ادەبيەت سالاسىنداعى العاشقى «التىن توبىلعى» سىيلىعىنىڭ جەڭىمپازدارى ماراپاتتالدى

قازىلار القاسى 2015 -جىلدىڭ شىلدەسىنەن باستاپ ءوتىنىش بەرگەن 120 ادەبي تۋىندىنىڭ اراسىنان ەڭ جاقسى جازاتىن ءتورت قالام يەسىن تاڭداپ العان. اتاپ ايتساق، «ەڭ جاقسى پروزا» نوميناتسياسىندا 20 جاستاعى وسكەمەن قالاسىنىڭ تۇرعىنى اراي ەرتارعىنوۆا، «ەڭ جاقسى دراماتۋرگيا» نوميناتسياسىندا انناس باعدات، «ەڭ جاقسى بالالار ادەبيەتى» نوميناتسياسىندا الەكسەي ۆارزايەۆ «التىن توبىلعى» سىيلىعى مەن 1 ميلليون تەڭگە كولەمىندە اقشالاي سىيلىققا يە بولدى. ال بەلگىلى جۋرناليست ەسبولات ايدابوسىن «ماڭگىلىك ەل» تاقىرىبىنداعى تۋىندىسى ءۇشىن 1,5 ميلليون تەڭگە كولەمىندە ارنايى سىيلىقتى يەلەندى.

«مەملەكەت باسشىسى جاستارىمىزدىڭ شىعارماشىلىق الەۋەتىن دامىتۋعا ۇنەمى كوڭىل بولەدى. سوندىقتان دا، تۇڭعىش پرەزيدەنتتىڭ قورى بيىل العاش رەت وسى جۇلدەنى تابىستاپ وتىر. ەندى جىل سايىن «التىن توبىلعى» ادەبي جۇلدەسى ءوز لاۋرەاتتارىن كۇتەدى. جوبانىڭ ماقساتى - جاس قالامگەرلەردىڭ شىعارمالارىن حالىققا تانىستىرۋ، ولاردىڭ جاڭاشا ويداعى تۋىندىلارىن توپتاستىرۋ» ، - دەدى سالتاناتتى شارادا تۇڭعىش پرەزيدەنت قورىنىڭ اتقارۋشى ديرەكتورى ساعىندىق نۇراقانوۆ.

جالپى، «التىن توبىلعى» سىيلىعىن ەلباسى- قازاقستان رەسپۋبليكاسى تۇڭعىش پرەزيدەنتى قورى ۇيىمداستىرىپ، قۇرىلتايشىسى اتانىپ وتىر. جوبا 18-35 جاس ارالىعىنداعى جاس اۆتوردى ىنتالاندىرۋعا باعىتتالعان. جوبانىڭ سەرىكتەستەرى - قازاقستان جازۋشىلار وداعى مەن مەملەكەتتىك ءتىلدى دامىتۋ قورى.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى