الماتىدا ءمادينا ەراليەۆانىڭ شىعارماشىلىعىنا ارنالعان ءان بايقاۋى ءوتتى

بۇل تۋرالى اتالمىش جوعارى وقۋ ورنىنىڭ باسپا ءسوز قىزمەتىنەن حابارلادى.

شارا ءمادينا ەراليەۆانى ەسكە الۋعا ارنالعان ادەبي-مۋزىكالىق كومپوزيتسيامەن باستالدى. قويىلىم بارىسىندا قىزدار ۋنيۆەرسيتەتىنىڭ ستۋدەنتى ايزادا تولەتاي ءوزى شىعارعان ءانىن ورىندادى. كەيىن ءانشىنىڭ كوزىن كورگەن ارىپتەس، قىزمەتتەس بولعان ونەردەگى دوستارى - گۇلزيا بايبوسىنوۆا، باقىت شادايەۆا، جانار ايجانوۆا، گۇلفايرۋز دالعاباي، ىقىلاس نۇرعاليەۆ، تىلەك ورازاليەۆ جانە زامزاگۇل ءشارىپ قىزى ءمادينانى ساعىنىشپەن ەسكە الدى.

«ءمادينا تۋرالى ءبىر كۇندە ايتىپ تاۋىسۋ مۇمكىن ەمەس. ول ءانشى عانا ەمەس، سەگىز قىرلى ءبىر سىرلى جان ەدى. كيىمدەردىڭ ءتۇر-ءتۇرىن تىگىپ الاتىن ىسمەر، وعان قوسا سۋرەتشى بولاتىن. ساحناعا جارقىراپ شىعاتىن. مىنەزىنىڭ ءوزى قانداي ەدى! اشىق مىنەزدى، جارقىن ادام بولاتىن. ونەرگە جارقىراپ كەلدى، جارقىراپ ءوتتى، جارقىراپ كەتتى. ونىڭ ۇرپاعى، جالعاسى ۇلى باردا، سۇيەتىن حالقى باردا، ونەرىن ناسيحاتتاۋشى بۇگىنگى جاستار باردا، ونىڭ ونەرى ەشقاشاندا وشپەيدى»، - دەدى ق ر مادەنيەت قايراتكەرى، قازاقستان جاستار وداعى سىيلىعىنىڭ لاۋرەاتى، ءانشى جانار ايجانوۆا.

بايقاۋدا ءمادينا ەراليەۆاداي ونەردەگى سارا جولىن جالعاستىرۋدى ماقسات تۇتىپ كەلگەن 11 قاتىسۋشى باق سىنادى. ولار دارا تۇلعانىڭ وزىنە عانا ءتان داۋسىمەن ايتا الماسا دا، اندەردى ءوز مۇمكىندىكتەرىنە قاراي بارىن سالىپ ورىندادى. ەكى تۋردان تۇرعان بايقاۋدا ۇمىتكەرلەر «كۇرەڭ كۇز» ءانىن جانە ءمادينا ەراليەۆانىڭ رەپەرتۋارىنان ءبىر اننەن ورىندادى.

ءادىلقازىلار القاسىنىڭ شەشىمى بويىنشا باس جۇلدەنى جۇسىپبەك ەلەبەكوۆ اتىنداعى رەسپۋبليكالىق ەسترادا-سيرك كوللەدجنىڭ ستۋدەنتى راقىمجان ماقساتبايەۆ جەڭىپ الدى. 1- جۇلدەلى ورىندى دا اتالمىش كوللەدجدىڭ ستۋدەنتى قازبەك ءابۋ يەلەندى. 2- ورىنعا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ «سامعاۋ» كۆارتەتى لايىقتى دەپ تانىلسا، 3- ورىن ج. ەلەبەكوۆ اتىنداعى رەسپۋبليكالىق ەسترادا-سيرك كوللەدجنىڭ ستۋدەنتى ەرجانات اقيقاتقا بۇيىردى. ال، «مۋنا» توبى ەرەكشە توپ دەگەن اتالىمعا يە بولسا، «كورەرمەن كوزايىمى» اتاعىنا دىنمۇحامەدالى سامبەت يە بولدى. بارلىق جەڭىمپازدار ديپلومدارمەن جانە اقشالاي سىيلىقتارمەن ماراپاتتالدى.

ايتا كەتەلىك، قازاقتىڭ ءبىرتۋار ءانشىسى، ونەردى جانىنداي سۇيگەن، «ءان الەمىنىڭ اقبايانى» اتانعان قازاقستاننىڭ ەڭبەك سىڭىرگەن ءارتىسى ءمادينا ەراليەۆانىڭ ومىردەن وتكەنىنە بيىل ون بەس جىل تولىپ وتىر. ونىڭ «ايقاراگوز»، «اقبايان»، «ساعىم جىلدار» سياقتى اسەرلى اندەرى حالىق جادىندا، جۇرەگىندە ماڭگىگە ساقتالىپ قالدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى