اتى شۋلى «احمەتوۆ ءىسى» اياقتالۋعا جاقىن

قازىرگى كۇنى قاراعاندى وبلىستىق سوتىندا تاراپتاردىڭ جارىس ءسوزى وتۋدە، ودان كەيىن سوت ۇكىمى شىعارىلار الدىندا 21 سوتتالۋشىعا سوڭعى سوزدەرىن ايتۋ قۇقىعى ۇسىنىلماق.

تاراپتار جارىس ءسوزىنىڭ ءبىرىنشى كۇنى مەملەكەتتىك ايىپتاۋشى ديار ءادىلوۆ سوت ىسىندەگى باستى فيگۋرانت سەرىك احمەتوۆكە قاتىستى ونىڭ مۇلكىن تاركىلەپ، 5  جىلعا جاۋاپتى مەملەكەتتىك قىزمەتپەن اينالىسۋىنا شەكتەۋ قويا وتىرىپ، 12  جىلعا باس بوستاندىعىن ايىرۋدى سۇرادى.

سوت بارىسىندا بەلگىلى بولعانىنداي، سەرىك احمەتوۆ قاراعاندى وبلىسىنىڭ اكىمى قىزمەتىندە قاراعاندى قالاسىنىڭ يندۋستريالىق پاركىندە اعىندى سۋلاردى تازارتۋ ستانساسىنىڭ قۇرىلىسى بارىسىندا مەردىگەر ۇيىمداردى تاڭداۋعا قىسىم كورسەتكەنى بەلگىلى بولعان ەدى. بۇل تۋرالى تىڭداۋ بارىسىندا سوتتالۋشىنىڭ ءبىرى «سەنترستروي- كومپلەكت ن س» ج ش س وكىلىنىڭ ءبىرى ءالجان اقمولدايەۆ ايتىپ بەرگەن بولاتىن. اقمولدايەۆتىڭ سوزىنشە، احمەتوۆ 4 ميلليون دوللار كولەمىندە پارا تالاپ ەتكەن. سونىمەن قاتار اقمولدايەۆتىڭ وندىرىستىك اعىندىلاردى تازارتۋعا قاراستىرىلعان چەح قۇرىلعىلارىن ارزان وتاندىق وندىرىستىك جۇيەگە زاڭسىز اۋىستىرعانى انىقتالعان.

قاراعاندى يندۋستريالدى پاركىنىڭ اعىن سۋلاردى تازارتۋ جۇيەسىنىڭ قۇرىلىسى جالعان قۇجاتتارمەن جۇرگىزىلگەن. تۇتاستاي العاندا، جالپى سوماسى 1,1 ميلليارد تەڭگەنى قۇرايتىن قاراجات قولما- قول اقشاعا اينالدىرىلىپ، جىمقىرىلعان. ايتا كەتەرلىگى، اتالعان نىسان ءالى دە قولدانىسقا بەرىلمەگەن، ال مەملەكەتتىك ساراپتاماسى ينفراقۇرىم تالاپتارىنا ساي كەلمەيتىنى تۋرالى قورىتىندى جاساعان.

سوت بارىسىندا تىڭدالعان اتالعان ىستەگى تاعى ءبىر ەپيزود جىلىجاي كەشەنىن جاڭعىرتۋ جونىندەگى ارەكەتتەر بولىپ تابىلادى، اڭگىمەلەر اۋانىنا قاراعاندا بۇل دا احمەتوۆكە تيەسىلى.

 «توپار جىلىجايلارى» ج ش س ءۇشىن قۇرىلعىلار ساتىپ الۋ ارقىلى زاڭسىز تابىس تابۋ ءۇشىن يسپانيالىق كومپانيا تارتىلعان، وندا كەلىسىمشارتتاعى سوما ادەيى كوتەرىلىپ كورسەتىلگەن.

وسىلايشا، جالپى العاندا قىلمىسقا قاتىسۋشى تۇلعالار تاراپىنان مەملەكەتكە 1,1 ميلليارد تەڭگە زالال كەلتىرىلگەن.

بۇدان بولەك، سەرىك احمەتوۆ ءوزىنىڭ ۇلى دانيارعا تيەسىلى «ستال سينك» ج ش س كومپانياسىنىڭ مۇددەسىنە قاراي وكىلەتتىگىن اسىرا پايدالاندى دەپ ايىپتالۋدا. بۇل رەتتە احمەتوۆ قاراعاندى قالاسىنىڭ اكىمدەرى ابدىشەۆكە، سماعۇلوۆقا قاراعاندى قالاسىنا جارىقتاندىرۋعا قاجەتتى قۇرالدار ساتىپ الۋ ءۇشىن «ستال سينك» ج ش س- نا جوعارى باعامەن ساتىپ الۋلار جاساۋعا بىرنەشە رەت نۇسقاۋلار بەرىپ وتىرعان.

 جارىس سوزدىڭ ەكىنشى كۇنى سوتتالۋشى، قاراعاندى اكىمىنىڭ بۇرىنعى ورىنباسارى مۇحتار ادامبەكوۆ ءوز كىناسىن مويىنداپ، ءوزىنىڭ باسشىسى ابدىشەۆتىڭ زاڭسىز تاپسىرمالارىن ورىنداعانىن ايتتى. بۇنداي زاڭسىز ارەكەتتەردەن مەملەكەتكە 201 ميلليون تەڭگە سوماسىندا ماتەريالدىق شىعىن كەلگەن.

بۇدان بولەك، سەرىك احمەتوۆ قاراعاندى قالاسىنىڭ كولىكتىك- لوگيستيكالىق كەشەنى ءۇشىن جەر ۋچاسكەلەرىن ءبولۋ بارىسىندا قىزمەتتىك وكىلەتتىگىن اسىرا پايدالانعانى فاكتىسى بويىنشا دا ايىپتالۋدا. ءوزىنىڭ تابىسى مول بيزنەسىن قۇرۋ ءۇشىن جەر زاڭناماسى بۇزىلا وتىرىپ، جالپى اۋماعى 38 گەكتاردى قۇرايتىن 7 ۋچاسكە بولىنگەن. بۇل ۋچاسكەلەردە احمەتوۆتىڭ تىكەلەي باقىلاۋىمەن كولىكتىك- لوگيستيكالىق كەشەن قۇرىلىسى جۇرگىزىلگەن.

بۇدان باسقا، احمەتوۆ ۇيلەستىرۋ كەڭەسىنىڭ ءتوراعاسى بولىپ وتىرعاندا «بيزنەستىڭ جول كارتاسى-2020» باعدارلاماسى بويىنشا كەشەن ينفراقۇرىلىمىنىڭ قۇرىلىسىنا بولىنگەن قاراجاتتان 282 ميلليون تەڭگەنى زاڭسىز جۇمساعانى ءۇشىن دە ايىپتالىپ وتىر. بۇل تۋرالى دا قاراعاندى وبلىستىق سوتىندا كەيبىر ايىپتالۋشىلار مەن كۋاگەرلەر ايتقان بولاتىن.

جارىس ءسوز بارىسىندا ايىپتاۋشى جانە قورعاۋشىلار تاراپى ىسكە قاتىستى ءوز ۇستانىمدارىنىڭ دۇرىستىعىن سوت الدىندا سوڭعى رەت دالەلدەۋ مۇمكىندىگىن يەلەنەدى.

سوت تىڭداۋى بارىسىندا ينسيدەنتتەر دە بولماي قالمادى. ماسەلەن، سوتتالۋشى د. نۇربايەۆ احمەتوۆ وكىلدەرىنىڭ تاراپىنان قىسىم جاسالعانىن مالىمدەگەن. سونىمەن قاتار ءىستىڭ باس فيگۋرانتى مەن ءبىرقاتار سوتتالۋشىلارعا قارسى ايىپتاۋ ءسوزىن سويلەگەن كۋاگەردىڭ ءبىرى سوققىعا دا جىعىلعانعا ۇقسايدى.

 اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى