ءۇشىن وتە قۋانىشتى جاعداي. ءبىز سىزدەردىڭ قولداۋلارىڭىز بەن قوناقجايلىقتارىڭىزدى سەزىندىك. مەن قازاقتار دا كورەيلەرگە ۇقسايدى ەكەن، دەپ ويلادىم»، - دەپ اتاپ ءوتتى ول.

ال 2007 -جىلى كەنگحي ۋنيۆەرسيتەتىنىڭ تۇلەكتەرى قۇرعان چو يون دوك تريوسى دا كورەياداعى بولاشاعى زور دجاز مۋزىكالىق ۇجىمدارىنىڭ ءبىرى. ونىڭ قۇرامىنداعىلار: چو يون دوك - گيتارا، پاك دجي ۋن - كونتراباس، چوي يوسەپ - سوقپالى اسپاپتار. 2012 -جىلى ولار دجاراسوم حالىقارالىق دجاز فەستيۆالى كونكۋرسىنىڭ گران-پريىن جەڭىپ الىپ، وزدەرىنىڭ كاسىبي مۋزىكالىق مانسابىن باستادى.

توپ كوشباسشىسى جانە گيتاراشى چو يون دوك ۇجىمنىڭ بارلىق دەرلىك كومپوزيتسيالارىنىڭ اۆتورى. مۋزىكانتتار ءوز شىعارماشىلىعىندا دجازدى مۋزىكانىڭ باسقا دا ستيلدەرىمەن ۇشتاستىرۋعا تىرىسادى.

«ءبىز يسپانيادا، گەرمانيادا بولدىق، ەندى قازاقستانعا كەلىپ وتىرمىز. ءبىز استانا وتە سۋىق بولادى دەپ ەستىگەنبىز، سوندىقتان دا مىقتاپ ازىرلەندىك. ءبىراق تا قازاقستان ءبىزدى جىلى شىرايمەن قارسى الدى»، - دەدى چو يون دوك.

كونسەرتتىك باعدارلاما گەرمانياداعى كورەي مادەنيەت ورتالىعىمەن ىنتىماقتاستىقتا ۇيىمداستىرىلعانىن اتاپ وتكەن ءجون.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى